ಎದ್ದು ಮೆರವಣಿಗೆ ಹೊರಟ ಮನಸಿಗೆ
ನೂರೆಂಟು ಸುಂದರ ಸಿಹಿಸಿಹಿ ಕನಸು
ಆದರೂ ದುಗುಡ ದುಮ್ಮಾನಗಳಲ್ಲಿ
ಒಳಗೊಳಗೆ ನಲುಗುವುದು ಮನಸು
ಕಾಣದ ದೂರದೂರಿನ ಒಂಟಿ ಪಯಣ
ನಯನಗಳಲ್ಲಿ ನೂರು ಕಾತರಗಳ ತಲ್ಲಣ
ಮಾಯೆಯ ಸರಿಸಿ ನಾಳೆಗಳ ಹಂಬಲಿಸಿ
ಸಾಗಿದೆ ನಮ್ಮ ಜೀವನರಥ ಎಣಿಸಿ ಗುಣಿಸಿ
ಮತ್ತೆ ಮತ್ತೆ ಸಾಗುತ್ತಲೇ ಇರಬೇಕು ನಾವಿಲ್ಲಿ
ಭರವಸೆಯ ಬೆಳಕಹೊತ್ತು ಮನದ ಕಂಗಳಲ್ಲಿ
ಸೋತು ಎಡವಬಾರದು ಯಾವುದೇ ಕಷ್ಟಗಳಿಗಿಲ್ಲಿ
ಗೆಲುವು ಮರೀಚಿಕೆ ಆಗಬಾರದು ಬಾಳಿನಲ್ಲಿ
ಸೋಲಮರೆತು ಗೆಲ್ಲುವುದೇ ನಮಗಿಲ್ಲಿ ಸಾಹಸ
ಯೋಜಿಸಿ ಹೆಜ್ಜೆ ಇಡಲು ಹೆಚ್ಚುವುದು ವಿಶ್ವಾಸ
ನಾವೂ ಬರೆಯಬಹುದು ಆಗಷ್ಟೇ ಇತಿಹಾಸ
ಇಲ್ಲದಿರೆ ತಲೆಯಮೇಲೇ ಬಿದ್ದಂತೆನಿಸುವುದು ಆಕಾಶ
ಕಾಯುತ್ತ ಸುಮ್ಮನೆ ಕುಳಿತರೆ ಬಾರದು ಅವಕಾಶ
ಸೃಷ್ಟಿಸಿಕೊಳ್ಳಬೇಕು ಅವಕಾಶ ಆಗದೆ ಹತಾಶ
ಅನುಭವಿಸಬೇಕು ಜೀವನವೂ ಒಂದು ಪ್ರವಾಸ
ಹೊಂದಬೇಕು ನಾವಿಲ್ಲಿ ಪ್ರತಿಕ್ಷಣವೂ ಹರುಷ

–ನಾಗರಾಜ್ ಜಿ.ಎನ್.ಬಾಡ,ಕುಮಟ

