ಹಾದಿ ಬದಿಯ ಕಡು ಕಪ್ಪು ಕಲ್ಲುಗಳು ಕಥೆ ಹೇಳಿವೆ
ಮನುಜ ಬುದ್ದಿಯ ಓರೆ ಕೊರೆಗಳಿಗೆ ಸಾಕ್ಷಿಯಾಗಿವೆ
ಬೀಸಿದ ಗಾಳಿಗೆ ಬಗ್ಗದೆ ಎದೆಯೊಡ್ಡಿ ನಿಂತಿವೆ
ಸುರಿದ ಮಳೆಗೆ ಕರಗದೆ ಘಟನೆಗಳ ಹೇಳಲು ಕಾಯುತ್ತಿವೆ
ಹರಿದ ನೆತ್ತರಿನ ಕಟುಕನ್ನು ಕಳೆದುಕೊಂಡು
ಬರಿದಾದ ಊರುಗಳ ನೆನಪಿಸಿಕೊಂಡು
ಉಸಿರು ಚೆಲ್ಲಿ ಕಣ್ಮುಚ್ಚಿ ಮರೆಯಾದ ಎಷ್ಟೋ ಜೀವಗಳ
ಒಡಲಲ್ಲಿ ಹಸಿವು ತುಂಬಿಕೊಂಡು ನಿಂತುಹೋದ ಹೃದಯಗಳ
ಸ್ಮಾರಕವಾಗಿ ಅರಸಿನ ಕುಂಕುಮಗಳ ಬಳಿದುಕೊಂಡು ಕಾದಿವೆ
ಕಣ್ಣೀರು ಕೋಡಿಯಾಗಿ ಹರಿದ ಕ್ಷಣಗಳ ನೆನೆದು ಬಿಕ್ಕುತ್ತಿವೆ
ಕೈ ಕಾಲುಗಳ ಕಳೆದುಕೊಂಡು ಹೆಳವರಾದವರ
ಧರ್ಮ ಬದಲಿಸಿಕೊಂಡು ಮತಾಂತರಗೊಂಡವರ
ನಿಟ್ಟುಸಿರು ಶಾಪಗಳ ಪಟ್ಟಿಮಾಡಿಕೊಂಡು
ಭಯಗ್ರಸ್ತ ಮನಸ್ಸುಗಳ ಕನವರಿಕೆ ಕಟ್ಟಿಕೊಂಡು
ಎಲ್ಲಾ ಒಪ್ಪಿಸಿ ಹೇಳಲು ಹಾತೊರೆಯುತ್ತಿವೆ
ನೋಡಿರುವುದೆನೆಲ್ಲಾ ಹಂಚಿಕೊಂಡು ಹಗುರವಾಗಲು ಬಯಸುತ್ತಿವೆ
ಕಾಳಗದಲ್ಲಿ ಗಂಡನ ಕಳೆದುಕೊಂಡು ಸತಿಯಾದವರ
ಘನಘೋರ ಸಂಗ್ರಾಮದಲ್ಲಿ ವೀರ ಸ್ವರ್ಗ ಹೊಂದಿದವರ
ಮಾಸ್ತಿಗಲ್ಲು ವೀರಗಲ್ಲುಗಳಾಗಿ ಚಿತ್ರದ ರೂಪದಲ್ಲಿ ಸಾರುತ್ತಿವೆ
ಕಾಲ ಗರ್ಭದಲ್ಲಿ ಹುದುಗಿ ಹೋದ ಭಾವನೆಗಳ ಹೊರತೆಗೆಯುತ್ತಿವೆ
ಚರಿತ್ರೆಯ ಹಸಿ ಹಸಿ ಸತ್ಯವ ಅನಾವರಣ ಮಾಡುತ್ತಿವೆ
ಬರೀ ಕಾಡುಗಲ್ಲುಗಳಲ್ಲ ಇವು ಇತಿಹಾಸದ ಪುಟಗಳ ತಿರುವಿ ಹಾಕುವ ಆಕರಗಳು….
ಕೆ.ಎಂ ಶರಣಬಸವೇಶ
