ಮನ ಮುದುಡಿ ದುಃಖ ಮೈದಳೆದಾಗ,
ಮೊಗದಲಿ ಕಿರು ನಗೆಯ ತರುವವಳು —
ಎನ್ನ ಮಗಳು
ಭರವಸೆ ಕುಸಿದು,
ಕಣ್ಣಿಗೆ ಕತ್ತಲೆ ಕವಿದಾಗ,
ಬದುಕಿಗೆ ಬೆಳಕು ಚೆಲ್ಲುವ ದೀವಿಗೆಯಾದವಳು —
ಎನ್ನ ಕುವರಿ
ಕಾಲಚಕ್ರ ತಿರುಗಿ,
ವಯೋಮಾನ ಏರಿ,
ಹಿರಿಯರೆಂಬ ಹಣೆಪಟ್ಟಿ ಬಂದಾಗಲೂ
ಮತ್ತೆ ಮುಗ್ಧತನ ತುಂಬಿ
ಮಗುವಾಗಿಸಿದವಳು —
ಎನ್ನ ಪುತ್ರಿ
ನಿರೀಕ್ಷೆಗಳ ಭಾರ ಎದುರಿಸಲಾಗದೆ,
ಆತಂಕ ಮನೆ ಮಾಡಿ
ಎದೆ ಬಡಿದುಕೊಂಡಾಗ,
ಧನಾತ್ಮಕ ಚಿಂತನೆಗಳ ತುಂಬಿ
ತಬ್ಬಿ ಸಂತೈಸಿದವಳು —
ಈ ನನ್ನ ಕಣ್ಮಣಿ
ಯಾಂತ್ರಿಕ ಬದುಕಿನ
ಏಕತಾನತೆಯ ಬೇಸರದಲ್ಲಿ,
ಮಗಳಾಗಿ ಹುಟ್ಟಿ
ಖುಷಿಯ ಕ್ಷಣಗಳನು ತುಂಬಿ,
ಬದುಕಿನ ಸೊಗಸಿಗೆ
ಮತ್ತೆ ಮರುಳಾಗಿಸಿದವಳು —
ಈ ನನ್ನ ಗೊಂಬೆ
ಕಕ್ಕುಲತೆಯಿಂದ
ಮನದ ಗೆಳತಿಯಂತೆ
ಕಷ್ಟ-ಸುಖಗಳ ಕೇಳಿ,
“ಈ ಸ್ನೇಹಬಂಧ ಎಂದೆಂದಿಗೂ
ಮುರಿಯದು” ಎಂದು
ಮಾತು ಕೊಟ್ಟವಳು —
ಈ ನನ್ನ ಮನೆದೀಪ
ಮಗಳು ಎಂದರೆ
ಮನೆಯಂಗಳದ ನಗುವಷ್ಟೇ ಅಲ್ಲ;
ಮನದ ಕತ್ತಲೆಗೆ ಬೆಳಕು,
ಬದುಕಿನ ಬಿರುಗಾಳಿಗೆ ಆಸರೆ,
ಹೃದಯದ ನೋವಿಗೆ ಮದ್ದು,
ಮತ್ತು…
ಬದುಕು ಇನ್ನೂ ಸುಂದರವಾಗಿದೆ
ಎಂದು ನೆನಪಿಸುವ
ಒಂದು ಪುಟ್ಟ ದೀವಿಗೆ.
-ಕೆ.ಎಂ ಶರಣಬಸವೇಶ
ಚಂದದ ಕವನ
ಸರಳ.. ಸುಂದರ.. ಆತ್ಮೀಯತೆಯ.. ಕವನ.. ಸಾರ್
ಮಗಳು ನೀಡುವ ಸಂತಸಗಳನ್ನು ಕಾವ್ಯರೂಪದಿ ಪಟ್ಟಿಮಾಡಿತ್ತ ಪರಿ ಸೊಗಸಾಗಿದೆ.
ಹೃದ್ಯವಾದ ಪಗದ್ಯ. ಚೆನ್ನಾಗಿದೆ. ನಮ್ಮ ಗುರುಗಳಾದ ಡಾ. ಹಾ ಮಾ ನಾಯಕರ “ನಮ್ಮ ಮನೆಯ ದೀಪ”
ಎಂಬ ಹೃದಯಂಗಮ ಪ್ರಬಂಧವನ್ನು ಮತ್ತೊಮ್ಮೆ ಓದಿದಂತಾಯಿತು.
ಹೀಗೇ ಇರಲಿ ಬಾಳಬುತ್ತಿ
ತಂಪಾಗಿರಲಿ ತಂದೆ ನೆತ್ತಿ
ಮನ ಬೆಳಗುವ ಮಗಳೆಂಬ ನಂದಾದೀಪದ ಕವನ ಸೊಗಸಾಗಿದೆ.
ಬದುಕಲು ಕಾರಣವೇ ನನ್ನ ಮಗಳು ಎಂಬ ಸಂದೇಶ ಹೊತ್ತ ಕವನ ಹೃದಯಕ್ಕೆ ತಟ್ಟಿದೆ.
ಎಮ್ಮ ಮನೆಯಂಗಳದಿ ಬೆಳೆದ ಹೂವಿನ ಚಿತ್ರಣ ಮನಕ್ಕೆ ಮುದ ನೀಡಿದೆ
ಮನೆ ಮನ ಬೆಳಗುವ ದೀಪದ ಪರಿಯಲ್ಲಿ ಮೂಡುವ ಮಗಳ ಚಿತ್ರಣ ಸುಂದರವಾಗಿದೆ
ಮಗಳ ಬಗ್ಗೆ ಸಾಂದರ್ಭಿಕ ಕವನ, ಆಪ್ತವಾಗಿದೆ.
ಸುಂದರ ಕವನ . nice