ಈಗೇನೂ ಉಳಿದಿಲ್ಲ ………

ಮಟ ಮಟ ಮಧ್ಯಾಹ್ನ

ಕಾದ ಕಡಲ ತೀರದಿ

ಮಳಲ ಹಾಸಿನ ಮೇಲೆ

ಮೂಡಿದ ಹೆಜ್ಜೆ ಗುರುತುಗಳು

ಅಲೆಯ ರಭಸಕ್ಕೆ ಅಳಿಸಿಹೋಯಿತು

ಬೆಸ್ತರ ಬಲೆಯ ಜಾಲದ

ಕುಣಿಕೆಗೆ ಸಿಲುಕಿ

ಜೀವ ತೆತ್ತ

ಅಮಾಯಕ ಮೀನಿನ ಹಾಗೆ !!

ಪಶ್ಚಿಮ ದಿಗಂತದಲ್ಲಿ

ಇಂಚಿಂಚಾಗಿ ಕರಗುವ

ಕೆಂಪು ಸೂರ್ಯನ ಮುಸ್ಸಂಜೆ ( ಇಳಿಸಂಜೆ )

ಎದೆ ತೆರೆದು ಪಿಸುಗುಟ್ಟುವ

ಮುಗ್ಧ ಹೃದಯಗಳು

ಕತ್ತಲು ಕಳೆಯುವ ಹೊತ್ತಿಗೆ

ಸುಳಿಗೆ ಸಿಕ್ಕು

ಇಟ್ಟ ಹೆಜ್ಜೆಯ ಹುಡುಕುತ್ತಾ

ಮೆಲ್ಲನೆದ್ದವರು ……

ಸುಂಕವಿಲ್ಲದೆ ಬಂದ ದಾರಿಗೆ

ಮರಳುವ ಕಡಲ ಅಬ್ಬರದಲೆಗಳು

ಈಗ ಶಾಂತ !

ಅಳಿಸಿ ಹೋದ ಚಿತ್ರದಂತೆ

ಈಗೇನೂ ಉಳಿದಿಲ್ಲ …….

ಭಗ್ನ ಪ್ರೇಮಿಗಳ ಹಾಗೆ !

-ಪ್ರಭಾಕರ ತಾಮ್ರಗೌರಿ ಗೋಕರ್ಣ