ಬೇಡಿಕೆಯ ಸಾಕಾರ;
..ತಿನ್ನಲು ಕೊಟ್ಟ ಉಂಡೆ ಗಂಟಲಲ್ಲಿ ಸಿಕ್ಕಿಕೊಂಡಾಗ
..ಮುದುಕಿ ನೀಡಿದ ಗುಟುಕು ನೀರು ಉಳಿಸಿತ್ತು ಅವನ ಜೀವ.
..ಅವಳದ್ದೊಂದು ಬೇಡಿಕೆ, ದೊಡ್ಡವನಾಗಿ ನೀಗಿಸೆಂದು
..ನೀರಿನ ಸಮಸ್ಯೆ. ಆಕೆ ಕಂಡಿದ್ದಳೇ ಮುಂದೆ ಅವನೇ ಆಗಿ
..ದೊಡ್ಡ ಇಂಜಿನಿಯರ್ ಜಲಾಶಯವೊಂದನ್ನು ನಿರ್ಮಿಸುವನೆಂದು.
ಬಲಿ;
ಸಂಸ್ಥಾನ ಕಂಡ ಶ್ರೇಷ್ಠ ನಿರ್ಮಾಣ ರೂವಾರಿ ನೀವು
ಯಂತ್ರ, ತಂತ್ರ, ಕೈಗಾರಿಕೆ, ಆಡಳಿತ ಎಲ್ಲ
ರಂಗದಲ್ಲೂ ದಕ್ಷತೆಯ ಮೆರೆದು ಕೊನೆಗೆ
ದಕ್ಷತೆಯ ಮಾನದಂಡ ಪ್ರತಿಪಾದಿಸಿ ಬಲಿಯಾದಿರಿ.
ಕೀರ್ತಿಶೇಷರು:
ಗೆರೆ ಮುರಿಯದ ಸೂಟು ಬೂಟು
ತಲೆಗೆ ಮುಕುಟದಂತೆ ಕಂಬಿಪೇಟ
ಸಮಯ ಪ್ರಜ್ಞೆಯೇ ಪುರುಷರೂಪಾಗಿದ್ದು
ಶತಾಯುಷಿಗಳಾಗಿ ಶತಶತಮಾನಗಳವರೆಗೆ
ಚಿರಸ್ಮರಣೀಯ ಕೀರ್ತಿಶೇಷರಾದಿರಿ.
ಮಾದರಿ:
ಧರ್ಮ ಅರ್ಥ ಕಾಮಗಳ ಸಮನ್ವಯತೆಯೇ
ಮೋಕ್ಷಕ್ಕೆ ದಾರಿಯೆಂದು ಹೇಳಿದ್ದಾರೆ ಹಿರಿಯರು
ಹೆಸರಿನ ಆರಂಭದಲ್ಲೇ ಮೋಕ್ಷ ಬಿರುದನ್ನು
ಹೊಂದಿರುವ ನೀವು ಆದಿರಿ ಎಲ್ಲರಿಗೆ ಮಾದರಿ.
ನನಸು:
ನೋಡಲೆರಡು ಕಣ್ಣು ಸಾಲವು ಸೊಬಗಿನ ಬೃಂದಾವನ
ಅದರ ಹಿಂದಿದೆ ಭವ್ಯವಾದ ಕೃಷ್ಣರಾಜಸಾಗರ
ಭದ್ರವಾದ ಅಣೆಕಟ್ಟೆ, ಸುಂದರ ತೋಟದ ಕಲ್ಪನೆ
ಅಪೂರ್ವ,ಸರ್.ಎಂ.ವಿ. ಮತ್ತು ಮಿರ್ಜಾರ ಕನಸು.
ನನಸಾಗಿ ನೋಡಲು ಬರುತ್ತಿದೆ ಜನಸಾಗರ.
ಅಂದು-ಇಂದು:
ಅಂದು ಸರ್.ಎಂ.ವಿ.ರವರು ಸೂಕ್ಷ್ಮಗ್ರಹಣ
ಶಕ್ತಿಯಿಂದ ಉಳಿಸಿದರು ಸಾವಿರಾರು ಜನರ ಬದುಕನ್ನು
ಇಂದು ವಿಕೃತ ಮನಸ್ಸಿನವರು ತಮ್ಮ ದುಷ್ಟ
ಶಕ್ತಿಗಳಿಂದ ಕಳೆಯುತ್ತಿದ್ದಾರೆ ಸಾವಿರಾರು ಜನರ ಜೀವಗಳನ್ನು.
ಕಾಯಕ:
ಬತ್ತಿ ತೈಲದ ಬಂಧ ಕಡಿದುಕೊಳ್ಳುವವರೆಗೂ
ಹಣತೆ ಉರಿಸಿಕೊಳ್ಳುತ್ತಲೇ ಇರುವಂತೆ
ಕಾಯಕವೇ ಕ್ಯಲಾಸವೆಂದು ಅರಿತು ನಡೆದರು
ಜೀವಿತದ ಬಂಧ ಕಡಿದುಕೊಳ್ಳುವವರೆಗೂ
ಮಹಾನುಭಾವ ಸರ್.ಎಂ.ವಿ ರವರು.
-ಬಿ.ಆರ್.ನಾಗರತ್ನ. ಮೈಸೂರು.
ಸುಂದರವಾಗಿದೆ. ಒಬ್ಬ ಮೇರು ವ್ಯಕ್ತಿತ್ವದ ವ್ಯಕ್ತಿಯ ಬಗೆಗಿನ ಚಿತ್ರಣ ಕವಿತೆಯ ರೂಪದಲ್ಲಿ. ನೈಸ್
ಹನಿಗವನಗಳು ಸೊಗಸಾಗಿವೆ.
ಸೊಗಸಾದ ಸಕಾಲಿಕ ಹನಿಗವನಗಳು.
ಮೇರು ವ್ಯಕ್ತಿತ್ವದ ಸರ್.ಎಂ..ವಿ, ಅವರ ಅಗಾಧ ಪ್ರತಿಭೆಯ ಸಂಕ್ಷಿಪ್ತ ಚಿತ್ರಣ. ಸೊಗಸಾಗಿದೆ. ಅಭಿನಂದನೆಗಳು.
ನನ್ನ ಬರಹಕ್ಕೆ ತಮ್ಮ ಅಭಿಪ್ರಾಯ ತಿಳಿಸಿ ಪ್ರೋತ್ಸಾಹಿಸಿ ದ ಎಲ್ಲರಿಗೂ ಧನ್ಯವಾದಗಳು.