ನಡೆದ ದಾರಿ

ಬಾಲ್ಯದ ಆಟ ,ಹುಡುಗಾಟ ,
ಹಕ್ಕಿಯಂತೆ ಬಾನಗಲ ಸ್ವಚ್ಛಂದ ಹಾರಾಟ ,
ಅರ್ಥವಾಗುವ ಮುನ್ನವೇ ಇಲ್ಲಿನ ಪಾಠ ,
ಬದುಕು ಹೊಸ ತಿರುವು ಪಡೆದಿತ್ತು

ಮುಂದಿತ್ತು ಯೌವನದ ಹೊಸ್ತಿಲು ,
ಅಲ್ಲೋ ನೂರಾರು ಕವಲು,
ಗೊಂದಲಗಳು ದೂರವಾಗಿ ಬೆಳಗುವ ಹೊತ್ತಿಗೆ
ಸಾಗೋ ಹಾದಿಯಲ್ಲಿ ಕಂದೀಲು
ಬದುಕು ಹೊಸ ತಿರುವು ಪಡೆದಿತ್ತು

ಚಾಚಿದ್ದ ಸ್ನೇಹ ಹಸ್ತಗಳು ಹಲವಾರು ,
ಸಿಂಗರಿಸಿದ ಅನುಭವ ಬದುಕೆಂಬ ಬಣ್ಣದ ತೇರು,
ಅರಿಯುವ ಮೊದಲೇ ಭಾವನೆಗಳ ನವಿರು,
ಬದುಕು ಹೊಸ ತಿರುವು ಪಡೆದಿತ್ತು

ಕಾದಿತ್ತು ಹೊಸ ಹಾದಿಯ ತೋರುತ್ತಾ ಜೀವನ ,
ಇಲ್ಲಿತ್ತು ಹೃದಯಗಳ ಬೆಸುಗೆ,  ಮನಸ್ಸುಗಳ ಬಂಧನ,
ಗಾಢವಾಗಿ ಹಬ್ಬುವ ವೇಳೆಗೆ ಈ ಬಣ್ಣ ,
ಬದುಕು ಹೊಸ ತಿರುವು ಪಡೆದಿತ್ತು

ಅನಿರೀಕ್ಷಿತಗಳ ಸರಮಾಲೆ ಈ ಬದುಕು ,
ಸರಿದ ಕಾಲವಿಲ್ಲಿ ಬರೀ ನೆನಪು,
ಪ್ರತಿ ಆಯಾಮವ ಮನಬಿಚ್ಚಿ ಸ್ವೀಕರಿಸಿದಾಗಲೇ  ಹಬ್ಬುವುದಿಲ್ಲಿ ಕಂಪು,
ನಗು ನಗುತ್ತಾ ಅನುಭವಿಸು ಮನವೆ ಪ್ರತಿ ಕ್ಷಣವ ನೀ ಇಲ್ಲಿ
ಬದುಕು ಪಡೆಯುವ ಮುನ್ನವೇ ಮತ್ತೊಂದು ಹೊಸ ತಿರುವು