ಸ್ವಪ್ನದ ಸುಪ್ತ ಕನವರಿಕೆ

ಮಬ್ಬು ಕತ್ತಲಿನಲಿ ಎದ್ದು
ಹುಡುಕಾಡುವುದು ಜೀವ,
ನಿದ್ದೆ ಕಣ್ಣಿನಿಂದ ತಪ್ಪಿಸಿಕೊಂಡ
ಸ್ವಪ್ನವು ಅದೆಲ್ಲಿ  ಹೋಯಿತು
ಈಗಲೀಗ..?!
.
ಅನುಗಾಲದ ಒಲವನು ಧಾರೆ
ಎರೆಯುವ ಮಾತುಗಳನಾಡುತ್ತಾ
ನಿಲ್ಲಿಸಿಕೊಳಬೇಕಿತ್ತು ಮತ್ತೊಂದರೆ
ಕ್ಷಣವಾದರೂ, ಬರಲಾರದಿರುವ
ಹುಸಿ ಶಂಕೆಯಾದರೂ ಕಾಡುತ್ತಿರಲಿಲ್ಲ
ಆಗಲೀಗ…
.
ಮಾಯಕದ ಸುಳಿಯಲೊಂದು ಕನಸು
ಮೋಡಿ ಹಾಕಿತ್ತು ಹೊರಗೆ ಕಾಣದಂತೆ,
ಮುಳುಗು ಹಾಕಿ ಮೇಲೆದ್ದಾಗ
ಚಕ್ರರತ್ನದ ಅಲೆಅಲೆಗಳೂ ತೇಲಿ
ದಡವ ಮುಟ್ಟುವಷ್ಟರಲ್ಲಿ
ಮಂಗಮಾಯ…
.
ಸಪನವೆಂದರೆ ಸೊಗಸು, ಕನಸೆಂದರೊಂದು
ಮೋಹ.. ಬಾಯಾರಿಕೆಯಲಿ ತುಟಿ
ಸವರಿಕೊಂಡ ಜೇನ ಹನಿಯಂತೆ,
ಒಡಲಾಳದ ದಾಹ ಹಾಗೇ
ಉಳಿದುಬಿಟ್ಟಂತಾಯಿತು ಕನಸು ಹಾರಿದಾಗ..
.
ನಾಳೆಯೂ ಬದುಕುವ ಆಸೆಯಲಿ
ಇಂದಿನ ಕನವರಿಕೆಗೆ ಉಸಿರು

ಹಂಚಿಕೊಳ್ಳುವಾಗ ಒಂದು ಕನಸಾದರೂ

ಖುಷಿಗೆ ಬೀಳಬೇಕಲ್ಲಾ..

.
ಏನೂ ಕಾರಣವಿರದೆ ಸ್ವಪ್ನವು

ಮರೆಯಾಗುವುದೆಂದರೇನು..!

ಒಲವನು ತುಂಬಿಕೊಡದೆ ಉದಾಸೀನ

ಮಾಡಿದೆನೆಂದು ವಿದಾಯ ಹೇಳಿತೆ..? ಅಥವಾ

ಕಾಯುವಿಕೆಯು ಮತ್ತೊಂದು ಸ್ವಪ್ನವೇ..!
.

-ವಸುಂಧರಾ ಕೆ ಎಂ., ಬೆಂಗಳೂರು