ಮೂಗಿಗೆ ಸವರಿದ ತುಪ್ಪ
ಮೈ.ನಂ. ನಾಗೇಶ
ಮೂಗಿಗೆ ಸವರಿದ ತುಪ್ಪ
ನಂಬಿ ನಡೆದವ ಬೆಪ್ಪ
ನಾಲಿಗೆಯೆತ್ತಿದರು ತುದಿಗೆ
ತಲುಪುವುದೆಲ್ಲೊ ಬದಿಗೆ ||
ನಂಬಿ ನಡೆದವ ಬೆಪ್ಪ
ನಾಲಿಗೆಯೆತ್ತಿದರು ತುದಿಗೆ
ತಲುಪುವುದೆಲ್ಲೊ ಬದಿಗೆ ||
ಹಚ್ಚಿದ ಹೊತ್ತು ಗಮಗಮ
ಹಚ್ಚಿದ್ದಷ್ಟಿಷ್ಟು ಕೊರಮ
ಗಡಿಗೆಯೆ ಬಂದಂತೇನು
ಖಾಲಿ ಮಡಿಕೆ ಕಾಣದಿನ್ನು ||
ಮಾತಲೆ ಆಕಾಶ ಮಂದಿ
ತೋರಿ ಬಿಡಿಗಾಸಲೆ ತುದಿ
ಮಾಡುವರೆಲ್ಲ ಮಾಯಾ
ಮಟಮಟ ಹಗಲೆ ದಾಯ ||
ನಿನ್ನೆಚ್ಚರದಲಿ ನೀನಿದ್ದರು
ಹುಚ್ಚರಾಗಿಸೊ ಖದೀಮರು
ಮಾಯಾಜಾಲ ಭ್ರಮೆಯಲಿ
ಜಾಣಗು ಬೇಸ್ತಿನ ಖಯಾಲಿ ||
ಬೆಣ್ಣೆ ತುಪ್ಪ ತಂದವರೆಲ್ಲ
ನಂಬಬೇಡ ಮನ ಸಖರಲ್ಲ
ಒಳಿತು ಕೆಡುಕು ವಿವೇಚನೆ
ನಿನ್ನದಿರಲಿ ಸಮಾಲೋಚನೆ ||
– ಮೈ.ನಂ. ನಾಗೇಶ
.
ಚೆನ್ನಾಗಿದೆ ತುಪ್ಪದ ಘಮ ಘಮ…
ಧನ್ಯವಾದಗಳು ನಯನಾ ಭಿಡೆಯವರೆ, ಬೆಣ್ಣೆ ಕಾಯಿಸಿದ ತುಪ್ಪವೆ ಇರಬೇಕು – ಅದಕ್ಕೆ ಘಮ ಘಮ ಹಿಡಿಸಿತೇನೊ 🙂 ಮೂಗಿಗೆ ಹಚ್ಚುವ ಕಿರುಗಾತ್ರವು ಕೂಡ ತುಟ್ಟಿಯದೆಂದು ಭಾವಿಸುವ ಜಗದಲ್ಲಿ, ಬರಿಯ ಘಮ ಘಮಕ್ಕೆ ಬೆರಗಾಗದೆ ತಂತಮ್ಮ ಎಚ್ಚರದಲ್ಲಿದ್ದರೆ ಒಳಿತು..!
ಮೂಗಿಗೆ ಸವರಿದ ತುಪ್ಪ
ನಿಜಕ್ಕೂ ಡೇಂಜರಪ್ಪ
ಅಯ್ಯಯ್ಯಯ್ಯಯಪ್ಪ.!
ಹುಶಾರಾಗಿರಬೇಕಪ್ಪ.!!
ಧನ್ಯವಾದಗಳು ಭಾವನ ದಾಮ್ಲೆಯವರೆ 🙂
ಬಲು ಡೇಂಜರೇನೊ ನಿಜ
ಬಲಿಪಶುವಾದರೆ ಸಜಾ
ಕಣ್ಮುಚ್ಚಿ ಕುಡಿಯದೆ ಹಾಲು
ಚತುರ ಬೆಕ್ಕಾಗುವುದೆ ಮೇಲು !
ಚೆನ್ನಾಗಿದೆ ನಿಮ್ಮ ಕವನಗಳ ಸಾಲು..
ಎಂದು ಹೇಳಲು ನಾನು ಪಡೆಯಲೇ ಪಾಲು…
ಸ್ನೇಹಾರವರೆ,
ಪಾಲುದಾರಿಕೆಗೆ ಹೃತ್ಪೂರ್ವಕ ನಮನ
ನುಡಿದ ಪರಿಗೆ – ಮೂಕ ವಿಸ್ಮಿತ ಮನ ! 🙂
ನಿಜ ಎಚ್ಚರವಿರಬೇಕು
ಮೈ ಎಲ್ಲಾ
ಎಚ್ಚರವಿರಬೇಕು
ಚೆನ್ನಾಗಿದೆ ಎಚ್ಚರಿಸೋ ಕವಿತೆ
ಬೆಳ್ಳಾಲ ಗೋಪಿನಾಥ ರಾವ್ ರವರೆ ನಮಸ್ಕಾರ ಮತ್ತು ಪ್ರತಿಕ್ರಿಯೆಗೆ ಧನ್ಯವಾದಗಳು. ಎಚ್ಚರವಿದ್ದರೂ ಏಮಾರಿಸುವ ಜಗವಿದು. ಹೀಗಾಗಿ ಬೇಸ್ತು ಬೀಳುವುದಕಿಂತ ಆದಷ್ಟು ಎಚ್ಚರವಿರುವುದೆ ಜಾಣತನ 🙂