ಅಧಿಕವೆಂದರೆ ಬಿಂದು
ಅಧಿಕವೆಂದರೆ ಸಿಂಧು
ಅಧಿಕವೆಂದರೆ ಕೂಡಿ
ಕಳೆಯದಾದಿ ಗೋವಿಂದ ||
ಅತ್ತಿತ್ತು ಹನ್ನೊಂದು
ಇತ್ತಿತ್ತು ಏಳೆಣಿಸೆ
ಕೂಡೆ ಹದಿನೆಂಟಿತ್ತು
ಆದ ಗೋವಿಂದನಧಿಕ ||
ಕೂಡಿ ಒಂದಾಗಿಲ್ಲ
ಕಳೆದು ಮಣ್ಣಾಗಿಲ್ಲ
ಕಡೆಯನಕ ಗೋವಿಂದ
ಅಧಿಕಾದಿ ಗೋವಿಂದ ||
ಗಿರಿಯ ಕೊನೆಯಲೊಬ್ಬ
ನದಿಯ ತಟದಲೊಬ್ಬ
ಇಟ್ಟಿಗೆಯ ಮೇಲಿಹನು
ಅಧಿಕ ಶೂನ್ಯ ಗೋವಿಂದ ||
ಕವನವೆಂದರಭಂಗ
ಭುವನ ಭಾಗ್ಯವದಯ್ಯ
ಬನ್ನಿ ಹೆಜ್ಜೆಯನೆತ್ತಿ
ಎಡೆಯಧಿಕ ಗೋವಿಂದ ||
ಹೆಜ್ಜೆಯೆತ್ತಿದ ಕ್ಷಣವೆ
ಗೋವಿಂದ ಅಡಿಯಾಳು
ಎತ್ತಿಕೊಳುವ ನಮ್ಮ
ಹೆಜ್ಜೆಯಧಿಕ ಗೋವಿಂದ ||
ಹೆಜ್ಜೆ ಹೆಜ್ಜೆಗೆ ಹೇಳಿರಿ
ಇಲ್ಲಿಲ್ಲ ಆಯಾಸ
ಇಲ್ಲಿಲ್ಲ ಹಸಿವಿನಿತು
ಕರುಣೆಯಧಿಕ ಗೋವಿಂದ ||
ಕಾದು ನಿಂತಿಹ ಗುಡ್ಡ
ದೊಡೆಯ ಕರುಣಿಸಲೆಂದು
ಹೆಜ್ಜೆ ಒಜ್ಜೆಯು ಅಲ್ಲ
ಕೊನೆಯಧಿಕ ಗೋವಿಂದ
-ಗಜಾನನ ಈಶ್ವರ ಹೆಗಡೆ, ಮೈಸೂರು
ತುಂಬಾ.. ಅರ್ಥ ಪೂರ್ಣ ವಾದ ಕವನಕೊಟ್ಟಿದಕ್ಕೆ..
ಅದನ್ನು ಓದಿ…ನಮ್ಮ ಸಂತಸ ಅಧಿಕ ವಾಯಿತು ಸಾರ್.
ಸರಳ, ಸುಂದರ ಅರ್ಥಪೂರ್ಣ ಕವಿತೆ ಚೆನ್ನಾಗಿದೆ.
ಚಂದದ ಕವನ