ಜೀವನ ಸಂತೆ

ಸಂಬಂಧಗಳ ಸಂತೆಯಲ್ಲಿ ಒಬ್ಬಂಟಿ ನಾನು
ನಿಸ್ವಾರ್ಥ ಪ್ರೇಮವ ಮಾರಲು ಬಂದವನು

ಶ್ರೀಮಂತ ವ್ಯಾಪಾರಿಗಳ ತಳುಕು ಬಳುಕಿನ ಸರಕಲ್ಲಿ ಎನ್ನ ವ್ಯಾಪಾರವ ಕಳೆದುಕೊಂಡವನು
ಬಣ್ಣದ ಮಾತುಗಳ ಭರದಲ್ಲಿ ತನ್ನ ಮೌಲ್ಯವ ಕುಗ್ಗಿಸಿಕೊಂಡವನು

ಹಣ ಅಂತಸ್ತಿನ ಸಂಬಂಧಗಳೇ ಈ ಸಂತೆಯಲಿ‌ ಜೋರು ಮಾರಾಟವಾಗುವವು
ಅಧಿಕಾರ ದರ್ಪಗಳ ಅಂಗಡಿ ಮುಂದೆ ಸಾಲುಗಳೇ ತೋರುತಿಹವು

ಮೊದಲು ತೋರಿದ ಕಾಳಜಿ ಪ್ರೀತಿಗೆ ಈಗ ಬೆಲೆಯಿಲ್ಲ
ಆರ್ಥಿಕ ಹರಿವು ನಿಂತ ಮೇಲೆ ಎಲ್ಲಾ ಮರೆತು ಹೋಗಿದೆಯಲ್ಲಾ

ಬರೀ ಲಾಭದ ಲೆಕ್ಕಾಚಾರದಲಿ ಈ ಲೋಕ ಮುಳುಗಿದೆಯೆಲ್ಲಾ
ಕರಗದ ಬಾಂಧವ್ಯದ ಕಡೆ ಯಾರು ತಿರುಗಿ ನೋಡುವರಿಲ್ಲ

ಆಡಂಬರದ ವೈಭವ ಒಂದಲ್ಲ ಒಂದು ದಿನ ಕಳೆಗುಂದುವುದು
ನಿರ್ವಾಜ್ಯ ಒಲವು ಕೆನೆಯಂತೆ ಮೇಲೆ ತೇಲುವುದು

ಆ ವಿಧಾತನ ಕೈಯಲ್ಲಿ ಕಷ್ಟವೆಂಬ ಕಡೆಗೋಲಿದೆ
ಕಡೆದಂತೆ ಈ ಹುಳಿಯಾದ ನಂಟುಗಳು ಬೆಣ್ಣೆಯಾಗುವ ಕಾಲ ಬಂದಿದೆ…..

ಮಾನುಷ ಸಂಬಂಧಗಳಿಗೆ ಹಾತೊರೆಯುವುದ ನಿಲ್ಲಿಸಿ
ಭಗವಂತನ ಸಾಕ್ಷಾತ್ಕಾರಕ್ಕಾಗಿ ಹಂಬಲಿಸುವ ಮನ ರೂಪಗೊಂಡಿದೆ…..

ಬರೀ ಭಕ್ತಿ ಬಯಸುವ ದೈವದ ಮುಂದೆ ಶರಣಾಗತಿಯ ಭಾವ ತುಂಬಿದೆ…..

-ಕೆ.ಎಂ ಶರಣಬಸವೇಶ