ಕಳೆದವಾರ ತರಗತಿಯಲಿ ಕಿರುಪರೀಕ್ಷೆ ನಡೆದಿತ್ತು
ಜಂಗಮವಾಣಿಯಲ್ಲಿ ಬಂದ ಅಂಕಗಳ ಸಂದೇಶವಿಂದು ಮನೆಯಲಿ ಬಿರುಗಾಳಿ ಸೃಷ್ಟಿಸಿತ್ತು
ಮುನಿದ ಅಮ್ಮ ತಟ್ಟೆ ಪಾತ್ರೆಗಳ ಸಾಂಕೇತಿಕ ಭಾಷೆಯಲಿ ಮಾತನಾಡಿದರು
ನನ್ನ ಮೇಲಿನ ಆಕ್ರೋಶವ ಬರೀ ಉಪ್ಪಿಟ್ಟು ಮಾಡಿ ತೀರಿಸಿಕೊಂಡರು
ಸದಾ ಓದಿನಲಿ ಮುಂದಿರುವ ತಂಗಿ ಮುಸಿ ಮುಸಿ ನಗುತಾ
ತಾನು ಗಳಿಸಿದ ಅಂಕಗಳ ಮೂರು ಬಾರಿ ಕೂಗಿ ಹೇಳಿದಳು
ನಾ ಗಳಿಸಿದ ಸಂಖ್ಯೆಗಳ ಕಂಡು ಅಪ್ಪ ಗಂಭೀರವದನದವರಾದರು
ಹಾಗೇ ಕೂತ ಅವರಲ್ಲಿ ತತ್ವಜ್ಞಾನಿ ಜನಿಸಿ ಬಂದರು
ಅವರ ಇತಿಹಾಸ ಅವರು ಪಟ್ಟ ಕಷ್ಟ ಅವರ ಸಾಧನೆ ಬಗ್ಗೆ
ನೂರ ಒಂದನೆಯ ಬಾರಿ ಕೇಳುವ ಕಠೋರ ಶಿಕ್ಷೆ ವಿಧಿಸಿದರು
ನನಗೇನೋ ಒಳ್ಳೆಯ ಅಂಕ ಗಳಿಸುವಾಸೆ
ಹಾಳಾದ್ದು ಕಾಡುವ ನಿದ್ರೆ ಅಡ್ಡಗಾಲಾಗಿದೆ
ಯಾವ ಮಾಯದಲ್ಲಿ ಮೈಯನ್ನಾವರಿಸಿ ತಲೆ ತೂಗುವಂತೆ ಮಾಡಿದೆ
ಆಗಾಗ ಶಿಕ್ಷಕರ ಅಬ್ಬರಕೆ ಎಚ್ಚರವಾದರೂ
ಆಗಲೇ ಕಳೆದುಕೊಂಡ ಪಾಠ ಎನ್ನ ಅನಾಥನನ್ನಾಗಿಸಿದೆ
ಕಂಡ ಪ್ರಕೃತಿಯ ಸೊಬಗ ಓರೆಕೋರೆಯ ರೇಖೆಗಳಲಿ ಸುಲಭವಾಗಿ ಚಿತ್ರಿಸುವೆ
ನನ್ನದೇ ಸ್ವಭಾವದ ಪಡಿಯಚ್ಚಾದ ನನ್ನ ಗೆಳೆಯ ಅಭಿನಯದಲಿ ಮುಂದಿರುವ
ಇನ್ನೊಬ್ಬ ತುಸು ಕಡಿಮೆ ಅಂಕಗಳಿಸಿದರೂ ಚರ್ಚೆಯಲಿ ಎಲ್ಲರನು ಮೀರಿಸುವ
ಮತ್ತೊಬ್ಬ ಜ್ಞಾನವನು ಅಕ್ಷರಕ್ಕಿಳಿಸಿ ಆಕರ್ಷಕ ಪ್ರಬಂಧ ಬರೆಯುವ
ಬೇಯಿಸದೆ ರುಚಿಕರ ಖಾದ್ಯಗಳ ತಯಾರಿಸುವ ಕೌಶಲ್ಯ ಒಬ್ಬರಿಗಿದ್ದರೆ
ಭಾವ ಭಕ್ತಿ ಜನಪದ ಗೀತೆಗಳ ಹಾಡುವ ಕಲೆ ಮತ್ತೊಬ್ಬರಿಗೆ
ನಮ್ಮೆಲ್ಲಾ ಪ್ರತಿಭೆಗಳ ಹೊರಗಿಡುವ ಸ್ಪರ್ಧೆಗಳು ಬಂದವು ನೋಡಿ
ನಾವು ಯಾರು ಎಂದು ತೋರಿಸುವ ಕಾಲ ಬಂತು ಬೇಡಿ
ಮುನಿದ ಅಮ್ಮ ಗೋಭಿ ಮಾಡುವಷ್ಟು ತಣ್ಣಗಾದರು
ಪುಸ್ತಕದ ತಂಗಿ ಹುಳು ಸಾಧನೆ ಕಂಡು ಮೂಲೆ ಸೇರಿತು
ಗಂಭೀರತೆಯ ಬಿಟ್ಟ ಅಪ್ಪ ಚಿಕ್ಕ ಮಗುವಿನಂತೆ ಕುಣಿದಾಡಿದರು
ಆಯ್ಕೆ ಮಾಡಿಕೊಳ್ಳುವ ಬದುಕ ನಮ್ಮ ಪ್ರತಿಭೆಗೆ ತಕ್ಕಂತೆ
ಅವಕಾಶಗಳುಂಟು ಎಲ್ಲರಿಗೂ ಈ ಬಾಳ ಜಗದಲಿ
ಸಾಗಿಸಲುಂಟು ನೆಮ್ಮದಿಯ ಜೀವನ ನಗುಮೊಗದಲಿ
– ಕೆ.ಎಂ ಶರಣಬಸವೇಶ
ಹಿರಿಯರಾದ ನಾವು ಕೊಡೋಣ ಪ್ರತಿಭೆಗಳಿಗೆ ಅವಕಾಶವನ್ನು
ಅರ್ಥಗರ್ಭಿತವಾದ ಕವನ
ಹೌದು ಮೇಡಂ ನಮ್ಮಲ್ಲಿ ಬದಲಾವಣೆ ಆಗಬೇಕು…
ಅರ್ಥಪೂರ್ಣ ಕವನ. ಬದುಕು ಕೇವಲ ಅಂಕಗಳ ಮೇಲೆ ನಿಂತಿಲ್ಲ, ಹಲವಾರು ದಾರಿಗಳಿವೆ ಇಲ್ಲಿ ಸಾಗಲು.
ಧನ್ಯವಾದಗಳು ನಯನ ಮೇಡಂ
ನಮ್ಮ ಆಸಕ್ತಿ ಆಕಾಂಕ್ಷೆ ಗಳನ್ನು ಮಕ್ಕಳ ಮೇಲೆ ಹೇರಬಾರದು ಎಂಬ ಸಂದೇಶ ಜೊತೆಗೆ ಅವರು ತಮ್ಮ ಪ್ರತಿಭೆ ಯನ್ನು ತೋರಿದಾಗ ಬೆನ್ನು ತಟ್ಟಿ ಪ್ರೋತ್ಸಾಹ ನೀಡಬೇಕೆಂಬ ಸಂದೇಶ ಒಳಗೊಂಡ ಕವನ ಮುದಕೊಟ್ಟಿತು.ಧನ್ಯವಾದಗಳು ಸಾರ್
ಧನ್ಯವಾದಗಳು ನಾಗರತ್ನ ಮೇಡಂ
ಭಾರತೀಯರ ಮನಸ್ಥಿತಿ ಕಷ್ಟಪಟ್ಟು ಕೆಲಸ ಮಾಡು, ಅಮೆರಿಕಾದವರ ಮನಸ್ಥಿತಿ ಇಷ್ಟಪಟ್ಟು ಕೆಲಸ ಮಾಡು, ಆದರೆ ಜಪಾನಿಯರ ಮನಸ್ಥಿತಿ ಪ್ರೀತಿಯಿಂದ ಕೆಲಸ ಮಾಡು. ಯಾವ ಕ್ಷೇತ್ರದಲ್ಲಿ ನಮ್ಮನ್ನು ನಾವು ತೊಡಗಿಸಿಕೊಂಡರೆ ಆ ಕೆಲಸವನ್ನು ಪ್ರೀತಿಸಲು ಸಾಧ್ಯವೂ ಆಗ ಉನ್ನತಿ ಕಟ್ಟಿಟ್ಟ ಬುತ್ತಿ ಎಂಬುದಕ್ಕೆ ಈ ಕವನ ಪೂರಕವಾಗಿದೆ
ಕವನದ ತಿರುಳನ್ನು ಬಹಳ ಸೊಗಸಾಗಿ ಕೆಲವೇ ಕೆಲವು ಸಾಲುಗಳಲ್ಲಿ ಹೇಳಿದ್ದೀರಾ….ನಿಮ್ಮ ಮಾತು ನೂರಕ್ಕೆ ನೂರರಷ್ಟು ಸತ್ಯ. ಧನ್ಯವಾದಗಳು ಅರುಣಾ ಮೇಡಂ
ತುಂಬಾ ಚೆನ್ನಾಗಿ ಮೂಡಿ ಬಂದಿದೆ ನೀನು ಪಡುತ್ತಿದ್ದ ಕಷ್ಟ ನೆನಪಾಯಿತು ಹಾಗೂ ನಿನ್ನ ಸಾಧನೆಗೆ ಅಭಿನಂದನೆಗಳು
ನಿನ್ನದು ಸಹಾ ಹೋರಾಟದಿಂದ ಕಟ್ಟಿಕೊಂಡ ಬದುಕು. ಎಷ್ಟು ಆಸಕ್ತಿ ನೀನು ಮಾಡುವ ಕೆಲಸದಲ್ಲಿ ಅದೇ ನಿನ್ನನ್ನು ಕಾಪಾಡುತ್ತಿದೆ. ಧನ್ಯವಾದಗಳು ಭಾವಜೀವಿ ನಿರಂಜನ ಮೂರ್ತಿಗಳಿಗೆ
ಅರ್ಥವತ್ತಾದ ಕವನ.
ಧನ್ಯವಾದಗಳು ಹೇಮಾ ಮೇಡಂ
ಪ್ರತಿಯೊಬ್ಬರಲ್ಲೂ ಇರುವ ಪ್ರತ್ಯೇಕ ಪ್ರತಿಭೆಗಳನ್ನು ಗುರುತಿಸುವದು ಅತ್ಯವಶ್ಯ… ಮನಮುಟ್ಟಿತು ಕವನ…ಧನ್ಯವಾದಗಳು.
ಇವತ್ತಿನ ಸಂದರ್ಭದಲ್ಲಿ ಪ್ರಸ್ತುತ ಕವಿತೆ. ಅದ್ಭತವಾಗಿದೆ… ಅಲ್ಲಲ್ಲಿ ಆಶಾ ಕಿರಣಗಳು ಕಂಡರೂ ಈ ದಿಸೆಯಲ್ಲಿ ಆಗಬೇಕಾದ ಬದಲಾವಣೆ ಬಹಳವೇ ಇದೆ.