ಬಾಳ ಪಯಣ

ಜೀವನವೊಂದು ಯಾನ
ಸಾಗಿಹುದು ಬದುಕ ಪ್ರಯಾಣ
ಸಾಕಾಗಲಿ ಬೇಕಾಗಲಿ ನಿಲ್ಲದು
ನಿತ್ಯ ನಿರಂತರ ನಡೆವುದು||

ಕಷ್ಟ ಸುಖಗಳ ಜೊತೆಗೆ
ಹೆಗಲೇರಿದ ಹೊಣೆಯು ನಡಿಗೆಗೆ
ಹಳತು ಮರೆತು ಹೊಸತು ಹುಡುಕುತ
ಹೊರಳು ಹಾದಿಯಲಿ ಸಂಚಾರ ಶಾಶ್ವತ||

ನೆನಪ ಬೆಟ್ಟ ಗುಡ್ಡಗಳ ಹಿಂದಿಕ್ಕುತ
ಆಸೆ ಅಂಬರವ ಕಣ್ ತುಂಬುತ
ಆಕಸ್ಮಿಕ ತಿರುವುಗಳ ಎದುರಿಸಿ
ಮುನ್ನುಗ್ಗಿದೆ ಪಯಣ ಗುರಿಯ ಅರಸಿ||

ಒಂಟಿಯಾದರು ಸಾಗಬೇಕಿದೆ
ಎಲ್ಲ ಅಡೆತಡೆಗಳ ದಾಟಿ ಮುಂದೆ
ಕಾಡೊ ಕನಸ ನನಸಾಗಿಸಲು
ಇಂದು ಎಂದೂ ಪ್ರತಿ ಗಳಿಗೆಯಲು||

ಬಾಳ ಪಯಣ ಬದುಕೊವರೆಗೂ
ದಾರಿ ಇರುವುದು ಗುರಿಯವರೆಗೂ
ನಡೆಯುತಿರುವುದು ನಿತ್ಯ ನೂತನ
ಹಲವು ತಿರುವಿನೊಳೊಂದು ಜೀವನ||

– ಪ್ರತಿಭಾ ಪ್ರಶಾಂತ, ಬೆಂಗಳೂರು