ಒಂದು ಮರದಿಂದ ಕಲಿಯಬೇಕಿದೆ….

ಕತ್ತಲೆಯ ಗರ್ಭದಲ್ಲಿ ಹುಗಿದು
ಹಾಕಿದರೂ, ಕಾದು ಕಾದು
ಸಮಯಕ್ಕೆ ಸರಿಯಾಗಿ ಮೇಲೆದ್ದು
ಬರುವ  ಬಗೆಯನು….
,
ಕಡಿಯುವ, ಕತ್ತಿ ಸವರುವ ಮಂದಿ
ಪಕ್ಕದಲ್ಲಿದ್ದರೂ; ತಂಪು ಗಾಳಿ
ತೂಗಿಕೊಂಡು, ಹಕ್ಕಿ ಅಳಿಲುಗಳ
ಬಳಿಗೆ ಕರೆಯುವ ಒಲವನು….
.
‘ಕಳೆ’ಯ ಗೆಳೆತನದೊಡನೆ ಕಳೆಯದೇ
ಬಾಳಲು; ಮೇಯಲು ಬರುವ
ಪಶುಗಳ ಸಾಲುಸಾಲಿನ ನಡುವೆ ಅಡಗಿ-
ಕಾಲಡಿ ಸಿಲುಕಿ ನಡುಗದೇ,
ಗುಡುಗಿ, ಗಟ್ಟಿಯಾಗಲು….
.
ಕಾಲಕಾಲಕ್ಕೆ  ನೀರ ಹನಿಸುತ್ತಿದ್ದವರು
ಕಾಣೆಯಾದರೂ, ಮುಗಿಲ ಕಂಬನಿಯನೇ
ಕುಡಿದು ಮೊಗ್ಗು ಅರಳಿಸಿ, ಕಾಯಿ
ಕಚ್ಚಿ , ಹಣ್ಣಾಗುವ ಬೆಡಗನು….
.
ಬಿರುಗಾಳಿ-ಬಿರುಮಳೆಯೆಂಬುದೆಲ್ಲಾ
ಒಂದು ಸಹಜ ರೂಢಿಯೆಂದುಕೊಂಡು,
ಋತು ಪ್ರವಾಹದಲಿ ತೇಲಿ-
ಸಾಗಿ ಮಾಗುವ ಬಗೆಯನು ಒಂದು
ಮರದಿಂದ ಕಲಿಯಬೇಕಿದೆ..

ಒಂದು ಮರದಿಂದಲೇ
ಕಲಿಯಬೇಕು ಇದನು..
ಎತ್ತರ ಬೆಳೆದೂ ಆಳದಲಿ ಬೇರಿನ
ಅಸ್ತಿತ್ವ ಉಳಿಸಿಕೊಂಡು ಮೌನದಲಿ
ಧ್ಯಾನಸ್ಥವಾಗುವ  ಸ್ಥಿತಿಯನು..

-ವಸುಂಧರಾ ಕೆ. ಎಂ., ಬೆಂಗಳೂರು