ಪ್ರಿಯದರ್ಶಿನಿ

ಸಾಗಬೇಕೆಂದರೂ ನಿನ್ನ ಸ್ನೇಹಕ್ಕೆ ಮುಖ ತಿರುವಿ ,
ಬಿಡದೆ ಸೆಳೆಯುವೆಯಲ್ಲ  ಮಾಯಾವಿ?,
ನೀ ತೋರಿದ ಸ್ನೇಹದ ಸವಿ ,
ಮಾಡಿಹುದಿಂದು ಈ ಹೃದಯವ ಕವಿ .

ಬೀಸಿ ಸುಂದರ ನಗುವಿನ ಮಾಯಾಜಾಲ,
ಏಕೆ ಸೆಳೆದೆ ನೀ ಹೀಗೆ ಮೆಲ್ಲ ?,
ಕಣ್ಗಳೊ ಪ್ರೀತಿಯಿಂದಾವೃತ ಕೊಳ ,
ಬಂಧಿಸಿಹುದು ಅರಿವಾಗುವ ಮುನ್ನವೇ ತೊಡಿಸಿ ಕಾಣದ ಕೋಳ.

ಹೂ ಮನದ ಸಹೃದಯ ಗೆಳತಿ ,
ಬಲು ಇಷ್ಟ ನಿನ್ನ ಜೀವನ ಪ್ರೀತಿ ,
ಬದುಕು ಹೋರಾಟವೆಂಬಂತೆ  ನೀ ಸಾಗೋ ರೀತಿ ,
ತುಂಬುವುದು ನನ್ನಲ್ಲೂ ಛಲ ಹೊಡೆದೋಡಿಸಿ ಮನದಾಳದ ಭೀತಿ.

ಅರೆ ಬಿರಿದ ತುಟಿಗಳ ನಡುವೆ ಅರಳಿರೋ ನಗು , ತಂಗಾಳಿ ,
ನೂರಾರು ಭಾವ ಅವಿತಿರೋ ಅನುಭವ ಕಣ್ಣಲ್ಲಿ,
ಹಿಡಿದಿಡಲಿ ನಿನ್ನ ನಾ ಇನ್ನಾವ ಪದಗಳಲ್ಲಿ ?,
ಬಿಡಿಸಿರುವೆ ಈ ಹೃದಯದ ತುಂಬಾ ಬಣ್ಣದ ರಂಗೋಲಿ ,
ಕಾಣದ ಒಲವೆಂಬ ಕೈಗಳಲ್ಲಿ.

– ನಯನ ಬಜಕೂಡ್ಲು

+8