ಬದುಕುತ್ತೇನೆ ನಾನು..

ನೀರು ತುಂಬಿದಾಗ ಕೆಸರು,
ಬರಬಡಿದಾಗ ಗೋಡು.
ಆಗುವುದೆಲ್ಲವೂ ಹಣೆಬರಹವೆ..
ಬದುಕುತ್ತೇನೆ ನಾನು      |1|
ಬದುಕನ್ನು ಅರಿತುಕೊಳ್ಳಲು.

ಚಳಿ ಮಳೆ ಬಿಸಿಲಿಗೆ ತೋಯ್ದು,
ಒಣಗಿ ನನ್ನ ನಾ ಒಡ್ಡಿಕೊಳುತ್ತೇನೆ.
ನಾನು ಏನಾಗಬೇಕೋ ನಾನೆ ನಿರ್ಣಯಿಸುತ್ತೇನೆ.
ಬದುಕುತ್ತೇನೆ ನಾನು      |2|
ಬದುಕನ್ನು ಬದುಕುತ್ತಲೇ ಹೋಗುತ್ತೇನೆ.

ಮಿಶ್ರಣದಲಿ ಹದವಾಗಿ ಬೆರೆತು,
ಅಚ್ಚಿನಲಿ ಅಚ್ಚಾಗಿ ಅರಳುತ್ತೇನೆ.
ನಾಳೆ ನನಗಾಗಿಯೇ ಬರಲಿದೆ.
ಬದುಕುತ್ತೇನೆ ನಾನು |3|
ಬದುಕಿನ ನಾಳೆಗಾಗಿ ಕಾಯುತ್ತೇನೆ.

ಕಠೋರ ಶಾಖ ಚಿತೆಯಲಿ
ಸುಟ್ಟು ಕರಕಲಾದವುಗಳೆಷ್ಟೋ.
ಅಂತರಂಗದಲಿ ಕೆಂಡ ಕೌಸ್ತುಭವ ಧರಿಸದೇ ಚಿತೆ ಏರಬಾರದು.
ಸುಟ್ಟಿಸಿಕೊಂಡಮೇಲೆ ಗಟ್ಟಿ ಇಟ್ಟಿಗೆಯಾಗೋದು. |4|
ನಿಂತು ನೋಡೊ ಚಂದ ಸ್ಮಾರಕದ ಅಂಗವಾಗೋದು.

ಬದುಕುತ್ತೇನೆ ನಾನು ನನ್ಯಾಕೆ
ಬದುಕಬೇಕು ಎಂಬುದನ್ನು ಬದುಕಿ ತೋರಿಸಲು.
.

-ಶರತ್ ಪಿ.ಕೆ.

+27