ಕೃತಜ್ಞತಾ ಪೂರ್ವಕ ನಮನ

ಕಾಡುವ ಅನಾರೋಗ್ಯದ ನಡುವೆ ಕಣ್ಣೀರು ಸುರಿಸುತ್ತಾ
ಆ ಭಗವಂತನ ಕಡೆಗೆ ನೋಡುವೆ
ನನಗ್ಯಾಕೆ ಈ ಸ್ಥಿತಿ ತಂದಿರುವೆ ಎಂದಲ್ಲ
ಅದನ್ನು ಎದುರಿಸುವ ಶಕ್ತಿ ನೀಡಿದೆ ಎಂದು

ನಿಂತ ನೆಲವೇ ನಡುಗಿ ಭರವಸೆಯೇ ಉಡುಗಿ ಹೋಗಿ
ಕುಸಿದು ಕುಳಿತಾಗ ಆ ಭಗವಂತನ ಕಡೆಗೆ ನೋಡುವೆ
ನನ್ನ ನೆಮ್ಮದಿ ಯಾಕೆ ಕಸಿದುಕೊಂಡೇ ಎಂದಲ್ಲ
ಇಂತಹ ಪರಿಸ್ಥಿತಿ ನಿಭಾಯಿಸುವ ಮನಸ್ಥಿತಿ
ಕೊಟ್ಟೆ ಎಂದು

ಅವಕಾಶಗಳೇ ಮುಚ್ಚಿ ಹೋಗಿ ಬೇರೆ ದಾರಿಯೇ ಸಿಗದಾದಾಗ
ಆ ಭಗವಂತನ ಕಡೆಗೆ ನೋಡುವೆ
ಲಭ್ಯ ಭಾಗ್ಯವ ದೂರ ಮಾಡಿದೆಯೆಂದಲ್ಲ
ಎಲ್ಲೋ ಒಂದು ಕಡೆ ಇದಕ್ಕಿಂತ ಒಳ್ಳೆಯ ವ್ಯವಸ್ಥೆ
ಕಲ್ಪಿಸುತ್ತಿರುವೆ ಎಂದು

ಒತ್ತಡದಲಿ ಮನ ಮುಳುಗಿ ಮಾಡಿದ್ದೆಲ್ಲಾ ವಿಫಲವಾಗುತ್ತಿರುವಾಗ
ಆ ಭಗವಂತನ ಕಡೆಗೆ ನೋಡುವೆ
ಯಾಕೀ ಪರೀಕ್ಷೆ ಮಾಡುತ್ತಿರುವೆ ಎಂದಲ್ಲ
ಮಾಡಿದ ಕೆಲಸಕ್ಕೆ ಕರಗದ ಅನುಭವ ನೀಡಿ ಗಟ್ಟಿ
ಮಾಡಿರುವೆ ಎಂದು

ಸ್ಪರ್ಧೆಯಲಿ ಓಡುತ್ತಾ ಎಡವಿ ಬಿದ್ದಾಗ ನಗುವ ಜನರ ಕಂಡು
ಆ ಭಗವಂತನ ಕಡೆಗೆ ನೋಡುವೆ
ನನಗ್ಯಾಕೆ ಈ ಅಪಹಾಸ್ಯ ಎಂದಲ್ಲ
ಬೀಳಿಸಿದರೂ ಒಳ್ಳೆಯ ಗುರಿ ಸೇರಿಸಿರುವೆ ಎಂದು

ಏನೇನು ಅಲ್ಲದ ನನಗೆ ಎಲ್ಲಾ ನೀನೇ ಕೊಟ್ಟಿರುವಾಗ
ನಿನ್ನನೇಕೆ ದೂಷಿಸಲಿ ಹೇ ಸರ್ವಶಕ್ತ
ನೀ ಇಟ್ಟಂತೆ ಇರುವೆ…..ನೀ ಇಟ್ಟಂತೆ ಇರುವೆ……
ನೀ ತೋರಿದ ದಾರಿಯಲ್ಲಿ ನಡೆವೇ…….ದಾರಿಯಲ್ಲಿ ನಡೆವೇ……

–ಶರಣಬಸವೇಶ ಕೆ. ಎಂ

+9