ಗುರು ಯಾರು !?

ಇಳೆಗೆ ಮಳೆಯೇ ಗುರು
ಮೇಲಾರು ಮೋಡದ ಚಿತ್ತಾರ ಬಿಡಿಸಿದವರು ?

ಬೆಳೆಗೆ ಹಸಿವೆಯೇ ಗುರು
ಕರುಳೊಳಗೆ ಕಿಚ್ಚು ಹಚ್ಚಿಸಿ ಉರಿಸುತಿರುವವರು ?

ಸೊಬಗಿಗೆ ಒಳಗಣ್ಣೇ ಗುರು
ಸೃಷ್ಟಿಯಲಿ ಮಾಧರ‍್ಯವನೇ ಉಣಿಸಿದವರು ?

ಕವಿತೆಗೆ ರಾಗವೇ ಗುರು
ಸ್ವರಲಯವ ಬೆಸೆದು ತನ್ಮಯವಾಗಿ ಹಾಡಿದವರು ?

ಬಾಳುವೆಗೆ ಬಯಕೆಯೇ ಗುರು
ಜೀವವೀಣೆಯ ತಂತಿ ಮೀಟುತ ನಾದವಾದವರು ?

ಕಾಯಕಕೆ ಕರುಣೆಯೇ ಗುರು
ಎದೆಯ ಹಣತೆಯಲಿ ದೀಪವಾಗಿ ಶಾಂತವಾದವರು

ಹರಿವ ನದಿಗೆ ಸಾಗರವೇ ಗುರು
ಎಂದೂ ನೋಡದ ಹಾದಿಗುಂಟ ಕಂಡರಿಸಿದವರು !

ಗಾಢನಿದ್ರೆಗೆ ಆಯಾಸವೇ ಗುರು
ಎಲ್ಲವ ಮರೆಸುತ ಮೊದಲಿನ ಚೈತನ್ಯವೂಡಿದವರು

ದಾನಗುಣಕೆ ಮಮತೆಯೇ ಗುರು
ಅಳಿಲು ಸೇವೆಯ ಸಾರ್ಥಕ್ಯ ಸವಿಯ ಬೆರೆಸಿದವರು

ಸೃಷ್ಟಿಲೀಲೆಗೆ ಮೋಹವೇ ಗುರು
ಎಲ್ಲಿಯೋ ಇದ್ದವರ ಬೆಸೆದು ಬೆರಸಾಡುವವರು !

ಸ್ನೇಹಸೊಗಕೆ ನಿರಾಳವೇ ಗುರು
ತರತಮಗಳ ಮೀರುವ ಕರುಳ ಕರೆಯಾದವರು

ಹಣ್ಣೆಲೆ ಉದುರಲು ಕಾಲವೇ ಗುರು
ಚಿಗುರೆಲೆ ನಳನಳಿಸಲು ಸರಿದು ದಾರಿಯಾದವರು

ಅಹಮಿನ ಪೊಗರಿಗೆ ಸೋಲೇ ಗುರು
ಬಕುತಿಯ ಏಣಿಯನು ಹತ್ತಿ ಇಳಿಯುತಿರುವವರು !!

-ಡಾ. ಹೆಚ್ ಎನ್ ಮಂಜುರಾಜ್, ಮೈಸೂರು