ನಿಲ್ಲದ ಹೋರಾಟ

ಸುತ್ತಲೂ ಕಾರ್ಗತ್ತಲೆ ತುಂಬಿರಲು
ಬೆಳಕನ್ನು ನುಂಗಿ ಅಂಧಕಾರ ಮೆರೆಯುತ್ತಿರಲು

ಭರವಸೆಯ ಕಿರಣಗಳೇ ಮರೆಯಾಗಿ ಕಾರ್ಮೋಡ ಕವಿದಿರಲು
ಗುಡುಗು ಮಿಂಚುಗಳ ನಡುವೆ ಸುಳಿಗಾಳಿ ಬೀಸುತಿರಲು

ಒಬ್ಬಂಟಿಯಾಗಿ ಈ ಕತ್ತಲೆ ದೂರಮಾಡಲು ಬೆಳಗುತಿರುವೆ
ನನ್ನ ನಾನು ಕರಗಿಸಿಕೊಂಡು ಉರಿಯುತ್ತಿರುವೆ

ಕಡು ಕತ್ತಲಿನ ಕೂಡ ಯುದ್ಧದಲ್ಲಿ ತೊಡಗಿಕೊಂಡಿರುವೆ
ಅತಿ ಸಣ್ಣ ಮೊಂಬತ್ತಿಯೆಂಬ ಕೀಳರಿಮೆ ಎನಗಿಲ್ಲ

ಈ ಕಾಳಗದಲ್ಲಿ ಪಾಲ್ಗೊಂಡ ತೃಪ್ತಿ ಎನಿಗಿದೆಯೆಲ್ಲಾ
ಬೀಸುವ ಗಾಳಿಗೆ ಹೊಯ್ದಾಡುತಾ ಈ ಬದುಕು
ಮುನ್ನಡೆದಿದೆಯೆಲ್ಲಾ

ಉರಿಯಲು ಸಹಾಯ ಮಾಡುವ ಈ ಗಾಳಿಯೇ ಜೋರಾದರೆ ಅದೇ ಸಂಚಕಾರ ಎಂಬ ಅರಿವು ಎನಗಿದೆ
ಸುತ್ತ ಚೆಲ್ಲಿದ ಹೊಂಬೆಳಕು ಎನ್ನ ಹೋರಾಟದ ಕುರುಹುವಾಗಿದೆ

ಕಟ್ಟಕಡೆಯ ಕಣವಿರುವವರೆಗೆ ಬೆಳಗುತಾ ಸಾಗುವುದೇ ಧರ್ಮವಾಗಿದೆ

– ಕೆ.ಎಂ ಶರಣಬಸವೇಶ