ಕಾಮನಬಿಲ್ಲು
ಕಾಮನ ಬಿಲ್ಲದು ಸಪ್ತ ವರ್ಣಗಳೆಂಬ ಬಣ್ಣ
ರಜಸ ತಮಸ್ ಸಾತ್ವಿಕ ಗುಣಗಳೆಂಬ ಬಣ್ಣ
.
ಭಕ್ತ ಮಹೇಶ್ವರ ಪ್ರಸಾದ ಪ್ರಾಣಲಿಂಗ
ಭಕ್ತ ಮಹೇಶ್ವರ ಪ್ರಸಾದ ಪ್ರಾಣಲಿಂಗ
ಶರಣ ಐಕ್ಯವೆನ್ನುವ ಷಟ್ಸಲಗಳೆಂಬ ಬಣ್ಣ
ಕಾಮ ಕ್ರೋಧ ಲೋಭ ಮೋಹ ಮದ
ಮತ್ಸರವೆಂಬ ಅರಿಷಡ್ವರ್ಗಗಳೆಂಬ ಬಣ್ಣ//
.
ಒಡಲೆಂಬ ಕಡಲಿನಲ್ಲಿ ನಾವಿಕನಲಿ
ಒಡಲೆಂಬ ಕಡಲಿನಲ್ಲಿ ನಾವಿಕನಲಿ
ಸ್ತಬ್ದ ಅಲೆಗಳಲಿ ಮೌನವೆಂಬ ಬಣ್ಣ
ಬಡಬಾನಲದಲ್ಲಿ ಸುಡುವ ಪಂಜನು
ಹೊತ್ತಿಸಿದ ಕೆಂಪಿನ ಬೆಳಕೆಂಬ ಬಣ್ಣ//
.
ಶಾಂತಿದೂತನಾಗಿ ಗಗನದಿ ಹಾರಾಡುವ
ಶಾಂತಿದೂತನಾಗಿ ಗಗನದಿ ಹಾರಾಡುವ
ಪಾರಿವಾಳಗಳ ಶ್ವೇತವೆಂಬ ಬಣ್ಣ
ಕ್ರಾಂತಿಗಾಗಿ ದೇಹ ತ್ಯಾಗ ಮಾಡಿದ
ವೀರಯೋಧರ ನೆತ್ತರೆಂಬ ಬಣ್ಣ//
.
ಸೌಭಾಗ್ಯ ಗೃಹಿಣಿಯ ಫಾಲದಲಿ ಮಿನುಗುವ
ಸೌಭಾಗ್ಯ ಗೃಹಿಣಿಯ ಫಾಲದಲಿ ಮಿನುಗುವ
ಕೆಂಪು ಕುಂಕುಮವೆಂಬ ಬಣ್ಣ
ವದನಕೆ ಮೆರುಗು ಕೊಟ್ಟು ಸೌಂದರ್ಯ
ವೃದ್ದಿಸುವ ಹಳದಿಯೆಂಬ ಬಣ್ಣ//
.
ಜೀವ ಜಲವದು ಸರ್ವಜೀವಿಗಳ ಸಲಹುವ
ಜೀವ ಜಲವದು ಸರ್ವಜೀವಿಗಳ ಸಲಹುವ
ಇದಕ್ಕಿಲ್ಲ ಆಕಾರವೆಂಬ ಬಣ್ಣ
ತರುಲತೆಗಳಿಗೆ ಪ್ರಕೃತಿಯದು ಚೈತನ್ಯ
ನೀಡಿ ಹರಸಿದೆ ಹಸಿರೆಂಬ ಬಣ್ಣ//
.
ಪರೀಕ್ಷೆಯ ಯುದ್ದದಿ ಮಗುವಿಗೆ ಬರೆಯಲು
ಪರೀಕ್ಷೆಯ ಯುದ್ದದಿ ಮಗುವಿಗೆ ಬರೆಯಲು
ಲೇಖನಿಯಲಿ ನೀಲಿ ಕಪ್ಪೆಂಬ ಬಣ್ಣ
ಆಗಸದಿ ರವಿ ಜಾರುವ ಮುಸ್ಸಂಜೆ ಗೋಧೂಳಿಯ
ಸಮಯದಿ ಸಂಜೆಗೆಂಪೆಂಬ ಬಣ್ಣ//
.
ಅಭಿನವನು ಹೇಳುವ ಮನುಜ ಒಳಗೊಂದು
ಅಭಿನವನು ಹೇಳುವ ಮನುಜ ಒಳಗೊಂದು
ಹೊರಗೊಂದು ವಿಚಿತ್ರವೆಂಬ ಬಣ್ಣ
ಜಗದ್ದೊದ್ದಾರಕ ಹರಿಯದು ನೀಲವರ್ಣ
ಹರನ ಮೈಯಲಿ ಬೂದಿಯೆಂಬ ಬಣ್ಣ//
.
-ಶಂಕರಾನಂದ ಹೆಬ್ಬಾಳ, ಇಲಕಲ್ಲ.
Beautiful. ಮನುಷ್ಯ ಸ್ವಾರ್ಥಿಯಾಗಿ ಒಮ್ಮೊಮ್ಮೆ ಬದಲಾಯಿಸತೊಡಗುತ್ತಾನೆ ಗೋಸುಂಬೆಯಂತೆ ಬಣ್ಣ.
ಬಣ್ಣ ಬಣ್ಣವಾಗಿದೆ ಕವನ.
ಸುಂದರ ಬಣ್ಣಗಳ ಚಂದದ ಕವನ.