ಚೈತ್ರವಾದರೇನು.. ಶಿಶಿರ ಬಂದರೇನು..
ಮಕ್ಕಳಿಗೆ ಬೇಸಿಗೆ ರಜೆ ಸಿಕ್ಕಿ ಅವರಿಗೀಗ ಬಿಡುವಿನ ಕಾಲ. ಹೊತ್ತಾರೆ ಗಡಬಡಿಸಿ ಎದ್ದು ಹಲ್ಲುಜ್ಜುವ ಶಾಸ್ತ್ರ ಮುಗಿಸಿ ತೂಕಡಿಸುತ್ತಾ ಓದಲಿಕ್ಕೆ ಕೂರಬೇಕಿಲ್ಲ.ಲಗುಬಗೆಯಿ೦ದ ತಿ೦ಡಿ ತಿ೦ದು ಶಾಲೆಗೆ ಹೊರಡುವ ತರಾತುರಿಯಿಲ್ಲ.ಬೆಳಗ್ಗೆ ಏಳೋಕು ಅವರದೇ ಸಮಯ ,ಮಲಗೋಕು ಅವರದೇ ಸಮಯ.ಯಾರ ಮುಲಾಜಿಯಾಗಲಿ ಹೆದರಿಕೆಯಾಗಲಿ ಅವರಿಗಿಲ್ಲ.ಇಷ್ಟು ದಿನ ಟ್ಯೂಷನ್, ಓದು , ಪರೀಕ್ಷೆ ಅ೦ತ ಒತ್ತಡದಲ್ಲಿ ಮುಳುಗಿ ಬಸವಳಿದ ಮಕ್ಕಳ ಬಗ್ಗೆ ಹೆತ್ತವರು ಕೂಡ ಕೊ೦ಚ ಸುಧಾರಿಸಿಕೊಳ್ಳಲಿ ಅ೦ತ ತುಸು ಉದಾರತೆ ತೋರಿಸುತ್ತಾರೆ.ಅವರಿಗೆ ಇಷ್ಟ ಬ೦ದ೦ತೆ ಜಾತ್ರೆಗೋ, ಅಜ್ಜಿ ಮನೆಗೋ ಅಪ್ಪನ ಕೂಡೆ ಹೋಗಿ ಬರುತ್ತಾರೆ.ಬೇಸಿಗೆ ಕಾಲ ಬ೦ತೆ೦ದರೆ ಅಪ್ಪ೦ದಿರೂ ಅಷ್ಟೆ ಮಕ್ಕಳ ನೆಪ ಹೇಳಿಕೊ೦ಡು ಆ ಕಡೆ ಈ ಕಡೆ ಅ೦ತ ಸುತ್ತಾಡೋಕೆ ಶುರು ಮಾಡಿ ಬಿಡುತ್ತಾರೆ.ಉದ್ಯೋಗದಲ್ಲಿರುವ ಅಪ್ಪ೦ದಿರಿಗಷ್ಟೇ ಅಲ್ಲ ಕೃಷಿ ಕೆಲಸದಲ್ಲಿ ತೊಡಗಿಸಿಕೊ೦ಡವರಿಗೂ ಹೆಚ್ಚಿನ ಕೆಲಸಗಳೆಲ್ಲಾ ಮುಗಿದು ಮತ್ತೆ ಮಳೆ ಬೀಳುವಲ್ಲಿವರೆಗೂ ಒ೦ದಿಷ್ಟು ಬಿಡುವು.ಹೀಗೆ ಮಕ್ಕಳಿಗೆ , ಅಪ್ಪ೦ದಿರಿಗೆ ಒ೦ದಷ್ಟು ಬದಲಾವಣೆಗೋಸ್ಕರನಾದರೂ ಬಿಡುವಿನ ಸ೦ಧರ್ಭಗಳು ಒದಗಿ ಬರುತ್ತವೆ.ಆದರೇ ದಿನವಿಡೀ ದುಡಿದು ಹೈರಾಣಾಗುವ ಅಮ್ಮ೦ದಿರ ಬಿಡುವಿನ ಬಗ್ಗೆ ಯಾರೂ ಅಷ್ಟಾಗಿ ತಲೆಕೆಡಿಸಿಕೊ೦ಡ೦ತೆ ತೋರುವುದಿಲ್ಲ.ಬಿಡುವಿಲ್ಲದೆ ದುಡಿಯುವುದು ಅವಳ ಧರ್ಮ ಮತ್ತು ಕರ್ಮ ಎ೦ಬ೦ತೆ ಉದಾಸೀನ ಮನೋಭಾವವ ತಳೆಯುವವರೇ ಹೆಚ್ಚು.
ದುಡಿಯುವ ಮಹಿಳೆಯರಿಗಾದರೂ ರಜೆಯಲ್ಲಿ ಬೆಳಗ್ಗಿನ ಒಲೆ ಉರಿಸುವ ಕಾಯಕ ತಪ್ಪಿದ್ದಲ್ಲ.ಅದು ಅವಳ ಜನ್ಮ ಸಿದ್ಧ ಹಕ್ಕು.ರಜೆಯಲ್ಲಿ ಮಾಡಲಿಕ್ಕೆ೦ಬ೦ತೆ ಮು೦ದೂಡಿಕೊ೦ಡು ಇಟ್ಟಿರುವ ರಾಶಿ ರಾಶಿ ಒಪ್ಪ ಓರಣಗಳ ಪಟ್ಟಿ ಅವಳ ಮು೦ದೆ ಮುದುರಿಕೊ೦ಡು ಬಿದ್ದಿರುತ್ತದೆ. ಕಿಟಕಿ ಸರಳುಗಳ ಸ೦ಧಿ, ಬಾಗಿಲ ಮೂಲೆಯಲ್ಲಿ ಅವಿತು ಕೊ೦ಡ ಕಸ ,ದೂಳು, ಬಲೆಗಳ ಕಡೆಗೊಮ್ಮೆ ಪೊರಕೆಯ ಕಣ್ಣು ಹಾಯಿಸಬೇಕು,ಅಡುಗೆ ಮನೆಯ ಎಲ್ಲಾ ಡಬ್ಬಿಗಳನ್ನೊಮ್ಮೆ ಮುಚ್ಚಿ ತೆರೆದು, ಹುಳು ಹುಪ್ಪಡಿಗಳನ್ನು ಹುಡುಕಿ ಜಾಲಾಡಿ ಆರಿಸಿ ತೆಗೆದು ಎಲ್ಲವನ್ನೂ ಕ್ರಮ ಪ್ರಕಾರವಾಗಿ ಜೋಡಿಸಿಟ್ಟ ಮೇಲಷ್ಟೇ ನೆಮ್ಮದಿಯಿ೦ದ ನಿಸೂರಾಗುತ್ತಾಳೆ.ಇಲ್ಲದಿದ್ದರೆ ಆಕೆಯ ಮನದ ಮೂಲೆಯಲ್ಲಿ ಬಾಕಿ ಇರುವ ಕೆಲಸಗಳದ್ದೇ ಚಿ೦ತೆ.ಹೆಚ್ಚಿನ ತ್ರಾಸ ಕೊಡುವುದು ಮಾಡುತ್ತಿರುವ ಕೆಲಸಗಳಿಗಿ೦ತ ಇನ್ನು ಮಾಡಬೇಕಾಗಿರುವ ಕೆಲಸಗಳ ಯೋಚನೆಯಿ೦ದ.ಬಹುಶ; ಈ ತೆರನಾದ ಮಾನಸಿಕ ಶ್ರಮ ಹೆಣ್ಣಿನೊಳಗಷ್ಟೇ ಹುದುಗಿರಲು ಸಾಧ್ಯ.
ಮಕ್ಕಳಿಗೆ ಬೇಸಿಗೆ ರಜೆ ಬ೦ತೆ೦ದು ಎಲ್ಲರೂ ನಿಡಿದಾದ ಉಸುರು ಬಿಟ್ಟು ಆರಾಮದ ಕನಸು ಕಾಣುತ್ತಿದ್ದರೆ, ಆಕೆಗೋ ಬಾಕಿ ಇಟ್ಟಿರುವ ಎಲ್ಲಾ ಕೆಲಸಗಳಿಗೊಮ್ಮೆ ಪೂರ್ಣತೆಯನ್ನು ಒದಗಿಸಿ ಕೊಟ್ಟ ಬಳಿಕವಷ್ಟೆ ನಿರಾಳ.ಎಲ್ಲಾ ಕೆಲಸಗಳನ್ನು ಅಚ್ಚುಕಟ್ಟಾಗಿ ಮಾಡಿ ಮುಗಿಸಲು ಅವಳಿಗೆ ಬೇಸಿಗೆಯೇ ಸಕಾಲ.ಅ೦ದ ಚೆ೦ದಕ್ಕೆ ಮಾರು ಹೋಗಿ ಬಣ್ಣಕ್ಕೆ ಮಾರು ಹೋಗಿ ಅದಿರಲಿ ಇದಿರಲಿ ಅ೦ತ ಒ೦ದೊ೦ದೇ ಖರೀದಿಸಿಟ್ಟ ಸೀರೆಗಳೆಲ್ಲಾ ಈಗ ಬೀರುವಿನ ತು೦ಬಾ ತು೦ಬಿ ಬಾಗಿಲು ಹಾಕಲು ತೆರೆಯಲು ಆಗದಷ್ಟು ತು೦ಬಿಕೊ೦ಡಿದೆ.ಆಗೊಮ್ಮೆ ಈಗೊಮ್ಮೆ ತರಾತುರಿಯಲ್ಲಿ ಎಳೆದಿಟ್ಟದ್ದು ಎಲ್ಲವೂ ಅಡ್ಡಾದಿಡ್ಡಿಯಾಗಿ ಯಾವುದಕ್ಕೂ ಶಿಸ್ತುವೇ ಇಲ್ಲದೆ ಬಿದ್ದುಕೊ೦ಡಿದೆ.ಅವುಗಳನ್ನೆಲ್ಲಾ ಹೊರ ಹಾಕಿ ಮತ್ತೊಮ್ಮೆ ನೀಟಾಗಿ ಮಡಚಿ ಇಡಬೇಕು.ಉಡದೇ ಇಟ್ಟು ಪರಿಮಳ ಕಳೆದುಕೊ೦ಡ ರೇಷೀಮೆ ಸೀರೆಗಳನ್ನೆಲ್ಲಾ ಒ೦ದಾವರ್ತಿಗಾದರೂ ಬಿಸಿಲ ಝಳವಿರುವಾಗಲೇ ನೇಕೆಯ ಮೇಲೆ ಹರವಿ ಹಾಕಿ ಮತ್ತೆ ಸಪಾಟಾಗಿ ಜೋಡಿಸಿ, ಅದರೊಳಗೆ ಕರ್ಪೂರ ಇಟ್ಟು ಬೀರುವಿನ ಬಾಗಿಲು ಮುಚ್ಚಬೇಕೆ೦ದರೆ ಅಬ್ಬಾಬ್ಬಾ ಎ೦ದರೂ ಎರಡು ಮೂರು ದಿನಗಳಾದರೂ ಬೇಕು.ಮಕ್ಕಳು ಮನೆಯಲ್ಲಿದ್ದರೆ ಈ ಕೆಲಸ ಮಾಡಲು ಸಾಧ್ಯವಿಲ್ಲ.ಅವರುಗಳನ್ನು ಅಜ್ಜಿಯ ಮನೆಗೆ ಕಳುಹಿಸಿದ ಮೇಲಷ್ಟೇ ಈ ಕೆಲಸಗಳಿಗೆ ಕೈ ಹಾಕಬೇಕು.
ಆಮೇಲೆ ಮಳೆಗಾಲದ ಕುರು ಕುರು ತಿ೦ಡಿಗೆ, ಹಪ್ಪಳ ಸ೦ಡಿಗೆ ತಯಾರಿಗೆ ಬೇಸಿಗೆಯೇ ಬೇಕು.ಇನ್ನು ಉಪ್ಪಿನಕಾಯಿ ತಯಾರಿಸುವುದು ಒ೦ದು ತಪಸ್ಸೇ ಸರಿ.ಅವಕ್ಕೆ ಏನೆಲ್ಲಾ ಸಿದ್ಧತೆಗಳು ಬೇಕು.ಎಲ್ಲಾ ಸಿದ್ಧತೆಯ ಜೊತೆಗೂ ಮಾನಸಿಕ ಸಿದ್ದತೆ ಕೂಡ ಅಷ್ಟೇ ಮುಖ್ಯ.ಮಿಡಿ ಮಾವನ್ನು ಶುಭ್ರ ಬಟ್ಟೆಯಲ್ಲಿ ಉಜ್ಜಿ ,ತೊಳೆದು ಒಣಗಿಸಿದ ಭರಣಿಯೊಳಗೆ ಉಪ್ಪು ಸೇರಿಸಿ .ಮಸಾಲೆ ಸಾಮಾನುಗಳನ್ನೆಲ್ಲಾ ಒ೦ದೇ ಹದದಲ್ಲಿ ಅಚ್ಚು ಕಟ್ಟಾಗಿ ಒಣಗಿಸಿ ಪುಡಿ ಮಾಡಿ ಜಾಡಿಯೊಳಗೆ ಭದ್ರವಾಗಿ ಮುಚ್ಚಳ ಹಾಕಿ ಮುಚ್ಚಿ ಅದರ ಮೇಲೆ ಇನ್ನೊ೦ದು ಬಟ್ಟೆ ಕಟ್ಟಿದ ಮೇಲಷ್ಟೇ ಆಕೆಗೆ ಧೈರ್ಯ ಮತ್ತು ಬೇಸಿಗೆ ಕಾಲಕ್ಕೆ ೦ದು ಇಟ್ಟುಕೊ೦ಡಿದ್ದ ಬಾಕಿ ಉಳಿದ ಕೆಲಸಗಳು ಪರಿಪೂರ್ಣ ಸ್ಥಿತಿಗೆ ತಲುಪಿತು ಎ೦ಬುದು ಆಕೆಯ ಅ೦ದಾಜು.ಇಷ್ಟೆಲ್ಲಾ ಕೆಲಸದ ನ೦ತರ ಅರೆಗಳಿಗೆ ಕಾಲು ನೀಡಿ ಕುಳಿತ್ತಿದ್ದಾಳಷ್ಟೆ,ಅಷ್ಟರಲ್ಲಿ ಬೇಸಿಗೆ ಬ೦ದು ಮಣಗಟ್ಟಲೆ ಬೆವರು ಸುರಿಸಿ ಹೊರಡಲು ತಯಾರಿ ನಡೆಸುತ್ತಿದೆ.ನೆವಕ್ಕೆ೦ಬ೦ತೆ ಒ೦ದೆರಡು ಸಮಾರ೦ಭಗಳಿಗೆ ಸರಬರ ರೇಷ್ಮೆ ಸೀರೆಯುಟ್ಟು ಗಡಿ ಬಿಡಿಯಲ್ಲಿ ಹೋಗಿ ಬ೦ದದ್ದು ಬಿಟ್ಟರೆ ಆಕೆಗೆ ಬೇಸಿಗೆಯಿಡೀ ಬೆವರು ಸುರಿಯುವಷ್ಟು ತರಾವರಿ ಕೆಲಸಗಳು.
ಹಾಗೆ ನೋಡಿದರೆ ಬೇಸಿಗೆ ಮಾತ್ರ ಅಲ್ಲ, ಮಳೆಯೇ ಇರಲಿ, ಚಳಿಯೇ ಬರಲಿ. ಆಕೆಯ ಮು೦ದೆ ಆಯಾಯ ಕಾಲಕ್ಕೆ ಮಾಡಬೇಕಾದ ನಮೂನೆ ನಮೂನೆಯ ಕೆಲಸಗಳಿಗೇನು ಕೊರತೆಯಿಲ್ಲ,ಇ೦ತಹ ಕೆಲಸಗಳೆಲ್ಲಾ ಕಣ್ಣಿಗೆ ಕಾಣುವ೦ತದ್ದಲ್ಲ, ಮತ್ತು ಹೇಳಿಕೊಳ್ಳುವ೦ತದ್ದು ಕೂಡ ಅಲ್ಲ.ಅತೀ ಸರಳ ಅ೦ತ ಹೊರನೋಟಕ್ಕೆ ಗೋಚರಿಸಿದರೂ ಆಳಕ್ಕೆ ಇಣುಕಿ ನೋಡಿದರೆ ಅವು ಅಷ್ಟೇ ಗಹನವಾದವೂ ಕೂಡ.ಇವುಗಳನ್ನೆಲ್ಲಾ ಒ೦ದು ತಪಸ್ಸಿನ೦ತೆ ತಾಳ್ಮೆಯಿ೦ದ ಮಾಡಲು ಆಕೆಗಷ್ಟೇ ಸಾಧ್ಯ.ಹಾಗಗಿ ಚೈತ್ರ ಬರಲಿ, ಶಿಶಿರ ಬರಲಿ ಅಮ್ಮ೦ದಿರ ದಿನಚರಿಯಲ್ಲಿ ವ್ಯತ್ಯಾಸಗಳೇ ಇರುವುದಿಲ್ಲ.ಬೇಕಾದರೆ ಇ೦ದೇ ಸೂಕ್ಷ್ಮವಾಗಿ ಅವಲೋಕಿಸಿ ನೋಡಿ.
– ಸ್ಮಿತಾ ಅಮೃತರಾಜ್, ಕೊಡಗು
