ಮಾರುವಂತಿದ್ದರೆ….
ಮಾರುಕಟ್ಟೆಯಲಿ ಮಾರುವಂತಿದ್ದರೆ
ದೇಶದ ಬಡತನವನ್ನೇ ಮಾರುತ್ತಿದ್ದೆ,
ಬದಕೊಂದು ಸಗಟು ವ್ಯಾಪಾರದ
ಚಿಲ್ಲರೆ ಮಾರಾಟಗಾರನ ಲಾಭವಿಲ್ಲದ
ಸಾಲ ಸೋಲದ ಕುಂಟ ಕಾಲಿನ ಯೋಗವಾಗಿದೆ…
ಮಾರುಕಟ್ಟೆಯಲಿ ಮಾರುವಂತಿದ್ದರೆ
ಬರಗಾಲದ ಬಿಸಿಲನ್ನೆ ಮಾರುತ್ತಿದ್ದೆ…
ಅನ್ನಕ್ಕೊಂದು ಸರ್ಕಾರಿ ಸೀಲಿರದ
ಉಸಿರು ನಿಂತ ದೇವರನು ಬೀದಿಯಲಿಟ್ಟು
ಟನ್ನುಗಟ್ಟಲೆ ಕಪ್ಪು ಮೋಡವನ್ನೆ ಕೊಂಡುಕೊಳ್ಳುತ್ತಿದ್ದೆ…
ಮಾರುಕಟ್ಟೆಯಲಿ ಮಾರುವಂತಿದ್ದರೆ
ಅನ್ನದಗುಳಿನ ಹಸಿವನ್ನೆ ಮಾರುತ್ತಿದ್ದೆ..
ಮಾರುಕಟ್ಟೆಯಲಿ ಮಾರುವಂತಿದ್ದರೆ
ನನ್ನನ್ನೆ ನಾನು ಮಾರಿಕೊಳ್ಳುತ್ತಿದ್ದೆ…
,
– ಸೂರಿ ಅಣಚುಕ್ಕಿ
