ನೆಗಡಿ ಸಾರ್, ನೆಗಡಿ..
ಮೂಗು ಕಟ್ಟಿ ಸೊಂಡಿಲ
ಭಾರ ಮುಖದ ಮೇಲಾ
ಯಾಕೆ ಬಂತೀ ನೆಗಡಿ ?
ಚಳಿರಾಯನೊಡನಾಡಿ.. ||
ಮಾತಾಡಿಕೊಂಡಂತೆ ಜೋಡಿ
ಸುರಕ್ಷೆಯ ಪದರ ಜರಡಿ
ಹಿಡಿದರು ಏರಿತೇ ಮಹಡಿ..!
ಶಿರದಿಂದುಂಗುಷ್ಠ ಗಡಿಬಿಡಿ ||
ಗಂಟಲಿತ್ತಲ್ಲಾ ನಿರಾಳ ..
ಕಂಬಿಯೊಳಗೇನ ತುರುಕಿದರಾ ?
ಕಟ್ಟಿಕೊಂಡಂತೆ ಗಷ್ಠ ಕಸಿವಿಸಿ
ದೊಡ್ಡಿ ಬಾಗಿಲಿಗೆ ಬೀಗ ಜಡಿಸಿ ||
ಉಗುಳ ನುಂಗಲಿಕ್ಕಿಲ್ಲ ಸರಾಗ
ಕೆಮ್ಮುತೆ ಉಗುಳಬಿಡದಾ ರೋಗ
ಮುಖದೆ ಮೂಗುಂಟೆ ಅನುಮಾನ
ಕಾಟಕೆ ತಾನಾದಂತೆ ಅವಸಾನ ||
ಬಿಸಿ ಕುಡಿದರು ಬಿರುಸೇಕೊ
ತಂಪು ಮುಟ್ಟಲೆ ಭೀತಿಯುಕ್ಕೊ
ಮುರಿದು ಕೂರಿಸಿತೆಲ್ಲಾ ಸೊಕ್ಕು
ಸೀನುತೆ ಬಾಲ ಮುದುಡಿದ ಬೆಕ್ಕು ||
– ನಾಗೇಶ, ಮೈಸೂರು
