ನಿಲ್ಲದಲೆದಾಟ
ಬಿಟ್ಟೆಲ್ಲೊ ಹೊರಡುವೆನು ಎಂದೆಲ್ಲೊ ದೂರಕೆ
ಎಂದರಸಿ ಹೊರಟರೆ, ಬಂದು ಮತ್ತದೆ ತೀರ
ದುಂದುವೆಚ್ಚದ ಬದುಕ ಸಂದಿ ಗೊಂದಿ ದಾಟಿಸಿ
ಮತ್ತೆ ಕರೆ ತಂದಿತಲ್ಲ ಚಕ್ರವ್ಯೂಹದ ಹುನ್ನಾರ ||
ಜಯಿಸುವೆನೆಂದೇ ನಡೆದ ಅಶ್ವಮೇಧ ಯಾಗ
ಬಿಚ್ಚಿದೆ ಯಾಗಾಶ್ವ ಹುರಿದುಂಬಿಸುತ ಭರದೆ
ಪ್ರಾಯ ಮದ ರಾಗ ಪದ ಅನುರಣಿಸಿ ವೇಗ
ನಾಗಾಲೋಟದೆ ಓಟ ತುಳಿದು ಸವರಿ ಹೆದೆ ||
ಗೆದ್ದ ಕದನಗಳೆಷ್ಟೊ, ಸೋತ ವದನಗಳಷ್ಟು
ಸೋಲು ಗೆಲುವಿನ ನಡುವೆ ಕೂತ ಕುಹುಕ
ಕೀಳರಿಮೆ ಕುಗ್ಗಿಸಿತೊ, ಯುದ್ಧವದ ಹಿಗ್ಗಿಸಿತೊ
ಬಿಟ್ಟೆಲ್ಲ ರಣರಂಗಕೆ ಮತ್ತೆ ನಡೆಸಿ ತಪನೆ ||
ಗೆಲಲಾಗದ ಯಾತನೆ ಮತ್ತೆ ದೂಡುತಲಲ್ಲಿಗೆ
ಸುತ್ತಿಸಿ ಚಕ್ರವದನೆ ತಿರುತಿರುಗಿಸಿ ಮರಳಿಸಿ
ಅರಿವಾಯಿತರಿಷಡ್ವರ್ಗ ಬಿಡದಲ್ಲ ರಾಜಮಾರ್ಗ
ಯಾಕೊ ಬಯಸಿದ್ದೆಲ್ಲ ಕನಸ ಮನೆ ಕೊರಗು ||
ಜಯಿಸಿ ನಿಂತಾ ಗಳಿಗೆ, ಖಡ್ಗವಿನ್ನೂ ಹೊರಗೆ
ಅರಿಗಳಾರು ಕಾಣರು ಒಳಗವಿತವರ ಬಿಟ್ಟು
ಯಾಕೊ ಗೆಲದು ಮಾತು ಕಪಟ ಪ್ರೀತಿ ನೀತಿ
ಸೂತ್ರವನೆಲ್ಲೊ ಹುಡುಕಿ ಅಲೆತ ಮನ ರಣರಂಗ ||
– ನಾಗೇಶ ಮೈಸೂರು
