ಸರಸತಿಯ ಪದತಲಕೆ ಬಾಗುತಲಿ ಪೊಡಮಡುವೆ
ಕರ ಪಿಡಿದು ನಡೆಸುತಲಿ ನೀ ಸಲಹು ತಾಯೆ
ಪೊರೆಯುತಲಿ ಸತತವೂ ಸುಮತಿಯನು ನೀ ನೀಡು
ಚರಣಕೆರಗುವೆ ನಿನಗೆ ಬನಶಂಕರಿ
ಮಗಳೆಂದು ಹೀನಾಯ ಮಾಡದೆಯೆ ಸಲಹಿದೊಡೆ
ಸಿಗದಿರದೆ ಬಿರಿದರಳಿ ನಗುತಿರುವ ಹೂವು
ಸೊಗಸಾಗಿ ವಿದ್ಯೆಯನು ಕಲಿಯುತ್ತ ಮುಂದಕ್ಕೆ
ಜಗವನ್ನೆ ಗೆಲ್ಲುವಳು ಬನಶಂಕರಿ
ಗಣರಾಜ್ಯ ಉತ್ಸವವ ಆಚರಿಸಿ ಸಂತಸದಿ
ಜನಮನವು ಬೀಗುತಿದೆ ಹೆಮ್ಮೆಯಲಿ ತಾನು
ಮನವಿರಿಸಿ ಸಾಗುತಿರೆ ನಿಯಮಗಳ ಪಥದಲ್ಲಿ
ಅನುದಿನವು ನವದಿನವು- ಬನಶಂಕರಿ
ತವರೂರ ನೆನಪಿನಲಿ ಮುದಗೊಂಡ ಮನದೊಳಗೆ
ಸವಿಗನಸ ಮೆರವಣಿಗೆ ನಡೆದಿಹುದು ನೋಡು
ನವಿರಾದ ಮಮತೆಯನು ಸುರಿಸುತಿಹ ಅಮ್ಮನಿರೆ
ತವರು ನೆಲ ನಾಕವದು ಬನಶಂಕರಿ
ವರಕವಿಯ ದುಗುಡಗಳು ಕವನಗಳ ರೂಪದಲಿ
ಸರಸತಿಯ ಲೋಕದಲಿ ಮಿನುಗುತಲಿ ನಿತ್ಯ
ಮೆರೆಯುತಲಿ ಬೆಳಗಿದರು ಮಿದುಮನದ ಕವಿಯಾಗಿ
ಚಿರಕಾಲ ಉಳಿಯುತಲಿ ಬನಶಂಕರಿ
-ಶಂಕರಿ ಶರ್ಮ, ಪುತ್ತೂರು.
ಸರಸತಿಗೆ ಪೊಡಮಡುವ ಪದ್ಯ ತುಂಬ ಸೊಗಸಾಗಿದೆ ಮೇಡಂ, ಐದು ಮಾತ್ರೆಯ ಗಣಗಳ ರಚನೆ ಕಷ್ಟಕರ.
ಕೆ ಎಸ್‌ ನ ಅವರ ಸಿರಿಗೆರೆಯ ನೀರಿನಲಿ ಪದ್ಯಕೆ ಸ್ವರ ಸಂಯೋಜನೆ ಮಾಡುವಾಗ ದಿವಂಗತ ಅಶ್ವತ್ಥ್‌ ಅವರು
ಹೇಳಿರುವ ಮಾತು ನೆನಪಾಯಿತು. ಧನ್ಯವಾದಗಳು. ಮತ್ತೆ ಮತ್ತೆ ಓದಿಕೊಳ್ಳುವಂತಿದೆ. ನಮ್ಮ ವಿದ್ಯಾರ್ಥಿಗಳಿಗೆ
ಕಲಿಸುವೆ.
ತಮ್ಮ ಮುಕ್ತ, ಪ್ರೋತ್ಸಾಹಕರ ಸ್ಪಂದನೆಗೆ ವಂದಿಸಿದೆ.
ಮುಕ್ತಕಗಳು..ಮುಕ್ತವಾಗಿ ಯೇ..ಓದಿಸಿಕೊಂಡು ಹೋದವು..ಮೇಡಂ
ಸೊಗಸಾಗಿದೆ ಮೇಡಂ. ತವರೂರೆಂದರೆ ಸವಿ ನೆನಪೇ ಮೂಡುವುದು ಯಾವಾಗಲೂ
ಸಹೃದಯ ಪ್ರತಿಕ್ರಿಯೆಗೆ ನಮನಗಳು…ನಯನಾ ಮೇಡಂ.
ಪ್ರೀತಿಯ ಸ್ಪಂದನೆಗೆ ವಂದನೆಗಳು…ನಾಗರತ್ನ ಮೇಡಂ.
ಪ್ರಾಸಬದ್ಧವಾಗಿ, ಅರ್ಥಪೂರ್ಣವಾಗಿ ಮೂಡಿ ಬಂದಿದೆ ತಾಯಿ ಸರಸ್ವತಿಯ ಕರುಣೆಯ ವರ್ಣನೆ ಬನಶಂರಿಯ. ಅಂಕಿತದೊಂದಿಗೆ ಆತ್ಮೀಯ ಶಂಕರಿಯವರ ಲೇಖನಿಯಿಂದ.