ದೇಹ ತ್ಯಜಿಸುವ ಸುಮುಹೂರ್ತ ಸಾಮಿಪ್ಯ
ಅದುವೇ ಉತ್ತರಾಯಣ ಪುಣ್ಯಕಾಲ!
ಶರಶಯ್ಯೆಯಲ್ಲಿ ಹರಿಸ್ಮರಣೆ!!
ಮಹಾಭಾರತದಿ ಇಚ್ಚಾಮರಣಿ ಭೀಷ್ಮ..!!
ತೆರೆದಿರಲಂದು ನಾಕದ್ವಾರ….!!!
ಮತ್ತಿಲ್ಲಿ ಉತ್ತಿ ಬಿತ್ತಿದ ಬೆಳೆ
ಬೆಳೆದು ಹಸನಾಗಿ ರೈತನೆದೆಯಲಿ ಸುಗ್ಗಿ!
ಹರುಷದಿ ಲೋಗರ ಮನ ಹಿಗ್ಗಿ!!
ಇಳೆ ಬೆಳಗಿ ಮಳೆ ಸುರಿಸಿ ಜೀವೋತ್ಪತ್ತಿ
ಸೂರ್ಯದೇವನ ಹಬ್ಬ !ಬೀರಿ ಕಬ್ಬ!!
ಜಗವ ಬೆಳಗುವ ಭಾನು, ಪಥವ
ಬದಲಿಸುತ…
ಬದಲಾವಣೆಯ ಸಾರೋ ಸಂಸ್ಕೃತಿಯ ಹಬ್ಬ…!
ಪೀಪಿ ,ಕತ್ತಿನಹುರಿ, ಚೆಂದದ ಘಂಟೆ
ಕಳಸ ,ಕುಚ್ಚು ,ಹಾರ ತುರಾಯಿ ರಿಬ್ಬನ್ನು!!
ಸಿಂಗರಿಸಲಷ್ಟು ತರಹೇವಾರಿ ಬಣ್ಣ
ಗೊರಸು ಕಾಲಿಗೆ
ಘಲ್ಲೆನ್ನೊ ಕಾಲ್ಗೆಜ್ಜೆ ಚೆನ್ನ.. !
ಕಿಚ್ಚನು ಹಾಯಿಸಿ ಬೆಚ್ಚನೆ ಕಾಯಿಸಿ
ದನಕರುಗಳ ಪೂಜಿಸೋ ರೀತಿಯೇನಣ್ಣ…!
ಜರತಾರಿ ಲಂಗ ಝಗಮಗಿಸೊ ರವಿಕೆ
ಹೆಂಗಳೆಯರಲ್ಲೆಂತಾ ಲವಲವಿಕೆ!?
ಹಬ್ಬದ ಸಲುವು ಎಳ್ಳು ಬೆಲ್ಲ ಬೀರಿದಷ್ಟು ಗೆಲುವು..!!
ನಗುವ ಬೀರುವ ಚೆಲುವೆಯರ ಹಬ್ಬ..!
ಮಂಜಿನೋಕುಳಿಯಲ್ಲಿ ಮಿಂದೆದ್ದ ಬೆಳಗು
ಮೇಘಗಳೊಡನಾಟ ಕಣ್ಣಮುಚ್ಚಾಲೆಯಾಟ..!
ಚಳಿಗಾಳಿ ಬೀಸುತ ಶಿಶಿರ ಋತು ಸಾಗುತ
ಪತಂಗಗಳ ಬೀಡು ಆಗಸದ ನಾಡು..
ಮೋಡಗಳ ಮರೆಯಲ್ಲಿ ಇಣುಕುವ ರವಿಯು
ಹೊಸತನದ ಹೊನಲನ್ನು ಹರಿಸುವ ಪರಿಯು!!
ಎಳ್ಳು ಬೆಲ್ಲ, ರಸಬಾಳೆ ಸವಿಕಬ್ಬಿನ ಲಗ್ಗೆ
ಸಂಕ್ರಾತಿ ಸ್ಫುರಿಸುತಲಿ ಸಮೃದ್ಧಿ ಸಂಭ್ರಮದ ಬುಗ್ಗೆ..!!
-ಅರ್ಚನಾ. ಹೆಚ್, ಬೆಂಗಳೂರು
ಸತ್ವ ಪೂರ್ಣ ಕವಿತೆ. ಧನ್ಯವಾದಗಳು ತಮಗೆ
ಸಂಕ್ರಾಂತಿಯ ಪೂರ್ತಿ ಆಚರಣೆಗಳ ವಿವರವನ್ನೊಳಗೊಂಡ ಸುಂದರ ಕವನ
ಸೂಪರ್ ಸಂಕ್ರಾಂತಿ ಕವಿತೆ….
ಸಂಕ್ರಾಂತಿಯ ಆಚರಣೆ, ವೈಶಿಷ್ಟ್ಯವಾನ್ನು ವಿವರಿಸಿದ ಸುಂದರ ಕವನ
ತುಂಬ ಇಷ್ಟ ಆಯ್ತು
ಅರ್ಥಪೂರ್ಣವಾದ ಕವನ. ಧನ್ಯವಾದಗಳು
ಸಂಕ್ರಾಂತಿ ಹಬ್ಬದ ಮಹತ್ವ, ದಿನದ ವಿಶೇಷತೆಗಳು ಕವನದಲ್ಲಿ ಸೊಗಸಾಗಿ ಮೂಡಿಬಂದಿದೆ. ಧನ್ಯವಾದಗಳು ಮೇಡಂ.
ಸಂಕ್ರಾಂತಿಯ ಸವಿವರ ಚಿತ್ರಣದ ಸೊಗಸಾದ ಕವನ!