ನನ್ನ ಮುಖ ಮಾರಾಟಕ್ಕಿದೆ

Share Button

ನನ್ನ ಮುಖ ಮಾರಾಟಕ್ಕಿದೆ
ಸಕಲ ಕುಟಿಲಗಳನ್ನು ಸ್ಪುರಿಸುವ ಮುಖ
ಮಾರ್ಜಾಲ ನ್ಯಾಯಾಧೀಶನ ಮುಖ
ಊಸರಬಳ್ಳಿಯಂತೆ ಬದಲಾಗುವ ಮುಖ

ಜನವಿದ್ದಲ್ಲಿ ಸರಳುವ ಮುಖ
ವೇದಿಕೆಯಲ್ಲಿ ನಟಿಸುವ ಮುಖ
ಹಗರಣಗಳ ಮಾಲೆಯ ತೊಡುವ ಮುಖ
ರಹಸ್ಯಜಾಲವ ಹೆಣೆಯುವ ಮುಖ

ದೋಚಿದ ಗಂಟನು ಮರೆಮಾಚುವ ಮುಖ
ದಾಹದ ಹುಯಿಲನು ಸಂಭಾಳಿಸೋ ಮುಖ
ಸತ್ತರೂ ಪತ್ತೆಯಾಗದ ಮುಖ
ನೆತ್ತರಿನಲ್ಲಿ ಬದುಕುವ ಮುಖ

ಅನುಮಾನ ಬಾರದೇ ವಂಚಿಸುವ ಮುಖ
ದ್ರೋಹದ ಕತ್ತಿಯ ಅಲಗಿನ ಮುಖ
ಸತ್ಯವ ಸಮಾಧಿ ಮಾಡುವ ಮುಖ
ಗೋರಿಯ ಕಟ್ಟುವ ಖಾರದ ಮುಖ

ನಗುವಿನ ಸುಳಿಯಲಿ ಸೆಳೆವಾ ಮುಖ
ಧಗಧಗ ಬೆಂಕಿಯ ನುಂಗುವ ಮುಖ
ಮಂದಿಯ ಚಪ್ಪಾಳೆ ಗಿಟ್ಟಿಸೋ ಮುಖ
ಯಾರಿಗೂ ತಿಳಿಯದೇ ಬೆಂಕಿಯ ಹಚ್ಚೋ ಮುಖ

ಕಟ್ಟುಕತೆಗಳ ಕಟ್ಟಿ ಗಿಂಜುವ ಮುಖ
ಕೋಪದ ಜನಗಳ ರಮಿಸೋ ಮುಖ
ನಾಚಿಕೆ ಬಿಟ್ಟು ನುಲಿಯುವ ಮುಖ
ದ್ವೇಷದ ಕಾವಿಗೆ ಜಗ್ಗದ ಮುಖ

ಹಾದಿ ಬೀದಿಯಲಿ ನಗುವ‌ ಮುಖ
ಕಟೌಟ್ ಗಾಗಿ ಕಳ್ಳನಗುವಿನ ಮುಖ
ಮೋಸದ ಜಾಲದ ಮೋಹಕ ಮುಖ
ನನ್ನ ಮುಖ ಮಾರಾಟಕ್ಕಿದೆ.

ನಂಬುವ ಸಮಾಜದ ವಂಚಕ‌ ಮುಖ
ಹದ್ದಿನ‌ ನೆರಳಿನ ನನ್ನದೇ ಮುಖ
ರೈತನ ಹೆಣದಲಿ ನನ್ನದೇ ಬಿಂಬ
ಹಾಹಾಕಾರದೇ ನಗುತಿಹ ಮುಖ

ಸತ್ಯದ ಸಂತೆಯ ಸುಳ್ಳಿನ ಮುಖ
ಕೊಲೆಗಳ ಕಲೆಯಲ್ಲೂ ಪಳಗಿದ ಮುಖ
ರಾಜಕೀಯ ರಂಗದ ವಿಧೂಷಕ ಮುಖ
ನನ್ನ ಮುಖ ಮಾರಾಟಕ್ಕಿದೆ

ಬೆಲೆಯೇನೂ ದುಬಾರಿಯಲ್ಲ
ಒಂದೇ ಒಂದು ಗುಂಡಿಯ ಒತ್ತಿ
ನಿಮ್ಮ ಗುಂಡಿಗೆಯನು ಖರೀದಿಸುವೆ
ನನ್ನ ಮುಖ ಮಾರಾಟಕ್ಕಿದೆ.

-ಚಿನ್ನು ಪ್ರಕಾಶ್ ಶ್ರೀರಾಮನಹಳ್ಳಿ

6 Responses

  1. ಬಿ.ಆರ್.ನಾಗರತ್ನ says:

    ಮುಖವಾಡಗಳ ಅನಾವರಣ ಮಾಡಿರುವ ವಿಡಂಬನಾತ್ಮಕ ಕವನ ಚೆನ್ನಾಗಿದೆ ಮೂಡಿ ಬಂದಿದೆ.ಅಭಿನಂದನೆಗಳು ಸಾರ್.

  2. ನಯನ ಬಜಕೂಡ್ಲು says:

    ಸೊಗಸಾದ ಕವನ, ಬದುಕಿನ ಹಲವು ಮುಖವಾಡಗಳ ಅನಾವರಣ.

  3. Anonymous says:

    ಮನುವಿನ ಆಂತರ್ಯದ ಬಗೆಗಿನ ಕಾವ್ಯ ಸುಂದರವಾಗಿದೆ

  4. ಶಂಕರಿ ಶರ್ಮ, ಪುತ್ತೂರು says:

    ಕುಟಿಲ ಮಾನವನ ನೂರಾರು ಮುಖಗಳ ಸ್ಪಷ್ಟ ಚಿತ್ರಣ ಮೂಡಿಸಿದ ಕವನ ಚಿಂತಿಸುವಂತೆ ಮಾಡಿದೆ.

Leave a Reply to ಬಿ.ಆರ್.ನಾಗರತ್ನ Cancel reply

 Click this button or press Ctrl+G to toggle between Kannada and English

Your email address will not be published. Required fields are marked *

Follow

Get every new post on this blog delivered to your Inbox.

Join other followers: