ಕಾಫಿಯೊಡನೆ

ಕಾಫಿಯೊಡನೆ ಬಹಳಷ್ಟು ಸಂಭವಿಸಬಹುದಂತೆ
ಕುಳಿತಿದ್ದಾರೆ ಕಾಫಿತಾಣದಲಿ ಜನ ದ್ವೀಪದಂತೆ

ನಲ್ಲನಲ್ಲೆಯರ ಪಿಸುದನಿಯ ಸವಿಮಾತು
ಕನಸುಗಳನೂ  ಹೆಣೆಯುತಿಹರು ಅಲ್ಲಿ  ಕುಳಿತು

ಮದುವೆಯಾದ ಜೋಡಿಗಳಿಗೂ ಇಲ್ಲುಂಟು ಸ್ಥಳ
ತರಬಹುದು ತಮ್ಮೊಡನೆ ಜಂಜಡ,ಮನಸ್ತಾಪ ಜಗಳ

ಅಲ್ಲೊಂದು ಜೋಡಿ ನಡುವೆ ಇದೆ ಕಾಫಿ ಬಟ್ಟಲು
ಉಳಿದಂತೆ ಆ ಟೇಬಲಿನಲ್ಲಿ ಮೌನದ್ದೇ ದರ್ಬಾರು

ಮನದಾಳದ ಮಾತುಗಳಿಗೆ ಏನೋ ತಡೆಗೋಡೆ
ಇದ್ದು ಜಯಿಸುವುದೇ ಅಥವಾ ಅಗಲಿಕೆ ಹಿತವೆ?

ಅಲ್ಲಿ ಆ ಮೂಲೆಯಲಿ ಮೊಬೈಲು ಹಿಡಿದ ಒಬ್ಬಂಟಿ.
ಈಗಂತೂ  ಸಾಮಾಜಿಕ ಜಾಲತಾಣವೇ ಅವನ ಸಂಗಾತಿ

ಹೌದು ಕಾಫಿಯೊಡನೆ ಬಹಳಷ್ಟು ಸಂಭವಿಸಬಹುದು
ನೋವು-ನಲಿವು,ಸಿಟ್ಟು -ಸೆಡವು ಕೊನೆಗೆ  ದುರಂತ -ಸಾವು

–ಮಹಾಬಲ. ಕೆ.ಎನ್

+9