ಅವನು-ನಾನು

Spread the love
Share Button
ಆಗಲೇ ಬೆಳಗಾಯಿತೇ?
ಅದೊ, ಗಿಡ ಮರಗಳ ಸಂದಿನಿಂದ
ಸೂರ್ಯ, ಹಾ ಅವನೇ
ಅದೆಷ್ಟು ನಾಚುತ್ತ ಹುಟ್ಟುತ್ತಿದ್ದಾನೆ!
ಅಬ್ಬಾ…ಅವನ ಕಿರಣ ರೇಖುಗಳದೆಷ್ಟು ಚೆನ್ನ
ಎಲ್ಲಿ, ನಾನೆಲ್ಲಿ?
ಇನ್ನೂ ಹುಟ್ಟೇ ಇಲ್ಲವಲ್ಲ!
.
ಅಂತೂ ಅವನು ನಾಚಿಕೆ ಬಿಟ್ಟು ಮೇಲೆದ್ದ!
ಅದೊ, ನಾನೂ ಹುಟ್ಟಿದೆ!
ಆಶ್ಚರ್ಯ…ಎಂಥ ಬೆಳವಣಿಗೆ ನನ್ನದು?
ಅದೆಷ್ಟು ದೂರದವರೆಗೆ ನಾನು!
ಹೌದು ನಾನು, ನಾನೇ!
ಯಾರು ಸಾಟಿ ನನಗೀ ಜಗದಲ್ಲಿ!
.
ಅಯ್ಯೋ… ಇದೇನು?
ನೆತ್ತಿ ಮೇಲೆ ಅವನು … ವಿರಾಜಮಾನ!
ಎಷ್ಟು ಬೇಗ ಕುಬ್ಜನಾಗಿಬಿಡುತ್ತಿದ್ದೇನೆ ಏಕೆ?
ಕರಗುತ್ತಿದ್ದೇನೆ ನಾನು…
ಒಹ್! ಕರಗಿ ಹೋದೆ..
ಅಹಂಕಾರ ಪಡಬಾರದಿತ್ತು ನಾನು!
.
ಬುದ್ಧಿ ಹೇಳಿ ಸರಿದನೇನು ಅವನು?
ನಾನೀಗ ನಿಧಾನವಾಗಿ ನಡೆಯುತ್ತಿದ್ದೇನೆ
ಅವನೂ ನಿಧಾನವಾಗಿ ಅತ್ತ ಸರಿಯುತ್ತಿದ್ದಾನೆ
ನಾನು ಮತ್ತೆ ಬೆಳೆಯುತ್ತಿದ್ದೇನೆ, ನಿಧಾನವಾಗಿ,
ಆದರೆ ಖಂಡಿತವಾಗಿ!
.
ಅವನು ನಗುತ್ತಿದ್ದಾನೆ.
ನಾನೂ ನಸುನಗುತ್ತಿದ್ದೇನೆ.
ಅವನಿಗೇಕೆ ಮತ್ತೆ ನಾಚಿಕೆ?
ನಾಚಿಕೆ ನನಗಿರಬೇಕಿತ್ತು.
ಮರೆಯಾಗುತ್ತಿದ್ದಾನಲ್ಲ!
.
ನಾನು ಎಲ್ಲಿ?
ಕಾಣುತ್ತಲೇ ಇಲ್ಲವಲ್ಲ!
ಮತ್ತೆ ಕರಗಿ ಹೋದೆನೇ?
ಕತ್ತಲಾವರಿಸುತ್ತಿದೆ ಸುತ್ತ
ಅಹುದು…
ಆಗ ಮೇಲಿದ್ದ ಅವನು,
ಈಗ ಅವನಿಲ್ಲ ಅಲ್ಲಿ…
ಬದಲಿಗೆ,
ಬೆಳಕಿನನುಭೂತಿ  ನೆತ್ತಿಯಲ್ಲಿ!
“ನಾನು?”…
ಕತ್ತಲಲ್ಲಿ ಕರಗಿಹೋಗಿದ್ದೇನೆ
ಈಗ!

.

– ಕೆ.ಆರ್. ಎಸ್. ಮೂರ್ತಿ

4 Responses

  1. Hema says:

    ಈಗ ಅವನಿಲ್ಲ ಅಲ್ಲಿ…
    ಬದಲಿಗೆ,
    ಬೆಳಕಿನನುಭೂತಿ ನೆತ್ತಿಯಲ್ಲಿ!
    “ನಾನು?”…
    ಕತ್ತಲಲ್ಲಿ ಕರಗಿಹೋಗಿದ್ದೇನೆ
    ಈಗ! ”’ … ಕವನದ ವಿನೀತ ಭಾವ, ಇಷ್ಟವಾಯಿತು ..
    .

  2. ಸೂರಿ ಮಳವಳ್ಳಿ says:

    ಬುದ್ಧಿ ಹೇಳಿ ಸರಿದನೇನು ಅವನು?
    ನಾನೀಗ ನಿಧಾನವಾಗಿ ನಡೆಯುತ್ತಿದ್ದೇನೆ
    ಅವನೂ ನಿಧಾನವಾಗಿ ಅತ್ತ ಸರಿಯುತ್ತಿದ್ದಾನೆ
    ನಾನು ಮತ್ತೆ ಬೆಳೆಯುತ್ತಿದ್ದೇನೆ, ನಿಧಾನವಾಗಿ,
    ಆದರೆ ಖಂಡಿತವಾಗಿ!
    ಹೌದು ನಾವು ಬೆಳೆಯಲು ಬೇಕಾದ ಹಿತ, ಮಧುರ ಆದರೆ ಸ್ಪಷ್ಟ ಮಾತು.

  3. Anonymous says:

    ತುಂಬಾ ಸ್ಪಷ್ಟವಾದ ಆದರೆ ಸರಳ ಮಾತುಗಳಲ್ಲಿ ಮೂಡಿ ಬಂದ ಹಿತವಚನ ಸೂರಿ ಮಳ್ವಳ್ಳಿ

  4. Shruthi Sharma says:

    ಕವನವು ಅದೆಷ್ಟೋ ಸ್ತರಗಳಲ್ಲಿ ಚಿಂತನೆಗೆ ಹಚ್ಚಿತು. ಬರೆಯುತ್ತಿರಿ 🙂

Leave a Reply to Anonymous Cancel reply

 Click this button or press Ctrl+G to toggle between Kannada and English

Your email address will not be published.

Follow

Get every new post on this blog delivered to your Inbox.

Join other followers: