ಹೆಣ್ಣು ಜಗದ ಕಣ್ಣು.

ಅಬಲೆಯಾಗುವಳೆಂತು ಹೆಣ್ಣು

ಹೆಣ್ಣಲ್ಲವೇ ಜಗದ ಕಣ್ಣು.

ಹೆಣ್ಣೆಂದರೇತಕೆ ತಾತ್ಸಾರ

ಹೆಣ್ಣಿದ್ದರಲ್ಲವೇ ಸಂಸಾರ.
.

ಸೃಷ್ಟಿಯ ಮೂಲ ಆದಿ ಶಕ್ತಿ

ಸೃಷ್ಟಿಯ ಕನಸಕೂಸು ಪ್ರಕೃತಿ

ಕ್ಷಮಯಾ ಧರಿತ್ರಿ ತ್ಯಾಗಮೂರ್ತಿ

ಮಮತೆ ವಾತ್ಸಲ್ಯಗಳ ಒಡತಿ

ಬಲ್ಲವರಾರು ಇವಳ ನೋವನ್ನ

ತನ್ನದಲ್ಲದ ತಪ್ಪಿಗೂ ತಾನೆ

ಕಷ್ಟಗಳ ನುಂಗಿ ತೋರುವಳು

ಮೊಗದಿ ಮಂದಹಾಸವನು.

ಹೆಣ್ಣು ಮಮತೆಯ ಕಡಲು

ಒಲವಿನ ಒಡಲು ಮಡಿಲು

ತವರ ಪ್ರೀತಿಯ ಮಗಳು

ಪತಿಕುಲವ ಬೆಳಗುದೀಪ.

ಕೋಪತಾಪವನು ಬದಿಗೊತ್ತಿ

ತಾಳ್ಮೆ ಸಹನೆಯನು ಮೇಲೆತ್ತಿ

ಆಸೆ ಆಕಾಂಕ್ಷೆಗಳನು ಒಳಗಿಟ್ಟು

ಸಲಹುವಳೆಲ್ಲರನು ಪ್ರೀತಿಯಿತ್ತು.

ಮಗಳಾಗಿ ಸಹೋದರಿಯಾಗಿ

ಸಖಿಯಾಗಿ ಮಡದಿಯಾಗಿ

ಅಮ್ಮನಾಗಿ ಅಜ್ಜಿಯಾಗಿ

ಪ್ರೀತಿ ರಕ್ಷಣೆಯನು ಕೊಡುವ

ಹೊಣೆ ಹೊತ್ತ ಹೆಣ್ಣೇ

ಪ್ರಜ್ವಲಿಸುತಿರು ಜಗದೊಳಗೆ
ನೀ ಎಂದಿಗೂ ಅಬಲೆಯಲ್ಲ.

– ಅನ್ನಪೂರ್ಣ. ಕುಂಬಳೆ

+15