ಅಪ್ಪನೆಂಬ ಅಪೂರ್ವ ಅಧ್ಯಾಯ

ಅಪ್ಪನೆಂಬ  ಅದ್ಭುತವ
ಏನೆಂದು ಹಾಡಲಿ
ಅದು ಎಂದೂ ಮರೆಯದ
ಪಾತ್ರ ನನ್ನ ಬಾಳಲಿ

ಅಮ್ಮನ ಕರುಳ ಬಂಧ
ಅಪ್ಪನ ನೆರಳ  ಅನುಬಂಧ
ಆ ಎರಡು ತೀರದ ನಡುವೆ
ನಾ ಹರಿವ ನೀರ ನಿನಾದ

ಅಪ್ಪ ಎನ್ನಲು ಏನೋ ಬಲ
ಅಪ್ಪನಿಂದಲೇ ಬದುಕೋ ಛಲ
ಅಪ್ಪ  ಎಂಬ ನಂಬಿಕೆಯ ಸೂರು
ಅಪ್ಪನಿರಲು ನನ್ನ ಮುಟ್ಟುವರಾರು

ಅಪ್ಪ  ನನ್ನ ಬದುಕ ಚೌಕಟ್ಟು
ಅಪ್ಪ ಇರಲು ತಲೆದೋರದು ಬಿಕ್ಕಟ್ಟು
ಅಪ್ಪ  ಎಂಬ ನಿಷ್ಠುರವಾದಿ
ಕಳೆವರು ನನ್ನ ಮನದ ಬೇಗುದಿ

ಈ ಬದುಕಿನ  ಆಧಾರ
ನೀಡಿದರು ಬಾಳ ಸಂಸ್ಕಾರ
ಅಪ್ಪನ ಬೆರಳ ಹಿಡಿದು ನಡೆದು
ಅಪ್ಪನಾಗಿಹೆ ಅವರಂತೆ ನಾನಿಂದು

ಅಪ್ಪ ಇಲ್ಲ  ಎಂಬ ನೋವು
ಯಾವ ಮದ್ದಿಂದಲೂ ಮಾಯದು
ಅಪ್ಪ  ನನ್ನ ಬಾಳಿನ ಬೆಂಬಲ
ಅವರು ಬದುಕಿನ ಅಪೂರ್ವ  ಅಧ್ಯಾಯ

 – ಅಮುಭಾವಜೀವಿ

+9