ಫಿಟ್‌ನೆಸ್‌ : ಒಂದು ಮರುಕಲ್ಪನೆ

ಬಹುಶಃ ಜಗತ್ತಿನಲ್ಲಿಯೇ ಅತಿ ಹೆಚ್ಚು ತಪ್ಪಾಗಿ ಅರ್ಥೈಸಲಾದ ಒಂದು ಪದವೆಂದರೆ ಫಿಟ್‌ನೆಸ್. ತಮಗಿದು ಸ್ಪಷ್ಟವಾಗಿ ಅರ್ಥವಾಗಿದೆ ಎಂದು ಎಲ್ಲರೂ ಅಂದುಕೊಂಡು, ತಪ್ಪಾಗಿ ಅರ್ಥಮಾಡಿಕೊಂಡಿರುವ ಕಾನ್ಸೆಪ್ಟ್ ಕೂಡ ಇದೇ ಎಂದು ನನ್ನ ಅನಿಸಿಕೆ. ದಿನವೂ ಯಾವುದಾದರೊಂದು ಹೊಸ ಫಿಟ್‌ನೆಸ್ ಥಿಯರಿಯನ್ನು ಜಾಹಿರಾತುಗಳಲ್ಲಿ ನೋಡುತ್ತಿರುತ್ತೇವೆ. ಈಗಂತೂ ಅಮ್ಮಂದಿರ, ಅಜ್ಜಿಯಂದಿರ ಬಾಯಲ್ಲೂ ಕೇಳುವಂತಾಗಿದೆ. ಪುರಾವೆಗಳಿಲ್ಲದ ಈ ಕ್ಲೇಮ್‌ಗಳು ಕೋವಿಡ್‌ನಿಂದೀಚೆಗೆ ಬಹಳ ಹೆಚ್ಚಾಗಿವೆ. ಇತ್ತೀಚೆಗೆ, ದಿನವೂ ಸಂಜೆ ಹೊತ್ತಲ್ಲಿ ಮದ್ಯ ಸೇವಿಸುವ ಹವ್ಯಾಸವಿರುವ ನಮ್ಮ ಸಂಬಂಧಿಯೊಬ್ಬರು ‘ಪ್ರೊಟೀನ್ ಹೆಚ್ಚು ತಿಂದರೆ ಕಿಡ್ನಿಗೆ ಸಮಸ್ಯೆಯಾಗುವುದೆಂದೂ, ಆಗಾಗ ದೇಹಕ್ಕೆ ಸುಲಭವಾಗಿ ಜೀರ್ಣವಾಗುವ ಆಹಾರಗಳನ್ನು ಸೇವಿಸಬೇಕೆಂದೂ’ ಸಲಹೆ ನೀಡಿದರು. ನಾನೂ ‘ಆಗಲಿ ಅಂಕಲ್’ ಎಂದು ಹೇಳಿ ಅವರಿಗೆ ಸೆನ್ಸ್ ಆಫ್ ಅಕಂಪ್ಲೀಷಮೆಂಟ್ ಕೊಟ್ಟೆ. ಸರಿಯಾದ, ವೈಜ್ಞಾನಿಕ ಆಧಾರವುಳ್ಳ ಫಿಟ್‌ನೆಸ್ ಸಲಹೆಗಳನ್ನು ಕೊಡುವ ಮಂದಿಯನ್ನು ಹುಡುಕುವುದೆಂದರೆ ಪರ್ವತದಲ್ಲಿ ಸೂಜಿ ಹುಡುಕಿದಂತೆ. ಈಗಂತೂ ಸೋಷಿಯಲ್ ಮೀಡಿಯಾ ಕಾಲ. ಇದರಲ್ಲಿ ಎಲ್ಲರೂ ನಮ್ಮ ಜೀವನವನ್ನು ಇನ್ನೂ ಉತ್ತಮಗೊಳಿಸುವ ಹಲವು ಸಲಹೆ, ಉಪದೇಶ ಮತ್ತು ಟಿಪ್ಸುಗಳನ್ನು ಕೊಟ್ಟು ಕಂಗಾಲಾಗಿಸುತ್ತಾರೆ. ಸರಿಯಾದ ಫಿಟ್‌ನೆಸ್ ಕಂಟೆಂಟ್ ಅನ್ನು ಕನ್ನಡ ಭಾಷೆಯಲ್ಲಿ ನಾನಂತೂ ಇದುವರೆಗೂ ನೋಡಲಾಗಿಲ್ಲ.

ಮೊದಲ ಬಾರಿ ಜಿಮ್‌ಗೆ ಹೋದಾಗ ನನಗಾಗ ಹದಿನಾಲ್ಕು ವರ್ಷ. ಆಗ ತಾನೇ ಹೈಸ್ಕೂಲು ಮುಗಿಸಿದ್ದ ನನಗೆ ಜಿಮ್ ಗೆ ಹೋಗಿ ಚೆನ್ನಾಗಿ ಬಾಡಿ ಬಿಲ್ಡಿಂಗ್ ಮಾಡಿ ಕಾಲೇಜಿನಲ್ಲಿ ಒಂದು ಮರ್ಯಾದೆಯನ್ನು ಪಡೆಯಬೇಕೆಂಬ ಭ್ರಾಮಕ ಕಲ್ಪನೆ. ಬೇಸಿಗೆ ರಜೆಯಲ್ಲಿ ಅಲ್ಲೇ ಹತ್ತಿರದಲ್ಲಿದ್ದ ಜಿಮ್ ಒಂದಕ್ಕೆ ಪ್ರವೇಶ ಪಡೆದು, ತಿಂಗಳಿಗೆ ಇನ್ನೂರೈವತ್ತು ಶುಲ್ಕ ಪಾವತಿಸಿದ್ದೆ. ಆ ಜಿಮ್ನ ಓನರ್ ಆದವರಿಗೆ ನನ್ನ ತಂದೆಯ ಪರಿಚಯ ಇದ್ದುದರಿಂದ ಪ್ರವೇಶಾತಿ ಶುಲ್ಕ ಬೇಡ ಎಂದು ದೊಡ್ಡ ಮನಸ್ಸು ಮಾಡಿದರು. ಆತನ ಬಿಸಿನೆಸ್‌ಗೆ ಹೊಡೆತ ಬೀಳಬಹುದು ಎಂದು ಗೊತ್ತಿದ್ದರೂ ಹದಿನಾಲ್ಕನೇ ವಯಸ್ಸಿಗೆ ಜಿಮ್ಮಲ್ಲಿ ವ್ಯಾಯಾಮ ಮಾಡುವುದರಿಂದ ಬೆಳವಣಿಗೆ ಕುಂಠಿತವಾಗುವುದೆಂದೂ ಶೋಲ್ಡರ್‌ ಪ್ರೆಸ್‌ನಂತಹ ವ್ಯಾಯಾಮಗಳನ್ನು ಮಾಡಬಾರದೆಂದೂ ಸಲಹೆ ನೀಡಿ ಏನೋ ದೊಡ್ಡ ರಿಸ್ಕ್ ತೆಗೆದುಕೊಂಡ ಹಾಗೆ ನನ್ನನ್ನು ಸೇರಿಸಿಕೊಂಡರು. ವಾಸ್ತವವಾಗಿ ಹಾಗೇನು ಇಲ್ಲ ಎಂಬುದೀಗ ನನಗೆ ಮನದಟ್ಟಾಗಿದೆ. ನಾನು ಈಗ ಹೋಗುವ ಜಿಮ್ಮಿಗೆ ಪೋಷಕರು ತಮ್ಮ ಮಕ್ಕಳನ್ನು ಕರೆತರುವುದು ಸರ್ವೇ ಸಾಮಾನ್ಯವಾಗಿದೆ.

ಆ ಅಂಗಸಾಧನೋಪಕರಣಗಳ ಮತ್ತು ಅಲ್ಲಿನ ವಾತಾವರಣದ ಬಗ್ಗೆ ಕೊಂಚವೂ ಜ್ಞಾನ ಇಲ್ಲದಿದ್ದ ನನಗೆ, ಅಲ್ಲಿ ಅವರು ಫುಲ್ ವಾಲ್ಯೂಮ್‌ನಲ್ಲಿ ಕೇಳಿಸುತ್ತಿದ್ದ ಹಿಮೇಶ್ ರೇಶಿಮಿಯಾನ ಹಾಡುಗಳು ಇಷ್ಟವಾಗುತ್ತಿದ್ದವು. ಏನೋ ಅವರಿವರು ಮಾಡುತ್ತಿದುದ್ದನ್ನು ನೋಡಿ ಕೆಲವು ವ್ಯಾಯಾಮಗಳನ್ನು ಸುಮಾರಾಗಿ ಕಲಿಯುವ ಹೊತ್ತಿಗೆ ಬೇಸಿಗೆ ರಜೆಗಳು ಮುಗಿದು ಕಾಲೇಜು ಶುರು ಆಗಿ ಹೋಯಿತು. ನಾನು ಪಿಯುಸಿಯಲ್ಲಿ ಸೈನ್ಸ್ ವಿದ್ಯಾರ್ಥಿಯಾಗಿದ್ದರಿಂದ ಜಿಮ್ ಅನ್ನು ಮುಂದುವರಿಸಲು ಸಮಯ ಸಿಗದೇ ಹೋದ ಕಾರಣ ಅನಿವಾರ್ಯವಾಗಿ ನಿಲ್ಲಿಸಬೇಕಾಯಿತು. 

ಕಾಲೇಜಿನಲ್ಲಿ ಮರ್ಯಾದೆ ಮೇನ್‌ಟೇನ್‌ ಮಾಡಬೇಕೆಂಬ ಈ ವಿಫಲ ಪ್ರಯತ್ನದ ನಂತರ ನಾನು ಫಿಟ್‌ನೆಸ್ ಬಗ್ಗೆ ಮತ್ತೆ ಗಮನ ಹರಿಸಿದ್ದು ಎರಡನೇ ವರ್ಷದ ಇಂಜಿನಿಯರಿಂಗ್‌ನಲ್ಲಿರುವಾಗ. ಆಗಲೇ ನನ್ನ ಬಳಿ ಒಂದು ಬೈಕ್ ಇತ್ತು. ಕಾಲೇಜಿನ ಸಮಯ ಮುಗಿದು ಜಿಮ್‌ಗೆ ಹೋಗುವುದು ಅಷ್ಟೊಂದು ಕಷ್ಟವಾಗಿರಲಿಲ್ಲ. ಅಲ್ಲೇ ಮನೆ ಹತ್ತಿರದ ಜಿಮ್ ಗೆ ಜಾಯನ್‌ ಆಗಿ ಪ್ರತಿದಿನ ತಪ್ಪದೆ ಹೋಗಲು ಆರಂಭಿಸಿದೆ. ಪರೀಕ್ಷೆಯ ಸಮಯದಲ್ಲಿ ಹೋಗದೆ ಇದ್ದಿದ್ದು ಬಿಟ್ಟರೆ ಕಾಲೇಜು ದಿನಗಳಲ್ಲಿ ಹೆಚ್ಚೇನೂ ತಪ್ಪಿಸುತ್ತಿರಲಿಲ್ಲ. ಆದರೆ ಜಿಮ್‌ಗೆ ಹೋಗಿ ವರ್ಕೌಟ್ ಮಾಡಬೇಕು ಎಂಬುದು ಮನಸ್ಸಿನಲ್ಲಿತ್ತೇ ಹೊರತು ಅದಕ್ಕೆ ಪೂರಕವಾಗಿ ಯಾವ ಆಹಾರ? ಹೇಗೆ ಸೇವಿಸಬೇಕು? ಎಷ್ಟು ನಿದ್ದೆ ಮಾಡಬೇಕು ಎಂಬುದೆಲ್ಲ ಖಂಡಿತ ಗೊತ್ತಿರಲಿಲ್ಲ. ನಾನು ಶುದ್ಧ ಸಸ್ಯಾಹಾರಿಯಾದ ಕಾರಣ, ಎರಡು ವರ್ಷ ಕಷ್ಟ ಪಟ್ಟರೂ, ಆಹಾರದಲ್ಲಿ ಪ್ರೊಟೀನ್ ಚೆನ್ನಾಗಿ ತೆಗೆದುಕೊಳ್ಳದೆ ಇದ್ದುದರಿಂದ ಅಂತಹ ನಿರೀಕ್ಷಿತ ಫಲಿತ ದೊರಕಲಿಲ್ಲ.

ಕೋವಿಡ್‌ನಿಂದೀಚೆಗೆ, ಕಳೆದ ಐದು ವರ್ಷಗಳಿಂದ ಫಿಟ್‌ನೆಸ್‌ ಅನ್ನು ಸಾಕಷ್ಟು ಸೀರಿಯಸ್ ಆಗಿ ತೆಗೆದುಕೊಂಡೆ. ಎಷ್ಟು ಸಾಧ್ಯವೋ ಅಷ್ಟು ಆಹಾರದಲ್ಲಿ ಡಿಸಿಪ್ಲಿನ್ ಕಂಡುಕೊಂಡೆ. ನಿಧಾನವಾಗಿ ನನಗೆ  ಫುಡ್‌ ಕಾರ್ವಿಂಗ್ಸ್‌ ಮಾಯವಾಗತೊಡಗಿತು. ನಾನು ಇಂಗ್ಲೆಂಡಿಗೆ ಮೂವ್ ಆದ ಮೇಲಂತೂ ನಾನೇ ನನ್ನ ಅಡುಗೆಮನೆಯ ಇನ್‌ಚಾರ್ಜ್ ಇದ್ದಿದ್ದರಿಂದ, ನನಗೆ ಏನು ಬೇಕೋ ಎಷ್ಟು ಬೇಕೋ ಅಷ್ಟನ್ನು ಮಾಡಿಕೊಳ್ಳಲು ಸುಲಭವಾಯಿತು. ಒಂದು ವರ್ಷದ ಕೆಳಗೆ, ಲೆವೆಲ್‌ 2 ಪರ್ಸನಲ್‌ ಟ್ರೈನಿಂಗ್ ಮತ್ತು ಸ್ಪೋರ್ಟ್ಸ್‌ ನ್ಯುಟ್ರಿಷಿಯನ್‌ ಎಂಬ ಕೋರ್ಸ್‌ ಅನ್ನು ಸಹ ಪಾಸ್‌ ಮಾಡಿಕೊಂಡೆ. ಅದರಿಂದ ನನಗೆ ಸಂಪಾದನೆ ಆಗದಿದ್ದರೂ, ನನ್ನ ಜೀವನದ ಒಂದು ಮುಖ್ಯ ಭಾಗವಾಗಿರುವ ಫಿಟ್‌ನೆಸ್‌ಗೆ ಗೌರವ ಸಲ್ಲಿಸಲು ಕಲಿಕಾರ್ಥಿಯಾಗಿ ಆ ಸರ್ಟಿಫಿಕೇಟ್ ಪಡೆದೆ. ಸುಮಾರು ಐದು ವರ್ಷಗಳ ಇಂಟೆನ್ಸ್‌ ಡಿಸಪ್ಲಿನ್ ಮತ್ತು ಕನ್ಸಿಸ್ಟೆನ್ಸಿಯು ಇಂದು ಫಲಿತಾಂಶ ನೀಡಿದೆ. ಇಂದಿಗೂ ಶುದ್ಧ ಸಸ್ಯಾಹಾರಿಯಾಗಿರುವ ನನ್ನ ದೇಹದ ಕೊಬ್ಬಿನಂಶ ಕೇವಲ 15.2% ಮತ್ತು 72 ಕೆಜಿ ತೂಕವಿರುವ ನನ್ನಲ್ಲಿ 35 ಕೆಜಿಯಷ್ಟು ಮಜ಼ಲ್‌ ಮಾಸ್‌ (ಸ್ನಾಯುವಿನ ದ್ರವ್ಯರಾಶಿ) ಇದೆ.

ನಮ್ಮಲ್ಲಿ ಬಹಳಷ್ಟು ಜನರಿಗೆ ಜಿಮ್‌ಗೆ ಹೋಗುವುದೆಂದರೆ ಸಣ್ಣ ಆಗಲು ಅಂದರೆ ತೂಕ ಕಳೆದುಕೊಂಡು ಸ್ಮಾರ್ಟ್‌ ಆಗಲು ಮಾತ್ರ ಎಂಬ ಭಾವನೆ ಇದೆ. ವಾಸ್ತವವೇನೆಂದರೆ, ಜಿಮ್ ಎಂಬುದೊಂದು ಕೇವಲ ವ್ಯಾಯಾಮ ಶಾಲೆ ಅಷ್ಟೇ. ಜಿಮ್‌ನಲ್ಲಿ ವ್ಹೇಟ್‌ ಟ್ರೈನ್‌ ಮಾಡುವುದರಿಂದ ದೇಹದಲ್ಲಿನ ಸ್ನಾಯುಗಳು ಬೆಳವಣಿಗೆ ಆಗುತ್ತವೆ, ಪಚನಕ್ರಿಯೆ ಬೂಸ್ಟ್ ಆಗಿ, ಕೊಬ್ಬು ಕರಗುತ್ತದೆ, ಮೈಕಟ್ಟು  ಕೇವಲ ಚೆನ್ನಾಗಿ ಕಾಣುವುದಷ್ಟೇ ಅಲ್ಲದೆ, ಕೀಲುಗಳು ಹಾಗೂ ಅವುಗಳು ಪರಸ್ಪರ ಘರ್ಷಣೆ, ಡಿಸ್‌ಪ್ಲೇಸ್‌ ಆಗದಂತೆ ತಡೆದು, ವೃದ್ಧಾಪ್ಯದಲ್ಲಿ ಮೂಳೆ ಸಂಬಂಧಿತ ಕಾಯಿಲೆಗಳು ಬರದಂತೆ ನೆರವಾಗುತ್ತದೆ.

ವ್ಹೈಟ್‌ ಟ್ರೈನಿಂಗ್‌ ಅಥವಾ ಸ್ಟ್ರೆನ್ತ್‌ ಟ್ರೈನಿಂಗ್‌ ಎಂದರೆ ಇಷ್ಟೇ : ನಿಯಮಿತವಾಗಿ ದೇಹದಲ್ಲಿನ ಸ್ನಾಯುಗಳನ್ನು ಕೆಲಸಕ್ಕೆ ಒಡ್ಡುವುದು. ದೇಹದಲ್ಲಿನ  ಸ್ನಾಯುಗಳು ಮಜ಼ಲ್‌ ಫೈಬರ್ ಎಂಬ ಅತಿ ಚಿಕ್ಕ ದಾರದಂಥ ಎಳೆಗಳಿಂದ ಆಗಿವೆ. ಒಂದು ಗ್ರೂಪ್ನ ಸ್ನಾಯುಗಳಿಂದ, ಉದಾಹರಣೆಗೆ, ತೋಳುಗಳಿಂದ ಭಾರ ಎತ್ತುವುದರಿಂದ ಮಜ಼ಲ್‌ ಫೈಬರ್‌ನಲ್ಲಿ ಸಣ್ಣ ಗಾಯಗಳಾಗುತ್ತವೆ (ಮೈಕ್ರೋ ಟಿಯರ್ಸ್‌). ಆಗ ಮಜ಼ಲ್‌ ಫೈಬರ್‌ನಲ್ಲಿರುವ ಸ್ಟೆಮ್‌ ಸೆಲ್‌ಗಳು ತಕ್ಷಣ ಅಂಥವನ್ನು ರಿಪೇರಿ ಮಾಡಲು ಸಜ್ಜಾಗುತ್ತವೆ. ಇದನ್ನು ರಿಪೇರಿ ಮಾಡಲು ಬೇಕಾಗಿರುವ ಅತ್ಯಮೂಲ್ಯ ಅಂಶವೆಂದರೆ ಪ್ರೊಟೀನ್. ಇದರಲ್ಲಿರುವ ಅಮೈನೊ ಆಸಿಡ್‌ ಎಂಬ ರಾಸಾಯನಿಕವು ಮಜ಼ಲ್‌ ಫೈಬರ್‌ಗಳನ್ನು ರಿಪೇರಿ ಮಾಡುತ್ತವೆ. ವರ್ಕೌಟ್ ಆದ ನಂತರ ದೇಹ ವಿಶ್ರಾಂತಿ ತೆಗೆದುಕೊಳ್ಳುವಾಗ ಈ ಪ್ರಕ್ರಿಯೆ ನಡೆಯುತ್ತದೆ. ನಮ್ಮ ದೇಹ ಎಷ್ಟು ಬುದ್ಧಿವಂತ ಎಂದರೆ, ಪ್ರತೀ ಬಾರಿ ಇಂಥ ಮೈಕ್ರೋ ಟಿಯರ್ಸ್‌ ಆದಾಗ ಮುಂದಿನ ಬಾರಿ ಹೆಚ್ಚು ಹೊರೆಯಾಗದಂತೆ ತುಸು ಚೆನ್ನಾಗಿಯೇ ರಿಪೇರಿ ಮಾಡುತ್ತದೆ. ಹಾಗಾಗಿ ಪ್ರತಿ ಬಾರಿ ಈ ಪ್ರಕ್ರಿಯೆ ನಡೆದಾಗಲೂ ಸ್ನಾಯುಗಳು ಹೆಚ್ಚು ಸದೃಢವಾಗುತ್ತವೆ, ಇನ್ನು ಸ್ವಲ್ಪ ದೊಡ್ಡದಾಗಿ, ದೃಢವಾಗಿ ಬೆಳೆಯುತ್ತವೆ. ಇದರಿಂದಾಗಿ, ಇನ್ನೂ ಹೆಚ್ಚು ಹೆಚ್ಚು ಭಾರ ಎತ್ತುವಂತಾಗುತ್ತದೆ. ಇದನ್ನು ಹೈಪರ್‌ಟ್ರೋಫಿ ಎಂದು ಕರೆಯುತ್ತಾರೆ. ಕೇವಲ 30 ಕೆಜಿಯಷ್ಟು ಡೆಡ್‌ಲಿಫ್ಟ್‌ ಮಾಡಲು ಕಷ್ಟಪಡುತ್ತಿದ್ದ ನಾನು, ಇವತ್ತು ಸಾಕಷ್ಟು ಆರಾಮವಾಗಿ 170 ಕೆಜಿ ಭಾರ ಎತ್ತಬಲ್ಲವನಾಗಿದ್ದೇನೆ. ಇದು ಜಿಮ್‌ನಲ್ಲಿ ತರಬೇತಿ ಪಡೆದ ಮತ್ತು ಅಂಗಸಾಧನೋಪಕರಣಗಳನ್ನು ಬಳಸಲು ಕಲಿತದ್ದರ ಫಲಿತಾಂಶ. ಜೊತೆಗೆ ಆಹಾರದಲ್ಲಿ ವೈಜ್ಞಾನಿಕತೆ ಅಳವಡಿಸಿಕೊಂಡಿದ್ದು.

ಪ್ರೊಟೀನ್ ಅಂಶವಿರುವ ಆಹಾರವನ್ನು ಸಾಕಷ್ಟು ಪ್ರಮಾಣದಲ್ಲಿ ದಿನವೂ ತೆಗೆದುಕೊಳ್ಳುವುದು ತುಂಬಾ ಮುಖ್ಯ. ಕೇವಲ ಜಿಮ್‌ನಲ್ಲಿ ಭಾರ ಎತ್ತುವವರು ಮಾತ್ರ ಪ್ರೊಟೀನ್ ತೆಗೆದುಕೊಳ್ಳಬೇಕೆಂದಿಲ್ಲ. ದಿನದಲ್ಲಿ ಯಾವುದೇ ವ್ಯಾಯಾಮ ಮಾಡದಿದ್ದರೂ, ದೇಹಕ್ಕೆ ಪ್ರೊಟೀನಿನ ಆವಶ್ಯಕತೆಯಿದೆ. ಒಂದು ಸ್ಟ್ಯಾಂಡರ್ಡ್  ಅಂದರೆ ಅಳತೆಗೋಲಿನ ಪ್ರಕಾರ, ಒಬ್ಬ ಮನುಷ್ಯ ಯಾವುದೇ ವ್ಯಾಯಾಮ ಮಾಡದಿದ್ದರೂ, ದೇಹದ ಪ್ರತೀ ಕೆಜಿ ತೂಕದ 0.8 ಗ್ರಾಂ ಪ್ರೊಟೀನನ್ನು ದಿನವೂ ಸೇವಿಸಬೇಕು. ಅಂದರೆ, ಒಬ್ಬ ಮನುಷ್ಯ 70 ಕೆಜಿ ತೂಗುತ್ತಿದ್ದರೆ, 70 x 0.8 ರಷ್ಟು ಅಂದರೆ ಸುಮಾರು 56 ಗ್ರಾಂ ಪ್ರೊಟೀನು ಬೇಕಾಗುತ್ತದೆ. ಬಹಳಷ್ಟು ಆಕ್ಟಿವ್ ಆಗಿದ್ದರೆ, 1.2 – 1.4 ಗ್ರಾಂ ಹಾಗೂ ಜಿಮ್‌ನಲ್ಲಿ ಕಸರತ್ತು ಮಾಡುವವರಾಗಿದ್ದರೆ, 1.6 – 2 ಗ್ರಾಂ ತನಕ ತೆಗೆದುಕೊಳ್ಳಬಹುದು. ಇದು ಜಗತ್ತಿನ ಸ್ಟ್ಯಾಂಡರ್ಡ್, ಮಹಿಳೆಯರಿಗೆ ಬೇರೆ ಸ್ಟ್ಯಾಂಡರ್ಡ್ ಇದೆ – ದೇಹಕ್ಕೆ ಅನುಗುಣವಾಗಿ, ವೈದ್ಯರ ಸಲಹೆ ಪಡೆದು ಅಳತೆಯನ್ನು ನಿರ್ಧರಿಸಿಕೊಳ್ಳಬೇಕು.

ಮಾಂಸಾಹಾರದಿಂದ ಮತ್ತು ಸಸ್ಯಾಹಾರದಿಂದ ದೊರಕುವ ಪ್ರೊಟೀನುಗಳಲ್ಲಿ ವ್ಯತ್ಯಾಸವಿದೆ. ಮಾಂಸಾಹಾರದ ಪ್ರೊಟೀನಿನಲ್ಲಿ ಸಾಮಾನ್ಯವಾಗಿ ಎಲ್ಲ ಒಂಬತ್ತು ಬಗೆಯ ಅಮೈನೋ ಆಮ್ಲಗಳು ದೊರಕುತ್ತವೆ. ಹೀಗಾಗಿ ಇದನ್ನು ಪರಿಪೂರ್ಣ ಪ್ರೊಟೀನ್ ಆಕರವಾಗಿ ಪರಿಗಣಿಸಬಹುದು. ಸಸ್ಯಾಹಾರ ಅಥವಾ ಪ್ಲಾಂಟ್‌ ಬೇಸ್ಡ್‌ ಪ್ರೊಟೀನ್ ಆಕರಗಳಲ್ಲಿ ಈ ಎಲ್ಲ ಬಗೆಯ ಅಮೈನೋ ಆಸಿಡ್‌ಗಳಿರುವುದಿಲ್ಲ. ಸಸ್ಯಾಹಾರಿಯಾಗಿದ್ದವರು ಮಜ಼ಲ್‌ ಬಿಲ್ಡ್‌ ಮಾಡಲು ಸಾಧ್ಯವೇ ಆಗದು ಎಂಬುದು ತಪ್ಪು. ಸ್ವಲ್ಪ ಕಷ್ಟ ಪಡಬೇಕು ಮತ್ತು ರುಚಿಗೆ ರಾಜಿಯಾಗಬೇಕು. ಕೇವಲ ಪ್ರೊಟೀನನ್ನು ಸರಿಯಾಗಿ ತೆಗೆದುಕೊಂಡರಷ್ಟೇ ಸಾಲದು. ಇದಕ್ಕೆ ಪೂರಕವಾಗಿ ಫೈಬರ್, ಕಾಂಪ್ಲೆಕ್ಸ್ ಕಾರ್ಬೋಹೈಡ್ರೈಟ್ ಮತ್ತು ಆರೋಗ್ಯಕರ ಕೊಬ್ಬನ್ನು (ಹೆಲ್ತಿ ಫ್ಯಾಟ್ಸ್‌) ಆಹಾರದಲ್ಲಿ ಅಳವಡಿಸಿಕೊಳ್ಳಬೇಕು. ಅವುಗಳನ್ನು ದಿನದ ಯಾವ ಸಮಯದಲ್ಲಿ ತೆಗೆದುಕೊಳ್ಳಬೇಕು ಎಂಬುದಕ್ಕೆ ಆಯುರ್ವೇದದಲ್ಲಿ ಸ್ಪಷ್ಟ ಉಲ್ಲೇಖಗಳಿವೆ. ಇವೆಲ್ಲವೂ ಒಂದು ಊಟದಲ್ಲಿ ಇದ್ದರೆ, ಅದನ್ನು ಪರಿಪೂರ್ಣ ಆಹಾರ (ಕಂಪ್ಲೀಟ್‌ ಮೀಲ್) ಎಂದು ಕರೆಯಬಹುದು.

ಒಬ್ಬ ಮನುಷ್ಯನ ದೇಹ ಪ್ರಕೃತಿ ಮತ್ತು ಆತನ ಪ್ರತಿದಿನದ ಚಟುವಟಿಕೆಗಳಿಗೆ ಅನುಗುಣವಾಗಿ ಪ್ರತಿದಿನ ಎಷ್ಟು ಕ್ಯಾಲೊರಿಗಳನ್ನು ಸೇವಿಸಬೇಕು? ಎಂದು ಕಂಡು ಹಿಡಿಯಬಹುದು. ಇದನ್ನು ಮೇನ್‌ಟೇನ್‌ನೆನ್ಸ್‌ ಕ್ಯಾಲೊರಿಸ್‌ ಎಂದು ಕರೆಯುತ್ತಾರೆ. ಇಂಟರ್ನೆಟ್‌ನಲ್ಲಿ ಕ್ಯಾಲೋರಿ ಕ್ಯಾಲ್ಕುಲೇಟರ್ ಎಂದು ಸರ್ಚ್ ಮಾಡಿದರೆ ಸಿಗುತ್ತದೆ. ಅದಕ್ಕಿಂತ ಕಡಿಮೆ ಕ್ಯಾಲೊರಿಗಳನ್ನು ಸೇವಿಸಿ, ಪ್ರೊಟೀನ್ ಮತ್ತು ಉಳಿದ ಮ್ಯಾಕ್ರೋ ನ್ಯೂಟ್ರಿಷಿಯಸ್‌ಗಳನ್ನು ಸರಿಯಾದ ಪ್ರಮಾಣದಲ್ಲಿ ಸೇವಿಸುತ್ತಾ, ಅಚ್ಚುಕಟ್ಟಾಗಿ ನಿಗದಿತ ವ್ಯಾಯಾಮ ಮಾಡಿದರೆ ದೇಹದ ತೂಕ ಕಡಿಮೆಯಾಗಿ, ಸ್ನಾಯುಗಳು ಗಟ್ಟಿಯಾಗುತ್ತವೆ. ವೈಜ್ಞಾನಿಕವಾಗಿ ತೂಕ ಕಡಿಮೆ ಮಾಡಿಕೊಳ್ಳುವ ಏಕೈಕ ವಿಧಾನವಿದು. ವ್ಯಾಯಾಮವಿಲ್ಲದ, ಆಹಾರದಲ್ಲಿ ಶಿಸ್ತೇ ಇಲ್ಲದ ತೂಕ ಕಡಿಮೆ ಮಾಡುವ ವಿಧಾನಗಳನ್ನು ಪರಿಚಯಿಸುವ ಬಹಳಷ್ಟು ಜಾಹಿರಾತುಗಳನ್ನು ನಾವು ನೋಡುತ್ತಿರುತ್ತೇವೆ. ಖಂಡಿತವಾಗಲೂ ಇಂಥವು ಫಲಿತ ನೀಡುವುದಿಲ್ಲ.

ಮೇನ್‌ಟೆನ್‌ನೆಸ್‌ ಕ್ಯಾಲೊರಿಗಿಂತಲೂ ಹೆಚ್ಚು ಪ್ರಮಾಣದಲ್ಲಿ ಸೇವಿಸಿದರೆ ತೂಕ ಹೆಚ್ಚಾಗುತ್ತದೆ. ದೇಹಕ್ಕೆ ಬೇಕಾಗಿರುವುದು ಎನರ್ಜಿ – ಅದಕ್ಕೆ ಪ್ರಮಖವಾಗಿ ಬೇಕಾಗಿರುವುದು ಸಕ್ಕರೆ. ಕಾರ್ಬೋಹೈಡ್ರೇಟ್‌ಗಳು ಸಾಮಾನ್ಯವಾಗಿ ದೇಹಕ್ಕೆ ಬೇಕಾಗಿರುವ ಎನರ್ಜಿಯನ್ನು ಒದಗಿಸುತ್ತವೆ. ನಾವು ತೆಗೆದುಕೊಳ್ಳುವ ಬಹುತೇಕ ಆಹಾರಗಳು ಕಾರ್ಬೋಹೈಡ್ರೇಟ್‌ನಿಂದ ಆಗಿವೆ. ಬ್ರೆಡ್, ಅನ್ನ, ಚಪಾತಿ, ಪಾಸ್ಟಾ ಎಲ್ಲವು ಕಾರ್ಬೋಹೈಡ್ರೇಟ್ ಆಕರಗಳು. ಎರಡು ಬಗೆಯ ಕಾರ್ಬೋಹೈಡ್ರೇಟ್‌ಗಳಿವೆ. ಸಿಂಪಲ್ ಮತ್ತು ಕಾಂಪ್ಲೆಕ್ಸ್ ಎಂದು ಅವನ್ನು ವಿಭಾಗಿಸಬಹುದು.

ದೇಹ ಇದನ್ನು ಎಷ್ಟು ಬೇಗ ಗ್ಲುಕೋಸ್ ಆಗಿ ಪರಿವರ್ತನೆ ಮಾಡುತ್ತದೆ ಎನ್ನುವುದರ ಮೇಲೆ ಸಿಂಪಲ್ ಮತ್ತು ಕಾಂಪ್ಲೆಕ್ಸ್ ಕಾರ್ಬೋಹೈಡ್ರೇಟ್‌ಗಳನ್ನು ವಿಂಗಡಣೆ ಮಾಡಲಾಗಿದೆ. ಬೇಗ ಪರಿವರ್ತನೆಯಾದರೆ, ಅದು ಬೇಗನೆ ಎನರ್ಜಿ ಆಗಿ ಬದಲಾಗಿದೆ ಎಂದರ್ಥ. ಅದನ್ನು ಬೇಗ ಖರ್ಚು ಮಾಡದಿದ್ದರೆ, ರಕ್ತದಲ್ಲಿ ಸಕ್ಕರೆಯ ಪ್ರಮಾಣ ಜಾಸ್ತಿಯಾಗುತ್ತದೆ. ಇದನ್ನು ನಿಭಾಯಿಸಲು, ಇನ್ಸುಲಿನ್ ಬಿಡುಗಡೆಯಾಗುತ್ತದೆ (ಇನ್ಸುಲಿನ್‌ ಸ್ಪೈಕ್). ಮಿಕ್ಕ ಗ್ಲುಕೋಸ್ ಗ್ಲೈಕೊಜೆನ್ ಆಗಿ ಬದಲಾಗಿ ಲಿವರಿನಲ್ಲಿ, ಸ್ನಾಯುಗಳಲ್ಲಿ ಶೇಖರಿಸಲ್ಪಡುತ್ತವೆ. ಇದಕ್ಕೂ ಮೀರಿದರೆ, ಇದನ್ನು ದೇಹ ತನ್ನ ಸೇವಿಂಗ್ಸ್ ಅಕೌಂಟಿನಲ್ಲಿ ಶೇಖರಿಸುತ್ತದೆ. ಆ ಸೇವಿಂಗ್ಸ್ ಅಕೌಂಟೇ ಫ್ಯಾಟು. ಸಿಂಪಲ್‌ ಕಾರ್ಬ್ಸ್‌ಗಳ ಜೊತೆಗೆ, ಆದಷ್ಟು ಕಾಂಪ್ಲೆಕ್ಸ್‌ ಕಾರ್ಬ್ಸ್‌ ಅನ್ನು ಸೇವಿಸುವುದರಿಂದಲೂ ಸಾಕಷ್ಟು ನಾರಿನಾಂಶ (ಫೈಬರ್ಸ್‌) ವನ್ನು ಜೊತೆಗೂಡಿಸುವುದರಿಂದಲೂ ಇದರಿಂದ ಬಚಾವಾಗಬಹುದು.

ಕೇವಲ ಇದಿಷ್ಟೇ ಅಲ್ಲದೆ, ಮೈಕ್ರೋ ನ್ಯೂಟ್ರಿಷಿಯಸ್ ಅಂದರೆ, ವಿಟಮಿನ್ಸ್, ಮಿನರಲ್ಸ್ ಕೂಡ ದೇಹಕ್ಕೆ ಬೇಕಾಗುತ್ತದೆ. ಇವೆಲ್ಲವನ್ನು ಸರಿಯಾದ ಪ್ರಮಾಣದಲ್ಲಿ ಸರಿಯಾದ ಸಮಯದಲ್ಲಿ ಸೇವಿಸಿ, ನಿಗದಿತ ಪ್ರಮಾಣದಲ್ಲಿ ವ್ಯಾಯಾಮ ಮಾಡಿದರಷ್ಟೇ ಆರೋಗ್ಯವಾಗಿರಲು ಸಾಧ್ಯ . ಇದಕ್ಕೆ ಯಾವುದೇ ಅಡ್ಡದಾರಿ (ಶಾರ್ಟ್‌ ಕಟ್)‌ ಗಳಿಲ್ಲ; ಇದುವರೆಗೂ ಕಂಡು ಹಿಡಿದಿಲ್ಲ! ಯಾವುದೇ ಒಂದು ಕಾನ್ಸೆಪ್ಟ್ ಅಭ್ಯಾಸವಾಗಿ ಬದಲಾಗಲು ಎರಡರಿಂದ ನಾಲ್ಕು ತಿಂಗಳುಗಳು ಬೇಕೆಂದು ಮಾನಸಿಕ ಆರೋಗ್ಯ ತಜ್ಞರು ಅಭಿಪ್ರಾಯ ಪಡುತ್ತಾರೆ. ಆರೋಗ್ಯಕರ ಜೀವನಶೈಲಿಯನ್ನು ಒಂದು ಬಾರಿ ಮೈಗೂಡಿಸಿಕೊಂಡರೆ, ಅದರಿಂದ ಹೊರಬರಲು ಮನಸ್ಸು ಒಪ್ಪುವುದಿಲ್ಲ! ನಾನು ಮೈನಸ್‌ ಎಂಟು (-08) ಡಿಗ್ರಿ ಸೆಲ್ಸಿಯಸ್‌ನಲ್ಲೂ ಸೈಕಲ್ ಚಲಾಯಿಸಿಕೊಂಡು ಜಿಮ್‌ಗೆ ಹೋಗಿದ್ದಿದೆ. ನನ್ನ ಕೆಲಸದ ನಿಮಿತ್ತ ಅದರೊಂದು ಭಾಗವಾಗಿ, ಹಲವಾರು ದೇಶಗಳನ್ನು ಸುತ್ತುಬೇಕಾಗಿದ್ದು, ಎಲ್ಲಿಗೆ ಹೋದರೂ ನನ್ನ ಫಿಟ್‌ನೆಸ್ ರೊಟೀನನ್ನು ಬಿಟ್ಟು ಕೊಡುವುದಿಲ್ಲ. ನನಗಿದು ಹೆಮ್ಮೆ ಮತ್ತು ಅಭಿಮಾನದ ಸಂಗತಿ. ಕೊನೆಗೆ ನಾನು ಕಲಿತದ್ದಿಷ್ಟೇ: ಫಿಟ್‌ನೆಸ್ ಸೈನ್ಸ್ ಗೊತ್ತಿದ್ದರೆ, ಫಿಟ್‌ನೆಸ್ ಅಡ್ವೈಸಿನ ಆವಶ್ಯಕತೆ ಖಂಡಿತ ಬೇಕಾಗುವುದಿಲ್ಲ. ನಾವೇ ನಮ್ಮ ಪರ್ಸನಲ್‌ ಟ್ರೈನರ್ ಆಗಬಹುದು.

–ಚಾರು ಮಂಜುರಾಜ್‌, ವಾರಿಕ್‌, ಇಂಗ್ಲೆಂಡ್‌