ಅಕ್ಷರದಕ್ಷರ ದೀವಟಿಗೆ
ಅಜನ ಸಂಕಲ್ಪಕೆ ಅಮಿತ ಹರಕೆಯ ಬಲವು
ಆವರಣ ಕಳಚಿಳಿದು ಅಳಲು ನಗೆ ಹೊನಲಾಯ್ತು
ಇಲ್ಲಿಗೇತಕೆ ಬಂದೆ ಯಾವ ಪ್ರಾರಬ್ಧವೋ
ಏನೇನು ಕಾದಿಹುದೋ ಭೀತಿ ಕಂಪನವೇನು
ಈ ಘೋರ ಚಿಂತನೆಯೇ? ರೋಧನವು ಮುಗಿಲಾಯ್ತು
ಉಪ್ಪು ಸಾಸಿವೆ ಹಿಡಿದು ಹಿರಿಯಾಕೆ ಕಳವಳದಿ
ಊಫೆನುತ ನೀವಳಿಸಿ ದೃಷ್ಟಿಯನು ತೆಗೆಯುತ್ತ
ಋಷಿಯ ವಂಶಜ ನೀನು ಋಷಿ ಸದೃಶ ಮನವಿರಲಿ
(ಎಲ್ಲರೂ ಯಾರಾದರೂ ಒಬ್ಬ ಪುರಾತನ ಋಷಿಯ ವಂಶದವರು. ಅದನ್ನೇ ಗೋತ್ರವೆನ್ನುವರು)
ಎಲ್ಲ ಸುಖ ಸಂಪದವು ನಿನ್ನದಾಗಲಿ ಮಗುವೆ
ಏನೇನ ಬಯಸುವೆಯೊ ಸಕಲವೂ ಕೈಗೂಡಿ
ಐಸಿರಿಯ ಜೊತೆಗಿರಲಿ ಆಯುರಾರೋಗ್ಯಗಳು
ಒನ್ದು ಮಾತಿದು ಕಂದಾ ಎಂದಿಗೂ ಮರೆಯದಿರು
ಓದು ಜ್ಞಾನದ ನಿಧಿಯು ಕಳುವಾಗದೈಸಿರಿಯು
ಔನ್ನತ್ಯ ಪಡೆದರೂ ಮಣ್ಣ ಮೀರಲು ಬೇಡ
ಅಂದಿನಂತಿಲ್ಲ ಜಗ ಆಮಿಷವು ಸ್ವರ್ಣಮೃಗ
ಅಹ ಇವನ ಯೋಗ್ಯತೆಯೆ ಎಂದು ನಗೆಯಾಡದೊಲು
ಕಣ್ಮಣಿಯೆ ಜಗಕೆಲ್ಲ ಬೆಳಕಾಗಿ ದಿಶೆಯಾಗು
ಖಳರು ಇರುವರು ಜಗದಿ ಮೈಯೆಲ್ಲ ಕಣ್ಣಾಗು
ಗಳಿಸಿದಾ ಧನ ಮಾತ್ರ ಸಂಪದವು ಭ್ರಮೆ ಸಲ್ಲ
ಘನವದಕು ಔದಾರ್ಯ ಮಾನವೀಯತೆ ಸಹನೆ
ಚತುರೋಪಾಯಗಳ ಮರ್ಮವರಿತರೆ ಲೇಸು
ಛತ್ರ ಚಾಮರ ಸೇವೆ ಅಹಮಿಕೆಗೆ ಗೊಬ್ಬರವು
ಜನರ ಮಧ್ಯೆಯೆ ಇರುತ ಸರಳತನದಲಿ ಬಾಳು
ಝರಿ ಕಾನು ನದಿ ಮಲೆಯು ತನ್ನ ಸೊತ್ತೆನ್ನದಿರು
ಟವಳಿತನವಿರದಿರಲಿ ವಾಙ್ಮನಸು ಕಾಯದಲಿ
ಠಕ್ಕು ಮನವಿರದಿರಲು ಆತ್ಮರತಿಗದು ಮಾರ್ಗ
ಡಮರುಧರನನು ನಂಬು ನರನ ಮೀರಿದ ಶಕುತಿ
ಢಗೆಗೆ ಆಸ್ಪದವಿತ್ತು ತನ್ನಾತ್ಮ ಕುಸಿಯದೊಲು
ಣಮೋ ಎನುತಲಿ ಬಾಗು ದಿವ್ಯ ಚೇತನಗಳಿಗೆ
(ಟವಳಿತನ = ಮೋಸಗಾರಿಕೆ, ವಂಚಕತನ. ಢಗೆ =ಕಳವಳ, ತಳಮಳ. ಣಮೋ = ನಮಸ್ಕಾರ, ವಂದನೆ)
ತನಗಲ್ಲದುದನೆಂದು ಯಾರಿಗೂ ನೀಡದಿರು
ಥಳುಕು ಬಳುಕಿಗೆ ಮನವ ತೆತ್ತು ಪಥ ತಪ್ಪದಿರು
ದಯೆಯು ಮಿತಿಯಲ್ಲಿರಲಿ ಅರಿವಿನಂಕೆಯಲಿರಲಿ
ಧರ್ಮಕ್ಕಿರುವಾ ನಿಜದ ವ್ಯಾಖ್ಯೆಯನು ಅರಿಯುತಿರು
ನರನಾಗಿ ಬೆಳೆಯುತಿಹೆ ನಾರಾಯಣನಾಗಿಬಿಡು
ಪರಿವಾರ ಜಗವೆನಲು ಪರಿಸರವೆ ಪರಮಾತ್ಮ
ಫಲ ಪುಷ್ಪ ಜಲ ವಾಯು ನೆಲವವನ ಕಾರುಣ್ಯ
ಬನ್ದಿಹೆವು ಕೆಲಕಾಲ ಯಾರು ಸ್ಥಿರವಾಗಿಹರು
ಭವದ ಮಾಯೆಗೆ ಸಿಲುಕಿ ಭ್ರಷ್ಟನಾಗದೆ ಇರುತ
ಮಮತೆಯ ಹಾರೈಕೆ ಮರೆಯದಂತಿರು ಚಿನ್ನ
ಯಕ್ಷ ಪ್ರಶ್ನೆಗೆ ಧರ್ಮ ಉತ್ತರಿಸಿ ಗೆಲ್ದ ಕತೆ
ರಕ್ಷಕನು ಇಹನೆಂಬ ನಂಬಿಕೆಗೆ ಅದುವೆ ಬಲ
ಲವದಷ್ಟೆ ನಮ್ಮಾಯು ಬ್ರಹ್ಮಾಂಡದಿದಿರಿನಲಿ
ವನ್ಚಿಸುತ ಅಂತಕನ ಉಳಿದು ಬೀಗಿದರಿಹರೆ
ಶಮೆ ದಮೆಯ ಬಾಳುವೆಯು ವಿತತವಾದುದು ಮಗುವೆ
ಷಡಕ್ಷರವಷ್ಟಾಕ್ಷರವೊ ಉಸಿರಾಗಿ ಧಮನಿಗಿರೆ
ಸವಾಲೆಸೆವ ಬೆಟ್ಟಗಳ ಮೆಟ್ಟುವ ಧೃತಿಗಿಂಬು
ಹಸುಳೆತನದಿಂ ಬಳೆದು ಪೂರ್ಣತೆಯ ಕಡೆಗಿರುವೆ
ಹಳವಳಿಕೆ ಕಳೆ ಕಂದಾ ಬಾಳು ಮೌಲ್ಯದ ಬಾಳು
ಹಾದಿಗಿದು ಬುತ್ತಿಯೆನು ಕೈಮರವು ದೀವಿಗೆಯು
ಹಿರಿಯರಾಶೀರ್ವಾದ ಹಡೆದವರ ಹರಕೆಗಳ
ಹೀರುತಿರು ಸಂಭ್ರಮದಿ ಬಾಳ ಸಂತಸ ಸುಖವ
ಹುರಿಗೊಂಡು ಕ್ಷಣಕ್ಷಣವು ವ್ಯರ್ಥವಾಗದೆ ಬಾಳು
ಹೂಟವಿದೆ ಕೂಟವಿದೆ ಹಾಲು ಹಾಲಾಹಲವು
ಹೃದ್ಯವಿದೆ ವಧ್ಯವಿದೆ ತಂತಿಯಲಿ ಕಸರತ್ತು
ಹೆದರಿದರೆ ಏನುಂಟು ಇಳಿದು ಬಂದಾಗಿಹುದು
ಹೇಳಿಕೆಗೆ ಮನ ತೆರದೆ ಅರಿವ ಕೈಗಿಡು ಚಿತ್ತ
ಹೈರಾಣಗೊಳ್ಳದಿರು ಜಗವನೆದುರಿಸಬೇಕು
ಹೊಸದಲ್ಲ ಹೋರಾಟ ಗೆದ್ದವಗೆ ಜಯಪೀಠ
ಹೌಹಾರಬೇಕಿಲ್ಲ ಕೈಮರವ ನೆಟ್ಟಿಹರು
ಹಂದರವು ಸನಿಹವಿದೆ ಬಾಳು ಮಗು ಕೈ‌ವಿಡಿದು.
(ಷಡಕ್ಷರೀ ಮಂತ್ರ :- ಓಂ ನಮಃ ಶಿವಾಯ.
ಅಷ್ಟಾಕ್ಷರೀ ಮಂತ್ರ :- ಓಂ ನಮೋ ನಾರಾಯಣಾಯ.
ಹೇಳಿಕೆ :- ಅವರಿವರ ಮಾತು)
– ರತ್ನಾ ಮೂರ್ತಿ
ಅಕಾರಾದಿ ಕವನ ಚಂದವಿದೆ
ಕನ್ನಡದ ಅಕ್ಷರಗಳಿಂದ ರಚಿಸಲ್ಪಟ್ಟ ಕವನ ತುಂಬಾ ಚೆನ್ನಾಗಿದೆ
ಅಕ್ಷರಗಳನ್ನು ಬಳಸಿ ರಚಿಸಿರುವ ಕವನ ತುಂಬಾ ಚೆನ್ನಾಗಿದೆ.. ಮೇಡಂ
ಬದುಕಿನ ವಿಶ್ಲೇಷಣೆ, ಮಾರ್ಗದರ್ಶನದ ರೀತಿಗೆ ಅಕ್ಷರ ಜೋಡಣೆ ಚೆನ್ನಾಗಿದೆ
ಅಮೋಘ
ತುಂಬಾ ಚೆನ್ನಾಗಿದೆ ಕವನ
ಅತ್ಯುತ್ತಮ ಸಂದೇಶಯುಕ್ತ ಅಕ್ಷರಮಾಲೆಯ ಕವನ ಸೂಪರ್
ಅಕ್ಷರ ದೀವಟಿಗೆ ಕವನದಲ್ಲಿ ಬೀರಿದ ‘ಬೆಳಕು’ ಇಷ್ಟವಾಯಿತು.
ಅಕ್ಷರಕ್ಷರದ ದೀವಟಿಗೆ
ಲೋಕಸತ್ಯದ
ಸಾಕ್ಷಾತ್ ದರ್ಶನ ಮಗುವಿಗೆ,
ಮನಸೆಂಬ ಮಗುವಿಗೆ.
ಅಕಾರಾದಿ ಅಕ್ಷರ ಕಾವ್ಯಮಾಲೆ
ಚಕ್ಷು ಉನ್ಮೀಲನಗೊಳಿಪ
ಅ-ಕ್ಷರ ಮಾರ್ಗದರ್ಶಿ
ಜೀವನಪಥಿಕ ಮಾನವಗೆ.