ಬದಲಾಗಿಸು ನನ್ನ

Share Button

ಅಡುಗೆಯಾಟದ ಮಡಿಕೆ ಕುಡಿಕೆಗಳ
ದೂರಕೆಸೆದುಬಿಡೆ ಅಮ್ಮ,
ಮುಂದೆಂದು ತರಬೇಡ ಇವುಗಳ
ಸೌಟು ಸ್ಪೂನುಗಳ ತಟ್ಟೆ ಲೋಟಗಳ
ಗೊಡವೆ ಬೇಡಿನ್ನು ನನಗೆ
ಜರಿಲಂಗ ರವಿಕೆಗಳ ತಳ್ಳು ದೂರ
ಆಕಾಶದ ಚುಕ್ಕಿ ಚಂದ್ರರ ತೋರಿಸಬೇಡ
ಪೊರಕೆ ಮೈಲಿಗೆ ಬಟ್ಟೆಗಳ ಕೈಗಿಡಬೇಡ
ಬಚ್ಚಲರೊಚ್ಚನು ತೊಳೆಯೆನಬೇಡ
ಅಣ್ಣನೆದುರಿಗೆ…..
ಇವಳು ಪಾಪ ಹುಡುಗಿ ಕಣೋ
ಎನುತ ನಾನು ಹೆಣ್ಣೆಂದು ಹೀಗಳೆಯಬೇಡ
ಅಪ್ಪನೆದುರು ನನ್ನ ಮದುವೆಯ
ಪ್ರಸ್ತಾಪಿಸಬೇಡ
ಎಲ್ಲಕಿಂತ ಮೊದಲು
ಬೇಗ ಮನೆ ಸೇರಿಕೊ ಎನಬೇಡ
ಸಾಕು ಓದಿದ್ದು ಮುಸುರೆತಿಕ್ಕುವುದಷ್ಟೇ
ಮುಂದಿರುವ ಕೆಲಸವೆನಬೇಡ
ಸಾಕಾಗಿದೆ ನನಗೆ

ಈಗ…………
ನನ್ನ ಕೈಗೆ ಕೊಡಿಲ್ಲಿ ನನಗೂ ಅಸ್ತ್ರಗಳ
ಅಡುಗೆ ಬದಲಿಗೆ ನಿಭಾವಣೆಯ ಕಲಿಸು
ಗೃಹಿಣಿ ಗೃಹಮುಚ್ಯತೇ ಅನಬೇಡ
ಕುಕೃತ್ಯಗಳಿಗೆ ಸಡ್ಡು ಹೊಡೆಯುವುದ ಬೆಳೆಸು
ಧೈರ್ಯದೊಂದಿಗೆ ಛಲ ತುಂಬಿ
ಬದುಕನು ಬದುಕಿಸು
ಮೇಲೇರಿಬರುವ ಕಿಡಿಗೇಡಿಗಳ ಕಿಡಿಗೆ
ಪ್ರತಿಬೆಂಕಿಯಾಗುವುದ ಕಲಿಸು
ಮುಂದೆ ಮುಂದೆ ಕಾಲವಿನ್ನೂ ಕೆಡಲಿದೆ
ನಿರ್ಭಯದ ಗುಂಡಿಗೆಗೆ ಮನವೊಲಿಸು
ಗಂಡಾಗಿಸು ಅಮ್ಮಾ.. ನನ್ನ ಗಂಡಾಗಿಸು!

-ಬಿ.ಕೆ.ಮೀನಾಕ್ಷಿ, ಮೈಸೂರು.

4 Responses

  1. ಬಿ.ಆರ್.ನಾಗರತ್ನ says:

    ವಾಸ್ತವಿಕ ಬದುಕಿನತ್ತ ಹೆತ್ತವರ ಹೊಣೆಗಾರಿಕೆ ಯನ್ನು ತಿಳಿಸಿ ಹೇಳಿ ರುವ ಈ ಕವನ ಚೆನ್ನಾಗಿದೆ ಮೂಡಿ ಬಂದಿದೆ ಗೆಳತಿ ಮೀನಾಕ್ಷಿ ನಿಮಗೆ ಅಭಿನಂದನೆಗಳು.

  2. ನಯನ ಬಜಕೂಡ್ಲು says:

    ಇವತ್ತಿನ ದಿನಗಳಲ್ಲಿ ಇಂತಹ ಒಂದು ಬದಲಾವಣೆಯ ಅಗತ್ಯ ಇದೆ. ಹೆಣ್ಣಿನ ಅಂತರಂಗದ ಅಳಲು ಚೆನ್ನಾಗಿ ಅನಾವರಣ ಗೊಂಡಿದೆ.

  3. ಶಂಕರಿ ಶರ್ಮ, ಪುತ್ತೂರು says:

    ಸಮಾಜದ ಈಗಿನ ವ್ಯವಸ್ಥೆಗೆ ಸಡ್ಡು ಹೊಡೆದು ಹೊರಬರಬೇಕಾಗಿದೆ ಹೆ ಣ್ಣು ಎನ್ನುವ , ಅವಳಿಗೆ ಮಾನಸಿಕ ಶಕ್ತಿ ತುಂಬುವ ಸೊಗಸಾದ ಕವನ..ಧನ್ಯವಾದಗಳು ಮೀನಾಕ್ಷಿ ಮೇಡಂ.

Leave a Reply to ಬಿ.ಆರ್.ನಾಗರತ್ನ Cancel reply

 Click this button or press Ctrl+G to toggle between Kannada and English

Your email address will not be published. Required fields are marked *

Follow

Get every new post on this blog delivered to your Inbox.

Join other followers: