ಲೊಂಗ್ ವಾಲ್…ಯೋಧರಿಗೆ ಸೆಲ್ಯೂಟ್ !

Share Button

Hema-07112011

ಗಣರಾಜ್ಯೊತ್ಸವ ದಿನವಾದ ಇಂದು, ನಮ್ಮ ದೇಶದ ಯೋಧರೆಲ್ಲರಿಗೂ ಗೌರವವನ್ನು ಅರ್ಪಿಸಿ ಈ ಲೇಖನ ಬರೆಯುತ್ತಿದ್ದೇನೆ.

2013 ಡಿಸೆಂಬರ್ ಕೊನೆಯ ವಾರದಲ್ಲಿ, ರಾಜಸ್ಥಾನದ ಜೈಸಲ್ಮೇರ್ ನಗರದಲ್ಲಿದ್ದೆವು. ಜೈಸಲ್ಮೆರ್ ನಿಂದ ಸ್ವಲ್ಪ ದೂರ ಪ್ರಯಾಣಿಸುವಷ್ಟರಲ್ಲಿ ಥಾರ್ ಮರುಭೂಮಿ ಸಿಗುತ್ತದೆ. ಅಲ್ಲಿನ ಹಲವಾರು ಪ್ರೇಕ್ಷಣೀಯ ಸ್ಥಳಗಳಲ್ಲಿ ‘ಲೊಂಗ್ ವಾಲ್’ ಕೂಡ ಒಂದು. ಈ ಸ್ಥಳವು ಜೈಸಲ್ಮೆರ್ ನಿಂದ 110 ಕಿ.ಮಿ ದೂರದಲ್ಲಿದೆ. ರಸ್ತೆ ಮೂಲಕ ತಲಪಲು ಸುಮಾರು ಎರಡು ಗಂಟೆ ಬೇಕು. ಈ ರಸ್ತೆಯ ಪ್ರಯಾಣ ವಿಭಿನ್ನವಾಗಿತ್ತು. ದಾರಿಯುದ್ದಕ್ಕೂ ಹಳದಿ ಬಣ್ಣದ ಹೂ ಬಿಟ್ಟ ಸಾಸಿವೆ ಹೊಲಗಳು, ಅಲ್ಲಲ್ಲಿ ಮೇವು ತಿನ್ನುತ್ತಿದ ಒಂಟೆಗಳು, ಕುರುಚಲು ಕಾಡು, ಮೇಕೆ ಗುಂಪನ್ನು ನಿಭಾಯಿಸುತ್ತಿರುವ ರಾಜಸ್ಥಾನಿ ಸಾಂಪ್ರದಾಯಿಕ ಉಡುಗೆ ತೊಟ್ಟ ಮಹಿಳೆಯರು,ಇದ್ದಕ್ಕಿದ್ದಂತೆ ಎದುರಾಗುವ ಮರಳ ರಾಶಿ, ಕುರುಚಲು ಕಾಡುಗಳು, ಪುಟ್ಟ ಹಳ್ಳಿಗಳು, ನೀರು ಹೊತ್ತೊಯ್ಯುವ ಟಾಂಕರ್ ಗಳು, ಗಡಿರಕ್ಷಣಾ ಪಡೆಯ ವಾಹನಗಳು, ಸೂಕ್ಷ್ಮವಾಗಿ ಗಮನಿಸಿದರೆ ಗಡಿರಕ್ಷಣಾ ಪಡೆಯ ಶಿಬಿರಗಳು…ಇತ್ಯಾದಿ ಎದುರಾದುವು. ಹಲವಾರು ಯೋಧರನ್ನೂ ಕಂಡೆವು.

1971 ರಲ್ಲಿ ಭಾರತ ಮತ್ತು ಪಾಕಿಸ್ತಾನದ ನಡುವೆ ಯುದ್ದ ಸಂಭವಿಸಿ ಭಾರತವು ವಿಜಯಿಯಾದ ಸ್ಥಳ ಲೊಂಗ್ ವಾಲ್ . ಇಲ್ಲಿಂದ ಪಾಕಿಸ್ತಾನದ ಗಡಿ ಕೇವಲ 10 ಕಿ.ಮಿ. ದೂರ. ಸೇನಾ ಪ್ರದೇಶವಾದುದರಿಂದ ಪ್ರವಾಸಿಗರಿಗೆ ‘ಲೋಂಗ್ ವಾಲ್’ ನಿಂದ ಮುಂದಕ್ಕೆ ಹೋಗಲು ಅನುಮತಿ ಇಲ್ಲ. ಅಂದಿನ ಯುದ್ಧದಲ್ಲಿ ವಶಪಡಿಸಿಕೊಂಡ ಪಾಕಿಸ್ತಾನದ ಟಾಂಕರ್ ಒಂದನ್ನು ಇಲ್ಲಿ ಸ್ಮಾರಕವಾಗಿ ಇರಿಸಿದ್ದಾರೆ. ಪಂಜಾಬ್ ರೆಜಿಮೆಂಟ್ 23  ರ ಸಾಹಸಗಾಥೆಯ ವಿವರವನ್ನು ಅಲ್ಲಿನ ಫಲಕದಲ್ಲಿ ಬರೆದಿದ್ದಾರೆ. ಯುದ್ಧದಲ್ಲಿ ಹುತಾತ್ಮರಾದವರ ಸ್ಮಾರಕವನ್ನು ನೋಡುತ್ತ, ಮರುಭೂಮಿಯ ಅಂದಿನ ರಣರಂಗದಲ್ಲಿ ನಿಂತಿದ್ದಾಗ ರೋಮಾಂಚನಗೊಂಡೆ.

 

 

Tanker
Longowala2

 

ಈ ಯುದ್ಧದ ವಿಶೇಷತೆ ಏನೆಂದರೆ, ಬೆರಳೆಣಿಕೆಯಷ್ಟಿದ್ದ ನಮ್ಮ ಯೋಧರು ತಮ್ಮ ಸಮಯಸ್ಫೂರ್ತಿ, ಚಾಕಚಕ್ಯತೆ ಹಾಗೂ ವಾಯುದಳದ ಸಹಕಾರದಿಂದ 300 ಕ್ಕೂ ಹೆಚ್ಚಿದ್ದ ಪಾಕಿಸ್ತಾನಿ ಸೈನಿಕರನ್ನು ಹಿಮ್ಮೆಟ್ಟಿಸಿದರು, ಕೆಲವರನ್ನು ಕೊಂದರು ಹಾಗೂ ಹಲವಾರು ಟಾಂಕರ್ ಗಳನ್ನು ವಶಪಡಿಸಿಕೊಂಡರು.

1997 ರಲ್ಲಿ ಬಿಡುಗಡೆಯಾದ ಪ್ರಖ್ಯಾತ  ಚಲನಚಿತ್ರ ‘ಬಾರ್ಡರ್’ ಅನ್ನು  ಲೋಂಗ್ ವಾಲ್ ನಲ್ಲಿ, ಚಿತ್ರೀಕರಿಸಲಾಯಿತು ಹಾಗೂ ಇದರಲ್ಲಿ ಯುದ್ಧದ ನಿಜ ಘಟನೆಗಳನ್ನು ಬಿಂಬಿಸಲಾಯಿತು.

ಅತಿ ಉಷ್ಣ-ಅತಿ ಶೀತ ತಾಪಮಾನ, ಮರಳು-ಧೂಳು ಸೇರಿ ಬೀಸುವ ಗಾಳಿ, ನೀರಿನ ಕೊರತೆ ಇತ್ಯಾದಿ ಮರುಭೂಮಿಯ ಪ್ರತಿಕೂಲ ಸನ್ನಿವೇಶದಲ್ಲಿದ್ದುಕೊಂಡು, ತಮ್ಮ ಕುಟುಂಬದ ಸದಸ್ಯರಿಂದ ದೂರವಾಗಿ ಮೈಯೆಲ್ಲಾ ಕಣ್ಣಾಗಿ ದೇಶ ಕಾಯುವ ಯೋಧರಿಗೆ  ಸೆಲ್ಯೂಟ್ !

 

 – ಹೇಮಮಾಲಾ. ಬಿ.

 

1 Response

  1. NICE ARTICLE , ಗಣರಾಜ್ಯೋತ್ಸವದ DINA NIJAVADA GOURAVA SALLIKE

Leave a Reply to Neelamma Banur Cancel reply

 Click this button or press Ctrl+G to toggle between Kannada and English

Your email address will not be published. Required fields are marked *

Follow

Get every new post on this blog delivered to your Inbox.

Join other followers: