ಕಣ್ಣುಮುಚ್ಚಿದರೆ ಕಾಣುವುದೆ ಬೇರೆ
ಕಣ್ಣು ತೆರದರೆ ಉಂಟು ಬೇಕೆಂಬ ಧಾರೆ
ಬೇರೆ ಧಾರೆಗಳೆಲ್ಲ ಸರಿದು ಸೋರೆ
ಆಕಾಶದುದ್ದಕ್ಕು ನಗುವ ಬೆಳಗಿನ ಮೋರೆ!
ಮೋರೆಯೆಂದರೆ ಸದರೆ ಅಡಿಯಿಂದ ಮುಡಿವರೆಗೆ
ಮುಡಿಯ ಕೊಡುವುದೆ ದಿಟ್ಟಮನದವರಿಗೆ
ಮನಕೆ ಮಜ್ಜನಬೇಕು ಚಿರನಿದ್ರೆವರೆಗೆ
ನಿದ್ರೆಗೈಯಲುಬಹುದೆ ಒಳಗಣೊಳಗಣ ಆತ್ಮಸಖ?
ಸಖನೆಂಬ ಸುಖಕೆ ಅನ್ಯಮಾದರಿಯುಂಟೆ?
ಉಂಟೆ ಉಂಟೆಂಬ ಯಾವ ಹಂಗು?
ಹಂಗುಹರಿಯುವ ಮುನ್ನ ಕೇಶದೆಳೆಗಳ ಕಿತ್ತು
ಕಿತ್ತಡಿಯ ನಿರ್ವಾಣ ಸಂಜೆಗೆಂತಹ ಶೋಭೆ!
–ಮಹೇಶ್ವರಿ.ಯು, ಕಾಸರಗೋಡು
ಆವರಿಸುವ ಸುಂದರ ಸಂಜೆಯಷ್ಟೇ ಸೊಗಸಾದ ಕವನ.
ಮನಕೆ ಮಜ್ಜನ ಬೇಕು ಚಿರನಿದ್ರೆ ವರೆಗೆ……. ಸೂಪರ್
ಸೊಗಸಾದ ಕವನ
ಒಂದೊಂದು ಅಂತ್ಯ ಸಾಲಿನ ಒಂದು ಪದವನು ಹಿಡುದು ಕೊಂಡಿ ಬೆಸೆದು ವಿನೂತನವಾಗಿ ಕವನ ರಚನೆಗೊಂಡಿದೆ. ಚೆಂದದ ಕವಿತೆ.