ಕಪ್ಪು ಬಿಳುಪು

ಕಪ್ಪು ಕಪ್ಪೆಂದು ದೂರಾಗಬ್ಯಾಡಣ್ಣ

ಕಪ್ಪೆoಬುದು ನೆತ್ತಿಯ ಸುಪ್ಪತ್ತಿಗೆ ಬಣ್ಣ ||ಪ||

.
ಬಿಳಿಬಿಳಿಯೆಂದು ಹಿಂದೋಡಬ್ಯಾಡ

ಬರಿಬೂದಿಬಣ್ಣ ಕಣ್ಣಲ್ಲಿ ಸುಣ್ಣ

ಬಿಳಿಬಣ್ಣ ನಾನು ಜರಿತಿಲ್ಲೊ ಅಣ್ಣ

ಯಾವುದೂ ಜಗದಲ್ಲಿ ಮೇಲಲ್ಲ ಕಾಣಾ

,
ಕಪ್ಪುನೆಲವಿಲ್ಲಿ ಭತ್ತವ ಬೆಳೆತೈತಿ

ಬೆಳೆದ ಬಿಳಿಅಕ್ಕಿ ಹಸಿವನ್ನ ನೀಗೈತಿ

ಯಾವುದು ಮೇಲಲ್ಲ ಯಾವುದು ಕೀಳಲ್ಲ

ನೋಡುವ ನೋಟದ ಮ್ಯಾಲನಿಂತೈತಿ

.
ಕರಿಕುರಿಯಲ್ಲೂ ಬಿಳಿಹಾಲು ಬರುತೈತಿ

ಬಿಳಿಬೇಕು ಅಂದೊರ ನಾಲಿಗೆ ರುಚಿಸೈತಿ

ಕಪ್ಪುಮೋಡವು ನಮಗಿಂತ ಮೇಲೈತಿ

ಕರುಗುತಲಿ ಭುವಿಗೆ ಬಿಳಿ ಬಣ್ಣ ತೋರೈತಿ

.
ಕಪ್ಪುಕೊಣೆಯಲವ್ವ ನವಮಾಸ ಕಳೆದವಳೆ

ಬಿಳಿಮೊಗದ ಜನ್ಮಕ್ಕೆ ಬಿಳಿಹಾಲ ಎರೆದವಳೆ

ಯಾವುದು ಮೇಲಲ್ಲ ಯಾವುದು ಕೀಳಲ್ಲ

ನೋಡುವ ನೋಟಾದ ಮ್ಯಾಲನಿಂತೈತಿ

.
ಎಲ್ಲವೂ ನೋಡುವ ನೋಟದ ಮ್ಯಾಲೈತಿ

ನೋಡುವ ಕಣ್ಣೊಳಗೆ ಎರಡು ಬಣ್ಣ ತುಂಬೈತಿ..

.
-ಶಿವಾನಂದ್ ಕರೂರ್ ಮಠ್ , ದಾವಣಗೆರೆ.