ಗಣೇಶನೊಂದಿಗೆ ಮೆರವಣಿಗೆಯಲ್ಲಿ ವಾಕಿಂಗ್…

ರಥದ ಮುಂದೆ, ಉದ್ದವಾದ ಕವೆಕೋಲು ಹಿಡಿದಿರುವ ಇಬ್ಬರು ಬರುತ್ತಾರೆ. ಮಾರ್ಗದ ಇಕ್ಕೆಲಗಳಲ್ಲಿ ಇರಬಹುದಾದ ಫೋನ್ ಕೇಬಲ್ ಗಳು, ಮರದ ಗೆಲ್ಲುಗಳು ರಥದ ತುದಿಗೆ ತಗಲದಂತೆ ಎತ್ತಿ ಹಿಡಿಯುವುದು ಇವರ ಕೆಲಸ. ಒಂದು ಸರಕುಸಾಗಣೆಯ ರಿಕ್ಷಾದಲ್ಲಿ ದ್ವನಿವರ್ಧಕಗಳು ಮತ್ತು ಕತ್ತಲಾದಾಗ ಬೆಳಕಿನ ವ್ಯವಸ್ಥೆಗೆ ಜನರೇಟರ್ ಅನ್ನು ಮೆರವಣಿಗೆಯ ಮುಂಚೂಣಿಯಲ್ಲಿ ಸಾಗಿಸುತ್ತಾರೆ.

ರಥ ನಮ್ಮ ಮನೆ ಮುಂದೆ ಬಂದಾಗ ಹಣ್ಣು-ಕಾಯಿ ಅರ್ಪಿಸಿ, ಆಮೇಲೆ ನಾವೂ ಮೆರವಣಿಗೆಯನ್ನು ಅನುಸರಿಸಿ ಹೋಗಲು ಖುಶಿಯಾಗುತ್ತದೆ. ಸುಮಾರು 30 ಜನರಿಂದ ಆರಂಭವಾಗುವ ಮೆರವಣಿಗೆಯು ಕೊನೆಗೊಳ್ಳುವಾಗ 250 -300 ಜನ ಸೇರಿರುತ್ತಾರೆ.

ವಾದ್ಯಗಳ ಲಯಬದ್ಧತೆಯೊಂದಿಗೆ , ಕೀರ್ತನೆ, ಭಕ್ತಿಗೀತೆಗಳಿಂದ ಮೊದಲುಗೊಂಡ ನಾದಸ್ವರ/ ಸ್ಯಾಕ್ಸ್ ಫೋನ್ ವಾಲಗವು, ಚಲನಚಿತ್ರೆ ಗೀತೆಗಳೆಡೆಗೆ ತಿರುಗಿತು. ಕೊನೆಗೆ ಹಿಂದಿಯ “ಏಕ್ ದೋನ್ ತೀನ್ ಚಾರ್ ಪಾಂಚ್ ಸಾಥ್ ಆಠ್…” ಹಾಡಿನ ವಾಲಗ ಕೇಳಿ ಬಂದಾಗ ಬಡಾವಣೆಯ ಮಕ್ಕಳು ಸ್ವಯಪ್ರೇರಿತರಾಗಿ ಥಕಥೈ ಕುಣಿದು ಗಣೇಶನಿಗೆ ‘ನರ್ತನ ಸೇವೆ’ಯನ್ನೂ ಸಲ್ಲಿಸಿದರು!

‘ನಗರ ಸಂಚಾರ’ ಮುಗಿಸಿ ದೇವಸ್ಥಾನಕ್ಕೆ ವಾಪಸ್ಸಾದ ಉತ್ಸವಮೂರ್ತಿಯನ್ನು ಆರತಿಯೆತ್ತಿ ಸ್ವಾಗತಿಸಿ, ಪುನ: ಪೂಜಾಕೈಂಕರ್ಯಗಳು ಸಾಂಗವಾಗಿ ನೆರವೇರಿತು. ಬಂದಿದ್ದ ಭಕ್ತಾದಿಗಳಿಗೆಲ್ಲ ಬಿಸಿಬೇಳೆಭಾತ್, ಮೊಸರನ್ನದ ಪ್ರಸಾದವನ್ನು ಕೊಡಲಾಯಿತು.

ಹೀಗೆ ಗಣೇಶನೊಂದಿಗೆ ಮೆರವಣಿಗೆಯಲ್ಲಿ ಸುಮಾರು 4 ಗಂಟೆಗಳ ಕಾಲ ನಿಧಾನವಾಗಿ ವಾಕಿಂಗ್ ಹೋಗುವ ನಮಗೆ, ವರ್ಷಕ್ಕೆ ಒಂದು ಬಾರಿಯಾದರೂ ಈ ನೆಪದಲ್ಲಿ, ನಮ್ಮ ಬಡಾವಣೆಯ ಇತರ ಮನೆಗಳ ಮುಂದೆ ಹಾದು ಹೋಗುವ ಅವಕಾಶ ಸೃಷ್ಟಿಯಾಗುತ್ತದೆ, ಕೆಲವರ ಬಳಿಯಾದರೂ ಮಾತನಾಡಲು ಸಾಧ್ಯವಾಗುತ್ತದೆ ಮತ್ತು ಕನಿಷ್ಟ ಮುಖ ಪರಿಚಯವಾದರೂ ಆಗುತ್ತದೆ.