ನಾವೇ ಭೇಟಿ ಆದದ್ದೇ ಆದರೆ…

by Rohini Satya · December 19, 2019

ಬದುಕಿನ ಸೀಳುದಾರಿಗಳಲ್ಲಿ ತಲೆಗೊಂದು ದಾರಿ

ಸಂಧಿಸಿದಷ್ಟು ಹೊತ್ತು ಹಿಡಿಯುವುದಿಲ್ಲ ಬಿಡು ಬೇರೆಯಾಗಲು

ಒಂದು ನಿಷ್ಕ್ರಮಣದ ಬಳಿಕ

ಒಂದು ಸಂಭಾಷಣೆಯ ಕಡೆಯ ಸಾಲಿನ ನಂತರ

ಏನುಳಿಯುತ್ತದೆ ಎಂದು ಆಲೋಚಿಸುತ್ತಿರುತ್ತೇನೆ

ಒಂದು ನೆರಳಾ?

ಮತ್ತೊಂದು ಕಿರುನಗೆಯಾ?

ಇನ್ನೊಂದು ಹೇಳದೆ ಉಳಿದ ಮಾತಾ?

ಹೇಗಿದ್ದರೂ ಹೊರಟುಬಿಡುತ್ತೇವೆ

ಇಲ್ಲಿ ಮರಗಳಲ್ಲಿ ಕೆಲವು ಕೊಂಬೆಗಳಾದ ಮೇಲೆ

ಹೇಗೋ ಹಾಗೆ ಹೊರಟುಬಿಡುತ್ತೇವೆ

ಇಲ್ಲಿನ ಗಾಳಿಯಲ್ಲಿ ಒಂದಿಷ್ಟು ಸದ್ದನ್ನು ಮೂಡಿಸಿದ ಮೇಲೆ

ಹೇಗಿದ್ದರೂ…

ಹೇಗಿದ್ದರೂ ಹೊರಟುಬಿಡುತ್ತೇವೆ

ಇಲ್ಲಿ ನಾಲ್ಕುಜನರ ಮಾತಿನಲ್ಲಿ

ಒಂದಿಷ್ಟು ಉದುರಿ…

ಮತ್ತೆ ಮತ್ತೆ ಬರಲಾಗದೆ!

ಮತ್ತೊಂದು ಜಾಗದಲ್ಲಿ ಎಲ್ಲೊ

ಮತ್ತೊಂದು ಭೇಟಿಯನ್ನು ಕನಸು ಕಾಣುತ್ತೇವೆ

ನಿಶ್ಚಿತವಾಗಿ ಮರೆಯುತ್ತೇವೆ ಗಾಯವಾಗುವಷ್ಟು ತೀವ್ರವಾಗಿ

ಈ ಹಿರಿದಾದ ಪ್ರಪಂಚದ ಕಾಡಿನಲ್ಲಿ

ಎಲ್ಲೊ ಯಾರೂ ಗುರುತಿಸದಂತೆ ಇಂಗಿಹೋಗುತ್ತೇವೆ

ಆದರೇ…

ನಾವೇ ಸಂಧಿಸಿದ್ದೇ ಆದರೆ

ಈ ದೊಡ್ಡ ಪ್ರಪಂಚ ಸೋತುಹೋಗುತ್ತೆ

ನಾವೇ ಮತ್ತೆ ಮಾತನಾಡಲಾರಂಭಿಸಿದರೆ

ಈ ಕಾಲ ಸ್ವಲ್ಪ ಹೊತ್ತಾದರೂ ನಿಂತುಹೋಗುತ್ತೆ

ಎಲ್ಲಾದರೂ ಭೇಟಿಯಾಗೋಣ ಕನಸುಗಗಳಲ್ಲೇ ಅಲ್ಲದೆ,

ನನಸಾಗಿಯೂ!

ಸಂತಸದಲ್ಲಿ ಅಲ್ಲದಿದ್ದರೂ ಒಂದಿಷ್ಟು ದಿಗಿಲಿನಲ್ಲಿ

ದಿಗಿಲಿನಲ್ಲಿ ಅಲ್ಲದಿದ್ದರು

ಒಂದಿಷ್ಟು ಬಚ್ಚಿಟ್ಟ ಕಿರುನಗೆಯಲ್ಲಿ

ಯಾವಾಗಲಾದರೂ ಮತ್ತೆ ಸಂಧಿಸೋಣ…

ಕಾಲವನ್ನು ಸೋಲಿಸುವುದಕ್ಕೋ ,

ಜೀವನವನ್ನು

ಒಂದು ಕ್ಷಣವಾದರೂ

ಗೆಲ್ಲಿಸುವುದಕ್ಕೋ!

ತೆಲುಗು ಮೂಲ : ಆಫ್ಸರ್ ಮೊಹಮ್ಮದ್

ಅನುವಾದ : ರೋಹಿಣಿ ಸತ್ಯ
.