ಪ್ರಿಯದರ್ಶಿನಿ
PC: ಸಾಂದರ್ಭಿಕ ಚಿತ್ರ, ಅಂತರ್ಜಾಲ
ಬೆಡಗು ಬೆರಗಿನ ಹಾಯ್-ಹಲೋಗಳ ನಡುವೆ
ಅಂದು ನಾ ನಿನ್ನ ಗುರುತಿಸಿದೆ,
ನನಗೂ ನಿನಗೂ ಇಲ್ಲ ಯಾವ ಜನ್ಮದ ನಂಟು,
ಆದರಿದೋ ಬಿದ್ದಿದೆ ನಮ್ಮ ಸ್ನೇಹಕ್ಕೆ ಗಂಟು .
ನೀಳಾದ ನವುರಾದ ಆ ಕೇಶ ರಾಶಿ
ಕರೆಯುತ್ತಿರೆ ನಯನಗಳು ಸ್ನೇಹ ಸೂಸಿ
ಚೈತನ್ಯ ಪುಟಿಯುವ ಸೌಮ್ಯ ವದನ
ಲತೆಯ ಸೊಬಗಿನ ಭಾವ ಬಂಧುರದ ಸದನ.
ಸ್ನೇಹ ಸಂಪತ್ತಿಗೆ ನೀ ಮಾರ್ಗದರ್ಶಿ
ಹೊಳೆಯುವ ಕಣ್ಣುಗಳೇ ಹೇಳುತ್ತಿವೆ ಸಾಕ್ಷಿ
ಮನ ನೋಯಿಸುವವರ ಕಂಡು ನಿನಗೇನೂ
ಬೇನೆ – ಬೇಸರಿಕೆಗಳು ಬಾರವೇನು?.
ನಿನ್ನ ನುಡಿಯಲಿ ಜೇನಿನಮೃತದ ಸವಿಯು
ನಿನ್ನ ಬಣ್ಣಿಸಲೆಂದೇ ಆಗುವೆನು ಕವಿಯು
ಗೆಳತಿಯೇ ಹಾರೈಸುವೆ ನಾನು ಇಂದು
ಸ್ನೇಹದಾ ಲತೆಯು ತಾ ಪಲ್ಲವಿಸಲೆಂದು.
– ಶೈಲಜಾ ಅಮರನಾಥ್
