ಭಗವದ್ಗೀತಾ ಸಂದೇಶ

ಮನುಷ್ಯ ತನ್ನ ಜೀವನ ಪಥದಲ್ಲಿ ಬಂದುದನ್ನು ಬಂದಂತೆಯೇ ಸ್ವೀಕರಿಸಬೇಕು. ಅದರ ಸಾಧಕ- ಬಾಧಕಗಳ ಬಗ್ಗೆ ಚಿಂತಿಸಬಾರದು.
ಮುಂದಾಗುವ ಪರಿಣಾಮದ ಬಗೆಗೆ ಯೋಚಿಸಿ ಭಯ ಭೀತರಾಗಿ ಕರ್ತವ್ಯದಿಂದ, ಜವಾಬ್ದಾರಿಯಿಂದ ಹಿನ್ನಡೆಯಬಾರದು ;ಎಂಬುದೇ ಶ್ರೀಮದ್ ಭಗವದ್ಗೀತೆಯ ಪರಮ ಸಂದೇಶವಾಗಿದೆ;

ಸ್ಥಿತಪ್ರಜ್ಞನು ತನ್ನ ಕರ್ತವ್ಯವನ್ನು ಅರಿತು ಮುಂದುವರೆಯುತ್ತಾನೆ. ಉದಾಹರಣೆಗೆ ಶ್ರೀರಾಮಚಂದ್ರನು ಸುಖ – ದುಃಖಗಳ ಬಗ್ಗೆ ಚಿಂತಿಸದೆ, ತನ್ನ ಕರ್ತವ್ಯವೇನೆಂದು ಅರಿತು ದುಷ್ಟರ ನಾಶ; ಶಿಷ್ಟರ ರಕ್ಷಣೆಗಾಗಿ ವನವಾಸ ಕೈಗೊಳ್ಳುತ್ತಾನೆ.

ರಣರಂಗದಲ್ಲಿ ಯುದ್ಧ ಮಾಡುವ ಬದಲು ವಿಷಾದದಿಂದ ಕಂಗಾಲಾದ ಪಾರ್ಥನಿಗೆ ಭಗವಂತನು ಸಾಂಖ್ಯ ಯೋಗದ ಸಿದ್ಧಾಂತದ ಮತ್ತು ಶಾಸ್ತ್ರ ಧರ್ಮದ ದೃಷ್ಟಿಯಿಂದ ಯುದ್ಧದ ಔಚಿತ್ಯವನ್ನು ತಿಳಿಸುತ್ತಾ ಹೀಗೆ ಹೇಳುತ್ತಾನೆ…

” ಸುಖದುಃಖೇ ಸಮೇ ಕೃತ್ವಾ
ಲಾಭಾ ಲಾಭೌ ಜಯಾಜಯೌ I

 ತತೋ ಯುದ್ಧಾಯ ಯುಜ್ಯಸ್ವ
ನೈವಂ ಪಾಪಮವಾಪ್ಸ್ಯಸಿ II”

“ಜಯ- ಪರಾಜಯ , ಲಾಭ – ಹಾನಿ ಮತ್ತು ಸುಖ- ದುಃಖಗಳನ್ನು ಸಮಾನವಾಗಿ ಸ್ವೀಕರಿಸಿಕೊಂಡು ನಂತರ ಯುದ್ಧಕ್ಕೆ ಸಿದ್ದನಾಗು. ಈ ಪ್ರಕಾರ ಯುದ್ಧ ಮಾಡುವುದರಿಂದ ನೀನು ಪಾಪವನ್ನು ಹೊಂದುವುದಿಲ್ಲ.”

ಮೇಲೆ ಹೇಳಿರುವ ಜೋಡಿ ಪದಗಳನ್ನು ದ್ವಂದ್ವಗಳು ಎನ್ನುತ್ತಾರೆ. ಈ ದ್ವಂದ್ವಗಳನ್ನು ಸಮಾನವಾಗಿ ನೋಡುವವನು ಸಮದರ್ಶಿ ಅಥವಾ ಅವನು ದ್ವಂದ್ವಾತೀತನಾಗಿರುತ್ತಾನೆ. ಇವೆಲ್ಲ ಸ್ಥಿತಪ್ರಜ್ಞನ ಲಕ್ಷಣಗಳಾಗಿರುತ್ತವೆ.

ನಾರಾಯಣನು ಇಲ್ಲಿ ನರನಿಗೆ ಯುದ್ಧದ ಫಲಿತಾಂಶದ ಬಗ್ಗೆ ಯೋಚಿಸದೆ ನೀನು ನಿನ್ನ ಶಾಸ್ತ್ರ- ಧರ್ಮದ ಪ್ರಕಾರ ಯುದ್ಧ ಮಾಡು. ಅಧರ್ಮವನ್ನು ನಾಶ ಮಾಡುವುದು ಮತ್ತು ಧರ್ಮದ ರಕ್ಷಣೆ ಮಾಡುವುದು ಕ್ಷತ್ರಿಯನಾದ ನಿನ್ನ ಕರ್ತವ್ಯ; ಮುಂದಿನ ಪರಿಣಾಮದ ಬಗೆಗೆ ಚಿಂತಿಸಿ ಶೋಕ ಅಥವಾ ಹರ್ಷಗೊಳ್ಳದೆ ಎರಡನ್ನು ಸಮಾನವಾಗಿ ಸ್ವೀಕರಿಸಬೇಕು ಎಂದು ಹೇಳುತ್ತಾನೆ.

ಇಲ್ಲಿ ಭಗವಂತನು ಅರ್ಜುನನನ್ನು ಉದ್ದೇಶಿಸಿ ಹೇಳಿದ ಎಲ್ಲಾ ಮಾತುಗಳು ನಮ್ಮೆಲ್ಲರಿಗೂ ಅನ್ವಯಿಸುತ್ತದೆ. ಜೀವನದಲ್ಲಿ ಬರುವ ಕಷ್ಟ -ನಷ್ಟ , ಸುಖ – ದುಃಖಗಳನ್ನು ಸಮಾನವಾಗಿ ಸ್ವೀಕರಿಸಿ ನಾವು ಸ್ಥಿತಪ್ರಜ್ಞರಾಗಿ ನಮ್ಮ ಕರ್ತವ್ಯ, ಜವಾಬ್ದಾರಿಯನ್ನು ನಿರ್ವಹಿಸಬೇಕು.

ಹರಿ:ಓಂ

-ವನಿತಾ ಪ್ರಸಾದ್ ಪಟ್ಟಾಜೆ

+4