ಚಿಕನ್ ಕಸೂತಿ ಕಲೆ

ಲಖ್ನೋ ಪಟ್ಟಣದ ಕಲಾಕಾರರು ಹತ್ತಿ ಮತ್ತು ರೇಷ್ಮೆ ಬಟ್ಟೆಗಳ ಮೇಲೆ, ಚಿತ್ತಾರ ರಚಿಸುವ ಚಿಕನ್ ಎಂಬ್ರಾಯ್ಡರಿ ಕಲೆಯು, ಮೂರು ಶತಮಾನಗಳಿಂದ ನಡೆದುಕೊಂಡು ಬಂದಿದೆ. ಚಿಕನ್ ಕಸೂತಿ ಕಲೆಯು, ಈಗ ಇರಾನ್ ಎಂದು ಕರೆಯಲ್ಪಡುವ, ಪರ್ಷಿಯಾ ದೇಶದಿಂದ ಬಂದ ಕಲೆಯೆಂದು ನಂಬಲಾಗಿದೆ. ಮೊಗಲ ವಂಶದ ದೊರೆಯಾದ ಜಹಾಂಗೀರ್ ನ ಪತ್ನಿ, ನೂರ್ಜಹಾನ್ ಳ ಪ್ರಯತ್ನದಿಂದ ಈ ಕಲೆ ಭಾರತ ತಲುಪಿರಬಹುದೆಂದು ಅಭಿಪ್ರಾಯವೂ ಇದೆ.

ಚಿಕನ್ ಕಸೂತಿಯನ್ನು ಬಟ್ಟೆಯ ಮೇಲೆ ಸೂಜಿಯ ಮೂಲಕ ಮೂಡಿಸಲು ಅನುಕೂಲವಾಗಲೆಂದು ಪ್ರಿಂಟ್ ಗಳಿಲ್ಲದ ಹಗುರವಾದ ಹತ್ತಿ, ಮಸ್ಲಿನ್ , ಜಾರ್ಜೆಟ್ , ಶಿಫಾನ್ ಕ್ರೇಪ್ಕೆ, ಸಿಲ್ಕ್ ಇತ್ಯಾದಿ ತುಸು ತೆಳ್ಳಗಿನ ಬಟ್ಟೆಯನ್ನು ಆಯ್ದು ಕೊಳ್ಳುತ್ತಾರೆ. ಬಿಳಿದಾರದ ಕಸೂತಿ ಮೂಡಿಸುವುದು ಲಕ್ನೋ ಚಿಕನ್ ಕಲೆಯ ವೈಶಿಷ್ಯ. ಈ ರೀತಿಯ ವರ್ಣ ಸಂಯೋಜನೆಯು ಕಸೂತಿಯ ಅಂದವನ್ನು ಹೆಚ್ಚಿಸುತ್ತದೆ. ಆಕರ್ಷಕ ವಿನ್ಯಾಸಗಳನ್ನು ಬಟ್ಟೆಯ ಮೇಲೆ ಗುರುತು ಹಾಕುವುದು ಮೊದಲ ಹಂತ. ವಿನ್ಯಾಸದ ಮೇಲೆ ಕಸೂತಿ ಹೊಲಿದು, ಬೇಕಾಗಿರುವ ಉಡುಪುಗಳನ್ನು ಮಾರಾಟಕ್ಕಾಗಿ ಸಿದ್ಧಗೊಳಿಸುವುದು ಎರಡನೆಯ ಹಂತ.

‘ಚಿಕನ್’ ಕಸೂತಿಯಲ್ಲಿ ಸೊಗಸಾದ 30 ಕ್ಕೂ ಹೆಚ್ಚು ಮಾದರಿಯ ಕಸೂತಿ ಹೊಲಿಗೆಗಳಿವೆ. ವೈವಿಧ್ಯಮಯವಾದ ಹೂ ಬಳ್ಳಿಗಳು, ಪ್ರಾಣಿ-ಪಕ್ಷಿಗಳು, ಚಿತ್ರಗಳು, ವೃತ್ತಗಳು ಇತ್ಯಾದಿ ವಿನ್ಯಾಸಗಳನ್ನು ಕೈ ಹೊಲಿಗೆಯ ಮೂಲಕ ಬಟ್ಟೆ ಮೇಲೆ ಚಕಚಕನೇ ಮೂಡಿಸುವ ಕಲಾಕಾರರ ನೈಪುಣ್ಯ ಅಭಿನಂದನಾರ್ಹ. ಮೂಲತ: ಬಿಳಿನೂಲಿನಿಂದ ಹೊಲಿಯುವ ಸುಂದರ ಕಲೆಯಾಗಿದ್ದ ಚಿಕನ್ ಕಸೂತಿಯು, ಆಧುನಿಕ ಜನರ ಫ್ಯಾಷನ್ ಹಾಗೂ ಆಸಕ್ತಿಗೆ ತಕ್ಕಂತೆ ಬಣ್ಣಬಣ್ಣದ ಮಣಿಗಳು, ಗುಂಡಿಗಳು ಇತ್ಯಾದಿಗಳನ್ನು ಸೇರಿಸಿಕೊಂಡು ಇನ್ನಷ್ಟು ಆಕರ್ಷಕವಾಗಿ ರೂಪುಗೊಳ್ಳುತ್ತಿದೆ.
.

– ಹೇಮಮಾಲಾ.ಬಿ