ಭಣಭಣ

ಮೋಹಿನಿ ದಾಮ್ಲೆ (ಭಾವನಾ)

ಇದು ಕಾಲೇಜು ದಿನಗಳ ನೆನಪು. ಬಿ.ಕಾಂ. ಅಂತಿಮ ವರ್ಷದಲ್ಲಿ ನಮಗೆ ಕಮರ್ಷಿಯಲ್ ಲಾ ( ಮರ್ಕೆಂಟೈಲ್ ಲಾ ) ಅನ್ನುವ ಸಬ್ಜೆಕ್ಟ್ ಇತ್ತು.  ಇದನ್ನು ಪಾಠ ಮಾಡಲು ಒಬ್ಬರು ಹಿರಿಯ ವಕೀಲರು ಬರುತ್ತಿದ್ದರು. ಯಾರು ಕೇಳಲಿ ಬಿಡಲಿ ಅವರು ತಮ್ಮ ಪಾಡಿಗೆ ಒಂದೇ ಶೃತಿಯಲ್ಲಿ ಲೆಕ್ಚರ್ ಕೊಟ್ಟು ಹೋಗಿಬಿಡುತ್ತಿದ್ದರು. ಹುಡುಗರು ಏನು ಚೇಷ್ಠೆ ಮಾಡಿದರೂ ತಲೆಕೆಡಿಸಿಕೊಳ್ಳದ ಸ್ಥಿತಪ್ರಜ್ಞ ವ್ಯಕ್ತಿ ಅವರು. ನನಗೋ ಈ ಸಬ್ಜೆಕ್ಟ್ ಬಹಳ ಬೋರಿಂಗ್. ಕ್ಲಾಸ್ ನಲ್ಲಿ ನಿದ್ದೆ ತಡೆಯೋಕೇ ಆಗ್ತಿರಲಿಲ್ಲ. ಯಾವಾಗ ಬೆಲ್ ಆಗತ್ತಪ್ಪಾ ಅಂತ ಕಾಯ್ತಾ ಇರುತ್ತಿದ್ದೆ. ಕ್ಲಾಸ್ ಮುಗಿಸಿ ಹೊರಬಂದರೆ ತಲೆಯೊಳಗೆ ಏನಿಲ್ಲ…ಖಾಲಿ. ( ಸದ್ಯ ಫ಼ೈನಲ್ ಎಕ್ಸಾಮ್ ನಲ್ಲಿ ಫೇಲ್ ಆಗಲಿಲ್ಲ ; ಅದೇ ಪುಣ್ಯ ) ಆಗ ಹೊಳೆದ, ಬರೆದ 25 ವರ್ಷಗಳ ಹಿಂದಿನ ಕವನ ಇದು.

ಅಣುಅಣುವೊಳು ಆ ಕೋಣೆಯ

ಕಣಕಣದಲು ಮೆಲ್ಗೊಣಗಿನ

ಗುಣುಗುಣು ರಿಂಗಣಿಸಿರಲು

ಹಣಹಣಿಸುತ ಕುಣಿಕುಣಿಯುತ

ಮನೆಮಣ್ಣಂಗಣ ಕಾಣಲು

ಮಿದುಳೊಳಗಿನ ಭಣಭಣಭಣ

ಏನಿದಕೆ ಕಾರಣ?

– ಮೋಹಿನಿ ದಾಮ್ಲೆ (ಭಾವನಾ) 

+23