ನೂತನ ಸರಕು ಮತ್ತು ಸೇವಾ ತೆರಿಗೆ ವಿಧೇಯಕದ ಸುತ್ತಮುತ್ತ

Share Button

GST taxes

ಲೋಕಸಭೆಯಲ್ಲಿ ಇತ್ತೀಚೆಗೆ ಮಂಡನೆಯಾದ ನೂತನ ಸರಕು ಮತ್ತು ಸೇವಾ ತೆರಿಗೆ ಕುರಿತ ಸಾಂವಿಧಾನಿಕ ತಿದ್ದುಪಡಿ ವಿಧೇಯಕವನ್ನು `` ಸ್ವಾತಂತ್ರ್ಯೋತ್ತರ ಭಾರತದ ಅತಿ ದೊಡ್ಡ ತೆರಿಗೆ ಸುಧಾರಣೆ” ಎಂದು ಹಣಕಾಸು ಸಚಿವ ಅರುಣ್ ಜೇಟ್ಲಿ ಬಣ್ಣಿಸಿದ್ದಾರೆ. ದೇಶದ ಪರೋಕ್ಷ ತೆರಿಗೆ ಸಂಗ್ರಹದಲ್ಲಿ ಮಹತ್ವದ ಸುಧಾರಣೆಯ ಹೆಜ್ಜೆಯೆಂದು ಮಹತ್ವ ಪಡೆದಿರುವ ಈ ವಿಧೇಯಕ 2015 ರ ಫೆಬ್ರವರಿಯಲ್ಲಿ ನಡೆಯಲಿರುವ ಸಂಸತ್ತಿನ ಬಜೆಟ್ ಅವೇಶನದ ಸಂದರ್ಭ ರಾಜ್ಯಸಭೆಯಲ್ಲಿ ಮಂಡನೆಯಾಗಲಿದೆ. ಹಾಗೂ 2016 ರ ಏಪ್ರಿಲ್ 1 ರಿಂದ ಜಿ‌ಎಸ್‌ಟಿಯನ್ನು ಜಾರಿಗೊಳಿಸಲು ಕೇಂದ್ರ ಸರಕಾರ ಉದ್ದೇಶಿಸಿದೆ. ಇದರೊಂದಿಗೆ 2006-07 ರ ಕೇಂದ್ರ ಬಜೆಟ್‌ನಲ್ಲಿ ಅಂದಿನ ಹಣಕಾಸು ಸಚಿವ ಪಿ. ಚಿದಂಬರಂ ಅವರು ಮೊಟ್ಟ ಮೊದಲ ಬಾರಿಗೆ ಪರಿಚಯಿಸಿದ್ದ ಸರಕು ಮತ್ತು ಸೇವಾ ತೆರಿಗೆ ಪರಿಕಲ್ಪನೆ ಸರಿಯಾಗಿ ಹತ್ತು ವರ್ಷಗಳ ನಂತರ ಕಾರ್ಯಗತವಾಗುವ ಹಂತಕ್ಕೆ ಮುಟ್ಟಿದಂತಾಗಿದೆ.

ಸರಕು ಮತ್ತು ಸೇವಾ ತೆರಿಗೆಯ (ಸರಕು ಮತ್ತು ಸೇವಾ ತೆರಿಗೆ-ಜಿ‌ಎಸ್‌ಟಿ) ಅನುಷ್ಠಾನದಿಂದ ಪ್ರಸ್ತುತ ಕೇಂದ್ರ ಮತ್ತು ರಾಜ್ಯಗಳು ಉತ್ಪನ್ನ ಮತ್ತು ಸೇವೆಗಳಿಗೆ ವಿಸುತ್ತಿರುವ ಹತ್ತು ಹಲವಾರು ತೆರಿಗೆಗಳು ರದ್ದಾಗಲಿದ್ದು, ಇವುಗಳ ಬದಲಿಗೆ ದೇಶಾದ್ಯಂತ ಒಂದೇ ಸ್ವರೂಪದ ತೆರಿಗೆ ಪದ್ಧತಿ ಜಾರಿಗೆ ಬರಲಿದೆ. ದ್ವಿ ತೆರಿಗೆಯ ಸಮಸ್ಯೆಗೆ ಇದು ಪರಿಹಾರವಾಗಲಿದ್ದು, ದೇಶಾದ್ಯಂತ ಏಕರೂಪದ ತೆರಿಗೆ ಯೋಜನೆ ಅಸ್ತಿತ್ವಕ್ಕೆ ಬರಲಿದೆ. ಗ್ರಾಹಕರ ದೃಷ್ಟಿಯಿಂದ ಪ್ರಯೋಜನವೇನೆಂದರೆ ಉತ್ಪನ್ನಗಳ ಮೇಲೆ ಒಟ್ಟಾರೆ ತೆರಿಗೆ ಹೊರೆ ತಗ್ಗಲಿದೆ. ಯಾಕೆಂದರೆ ಪ್ರಸ್ತುತ ಶೇ. 25-30 ರ ತನಕ ತೆರಿಗೆ ಹೊರೆಯನ್ನು ಅವರು ಭರಿಸುತ್ತಿದ್ದಾರೆ. ಮತ್ತೊಂದು ಕಡೆ ಉದ್ದಿಮೆ ವಲಯದ ಕಂಪನಿಗಳಿಗೆ ದೇಶೀಯ ಮತ್ತು ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ತಮ್ಮ ಉತ್ಪನ್ನಗಳನ್ನು ಸ್ಪರ್ಧಾತ್ಮಕ ದರದಲ್ಲಿ ಮಾರಾಟ ಮಾಡಲು ಸಹಾಯಕವಾಗುತ್ತದೆ. ಇದು ತ್ವರಿತ ಆರ್ಥಿಕ ಬೆಳವಣಿಗೆಗೆ ಕಾರಣವಾಗಲಿದೆ ಎನ್ನುತ್ತಾರೆ ವಿಶ್ಲೇಷಕರು. ಈ ತೆರಿಗೆ ಪದ್ಧತಿ ಪಾರದರ್ಶಕ ಸ್ವರೂಪದಲ್ಲಿರುವುದರಿಂದ ಆಡಳಿತಾತ್ಮಕ ವೆಚ್ಚ ಕಡಿಮೆ ಮತ್ತು ಸುಲಭವಾಗಲಿದೆ. ದೇಶದಲ್ಲಿ ಪರೋಕ್ಷ ತೆರಿಗೆ ಸಂಗ್ರಹವನ್ನು ಸರಳಗೊಳಿಸಿ ತೆರಿಗೆ ನೆಲೆಯನ್ನು ವಿಸ್ತರಿಸಲಿದೆ. ಇದರ ಜಾರಿಗೆ ಮಾಹಿತಿ ತಂತ್ರಜ್ಞಾನದ ವ್ಯವಸ್ಥಿತ ಮೂಲಸೌಕರ್ಯ ಜಾಲ ಅಗತ್ಯವಾಗಿರುವುದರಿಂದ ಪ್ರಕ್ರಿಯೆ ಸರಳವಾಗಲಿದೆ.

GST taxes India

ಜಿ‌ಎಸ್‌ಟಿ ಜಾರಿಯಿಂದ ಆಟೊಮೊಬೈಲ್, ಔಷಧ, ಆಹಾರೋತ್ಪನ್ನ, ಇ-ವಾಣಿಜ್ಯ, ಲಾಜಿಸ್ಟಿಕ್ಸ್, ಗ್ರಾಹಕ ಬೆಲೆ ಬಾಳುವ ಉತ್ಪನ್ನಗಳನ್ನು ತಯಾರಿಸುವ ಕಂಪನಿಗಳಿಗೆ ತೆರಿಗೆಯಲ್ಲಿ ಉಳಿತಾಯವಾಗಲಿದೆ. ನಾನಾ ರಾಜ್ಯಗಳಲ್ಲಿ ಉತ್ಪಾದನಾ ಘಟಕ, ಗೋದಾಮುಗಳನ್ನು ಹೊಂದಿರುವ ಇಂತಹ ಕಂಪನಿಗಳಿಗೆ ನಾನಾ ಬಗೆಯ ಸಂಕೀರ್ಣ ತೆರಿಗೆಗಳು ರದ್ದಾಗಲಿದ್ದು, ಏಕರೂಪದ ತೆರಿಗೆಯ ಅನುಕೂಲ ಸಿಗಲಿದೆ. ಈ ಲಾಭವನ್ನು ಕಂಪನಿಗಳು ಗ್ರಾಹಕರಿಗೆ ವರ್ಗಾಯಿಸಬಹುದು. ಆಗ ಬೆಲೆಗಳು ಹಲವು ಉತ್ಪನ್ನ ಮತ್ತು ಸೇವೆಗಳ ಬೆಲೆ ಕಡಿಮೆಯಾಗಲಿವೆ. ಮತ್ತೊಂದು ಕಡೆ ಸರಕಾರಕ್ಕೂ ಪರೋಕ್ಷ ತೆರಿಗೆಯ ವ್ಯಾಪ್ತಿ ಹಿಗ್ಗಿ ತೆರಿಗೆ ಸಂಗ್ರಹ ಹೆಚ್ಚಳವಾಗಬಹುದು. ಅದನ್ನು ಅಭಿವೃದ್ಧಿ ಯೋಜನೆಗಳಿಗೆ ವಿನಿಯೋಗಿಸಬಹುದು.

ಚಿದಂಬರಂ ಪ್ರಸ್ತಾವ
ಜಿ‌ಎಸ್‌ಟಿಯನ್ನು ೨೦೦೬-೦೭ರ ಬಜೆಟ್‌ನಲ್ಲಿ ಅಂದಿನ ಹಣಕಾಸು ಸಚಿವ ಪಿ.ಚಿದಂಬರಂ ಮೊದಲ ಬಾರಿಗೆ ಪ್ರಸ್ತಾಪಿಸಿದ್ದರು. ಆರಂಭದಲ್ಲಿ 2010 ರ ಏಪ್ರಿಲ್ 1 ರಿಂದ ಜಾರಿಗೊಳಿಸುವುದು ಎಂದು ನಿಗದಿಯಾಗಿತ್ತು, ರಾಜ್ಯಗಳಲ್ಲಿ ವ್ಯಾಟ್‌ನ್ನು ಜಾರಿಗೊಳಿಸಿದ್ದ, ರಾಜ್ಯ ಹಣಕಾಸು ಸಚಿವರುಗಳನ್ನು ಒಳಗೊಂಡ ಉನ್ನತಮಟ್ಟದ ಸಮಿತಿಯ(ಇಸಿ) ಸಭೆ ಕರೆದು ಜಿ‌ಎಸ್‌ಟಿಯ ಸ್ವರೂಪಕ್ಕೆ ಮಾರ್ಗದರ್ಶಿ ಮತ್ತು ವಿನ್ಯಾಸ ಸಿದ್ಧಪಡಿಸಲು ಕೋರಲಾಯಿತು. ಕೇಂದ್ರ ಮತ್ತು ರಾಜ್ಯ ಸರಕಾರಗಳ ಜಂಟಿ ಕಾರ್ಯಪಡೆಗಳು ಸುದೀರ್ಘ ಚರ್ಚೆ ನಡೆಸಿದವು. ತೆರಿಗೆಯಲ್ಲಿನ ವಿನಾಯಿತಿಗಳು, ಮಿತಿಗಳು, ಸೇವೆಯ ಮೇಲಿನ ತೆರಿಗೆಗಳು, ಅಂತರ ರಾಜ್ಯ ಮಟ್ಟದ ಪೂರೈಕೆಗಳಿಗೆ ಸಂಬಂಸಿದ ತೆರಿಗೆಗಳ ಬಗ್ಗೆ ಸಮಾಲೋಚನೆ ನಡೆಯಿತು. ಇದರ ಆಧಾರದಲ್ಲಿ 2009 ರ ನವೆಂಬರ್‌ನಲ್ಲಿ ಜಿ‌ಎಸ್‌ಟಿ ಕುರಿತ ಮೊದಲ ಚರ್ಚಾ ಪತ್ರವನ್ನು ಬಿಡುಗಡೆಗೊಳಿಸಲಾಯಿತು. ಈ ಚರ್ಚಾ ಪತ್ರವನ್ನು ತಳಹದಿಯಾಗಿಟ್ಟುಕೊಂಡು ಕೇಂದ್ರ ಮತ್ತು ರಾಜ್ಯ ಸರಕಾರಗಳು ಇಲ್ಲಿಯವರೆಗೆ ಮುಂದಿನ ಹಂತದ ಚರ್ಚೆಗಳನ್ನು ನಡೆಸಿವೆ.

ಯುಪಿ‌ಎ ಸರಕಾರ 2011 ರಲ್ಲಿ ಲೋಕಸಭೆಯಲ್ಲಿ ಜಿ‌ಎಸ್‌ಟಿ ಕುಸಿತ ಸಾಂವಿಧಾನಿಕ ತಿದ್ದುಪಡಿ ವಿಧೇಯಕವನ್ನು ಮಂಡಿಸಿತ್ತು. ಆದರೆ ರಾಜ್ಯಗಳು ವಿಧೇಯಕದಲ್ಲಿ ರಾಜ್ಯಗಳಿಗೆ ನೀಡುವ ಐದು ವರ್ಷಗಳ ಅವಯ ಪರಿಹಾರ ಪ್ಯಾಕೇಜ್ ಬಗ್ಗೆ ವಿವರವನ್ನು ಸೇರಿಸಬೇಕು ಎಂದು ಪಟ್ಟು ಹಿಡಿದಿದ್ದವು. ಜೊತೆಗೆ ಹಲವು ರಾಜ್ಯಗಳು ಪೆಟ್ರೋಲಿಯಂ, ಮದ್ಯ ಮತ್ತು ತಂಬಾಕನ್ನು ಜಿ‌ಎಸ್‌ಟಿ ವ್ಯಾಪ್ತಿಯಿಂದ ಹೊರಗಿಡಬೇಕೆಂದು ಒತ್ತಾಯಿಸಿದ್ದವು. ಆದ್ದರಿಂದ ಬಿಕ್ಕಟ್ಟು ಮುಂದುವರಿದಿತ್ತು. ಈ ಕಸರತ್ತಿನ ಮಧ್ಯೆ ಕೇಂದ್ರದಲ್ಲಿ ಯುಪಿ‌ಎ ಸರಕಾರ ನಿರ್ಗಮಿಸಿ ಎನ್‌ಡಿ‌ಎ ಆಗಮಿಸಿತು. ಅನ್ವಯಿಕ ಅರ್ಥಶಾಸ್ತ್ರ ಸಂಶೋಧನೆಯ ರಾಷ್ಟ್ರೀಯ ಮಂಡಳಿಯ ಅಧ್ಯಯನದ ಪ್ರಕಾರ ಜಿ‌ಎಸ್‌ಟಿಯ ಪೂರ್ಣ ಪ್ರಮಾಣದ ಅನುಷ್ಠಾನದಿಂದ ಜಿಡಿಪಿ ಶೇ. 0.9 – 1.7 ರಷ್ಟು ಹೆಚ್ಚಳವಾಗಲಿದೆ.

ಜಿ‌ಎಸ್‌ಟಿಯ ಮುಖ್ಯಾಂಶಗಳು:

1. ಉತ್ಪನ್ನ/ಸೇವೆಯ ಗಮ್ಯವನ್ನು ಅಧರಿಸಿದ ತೆರಿಗೆ:
ಪ್ರಸ್ತುತ ಉತ್ಪನ್ನದ ಉತ್ಪಾದನೆ ಅಥವಾ ಮಾರಾಟ, ಸೇವೆಯ ಮುನ್ನೇರ್ಪಾಡು, ಪೂರ್ವ ಸಿದ್ಧತೆಗೆ ಸಂಬಂಸಿದ ತೆರಿಗೆಯನ್ನು ವಿಸಲಾಗುತ್ತದೆ. ಆದರೆ ಉದ್ದೇಶಿತ ಸರಕು ಮತ್ತು ಸೇವಾ ತೆರಿಗೆಯು ಉತ್ಪನ್ನ ಅಥವಾ ಸೇವೆಯ ಪೂರೈಕೆಯ ಮೇಲೆ ಅನ್ವಯವಾಗುತ್ತದೆ. ಇದು ಉತ್ಪನ್ನ ಅಥವಾ ಸೇವೆಯ ಮೂಲವನ್ನು ಅಧರಿಸುವ ಈಗಿನ ಪದ್ಧತಿಗೆ ತಿಲಾಂಜಲಿ ಕೊಟ್ಟು, ಗಮ್ಯ ಸ್ಥಾನವನ್ನು ಆಧರಿಸಿದ ಪದ್ಧತಿಗೆ ಚಾಲನೆ ನೀಡಲಿದೆ.

2. ಏಕ ಕಾಲದಲ್ಲಿ ಎರಡು ವಿಧ:
ಜಿ‌ಎಸ್‌ಟಿಯಲ್ಲಿ ಕೇಂದ್ರ ಮತ್ತು ರಾಜ್ಯ ಸರಕಾರಗಳು ಏಕಕಾಲ ಮತ್ತು ಒಂದೇ ತಳಹದಿಯಲ್ಲಿ ತೆರಿಗೆ ವಿಸುತ್ತವೆ. ಕೇಂದ್ರ ಸರಕಾರ ನಿಗದಿಪಡಿಸುವ ಜಿ‌ಎಸ್‌ಟಿಯನ್ನು ಸೆಂಟ್ರಲ್ ಜಿ‌ಎಸ್‌ಟಿ (ಸಿಜಿ‌ಎಸ್‌ಟಿ) ಮತ್ತು ರಾಜ್ಯಗಳು ನಿಗದಿಪಡಿಸುವ ಜಿ‌ಎಸ್‌ಟಿಯನ್ನು ಸ್ಟೇಟ್ ಜಿ‌ಎಸ್‌ಟಿ (ಎಸ್‌ಜಿ‌ಎಸ್‌ಟಿ) ಎನ್ನುತ್ತಾರೆ. ಸಿಜಿ‌ಎಸ್‌ಟಿ ಮತ್ತು ಎಸ್‌ಜಿ‌ಎಸ್‌ಟಿ ದರ ಎಷ್ಟಿರಬೇಕು ಎಂಬುದನ್ನು ಕೇಂದ್ರ ಮತ್ತು ರಾಜ್ಯ ಸರಕಾರಗಳು ಪರಸ್ಪರ ಒಮ್ಮತದಿಂದ ನಿರ್ಧರಿಸುತ್ತವೆ.

3. ಜಿ‌ಎಸ್‌ಟಿಯಲ್ಲಿ ವಿಲೀನವಾಗಲಿರುವ ಕೇಂದ್ರ ಸರಕಾರದ ತೆರಿಗೆಗಳು:
– ಕೇಂದ್ರ ಅಬಕಾರಿ ತೆರಿಗೆ
– ಹೆಚ್ಚುವರಿ ಅಬಕಾರಿ ಸುಂಕ (ವಿಶೇಷ ಮಹತ್ತ್ವದ ಸರಕುಗಳು)
– ಹೆಚ್ಚುವರಿ ಅಬಕಾರಿ ಸುಂಕ ( ಜವಳಿ ಮತ್ತು ಜವಳಿ ಉತ್ಪನ್ನಗಳು)
– ಹೆಚ್ಚುವರಿ ಕಸ್ಟಮ್ಸ್ (ಸಿವಿಡಿ)
– ವಿಶೇಷ ಹೆಚ್ಚುವರಿ ಕಸ್ಟಮ್ಸ್ (ಎಸ್‌ಎಡಿ)
– ಸೇವಾ ತೆರಿಗೆ
– ಸೆಸ್ ಮತ್ತು ಸರ್ಚಾರ್ಜ್

4. ಜಿ‌ಎಸ್‌ಟಿಯಲ್ಲಿ ವಿಲೀನವಾಗಲಿರುವ ರಾಜ್ಯಗಳ ತೆರಿಗೆಗಳು:
– ರಾಜ್ಯಗಳ ವ್ಯಾಟ್
– ವಿಲಾಸಿ ತೆರಿಗೆ
– ಎಂಟ್ರಿ ಟ್ಯಾಕ್ಸ್ (ಅಕ್ಟ್ರಾಯ್ ಹೊರತುಪಡಿಸಿದ ತೆರಿಗೆ)
– ಮನರಂಜನಾ ತೆರಿಗೆ ( ಸ್ಥಳೀಯ ಮಂಡಳಿಗಳು ವಿಸುವ ತೆರಿಗೆ ಅಲ್ಲ)
– ಜಾಹೀರಾತು ತೆರಿಗೆ
– ಲಾಟರಿ, ಬೆಟ್ಟಿಂಗ್ ಮತ್ತು ಜೂಜು ಕುರಿತ ತೆರಿಗೆ
– ರಾಜ್ಯಗಳ ಸೆಸ್, ಸರ್ಚಾರ್ಜ್

ಜಿ‌ಎಸ್‌ಟಿ ದರ ನಿರ್ಧರಿಸುವುದು ಹೇಗೆ?
ಜಿ‌ಎಸ್‌ಟಿ ವಿಧೇಯಕ ಸಂಸತ್ತಿನ ಉಭಯ ಸದನಗಳಲ್ಲಿ ಅಂಗಿಕಾರವಾಗಿ ಎಲ್ಲ ಪ್ರಕ್ರಿಯೆಗಳು ಪೂರ್ಣಗೊಂಡ ಬಳಿಕ ಕೇಂದ್ರ ಮತ್ತು ರಾಜ್ಯ ಸರಕಾರವನ್ನು ಒಳಗೊಂಡ ಜಿ‌ಎಸ್‌ಟಿ ಮಂಡಳಿ ರಚನೆಯಾಗಲಿದೆ. ಕೇಂದ್ರ ಹಣಕಾಸು ಸಚಿವರ ಅಧ್ಯಕ್ಷತೆಯ ಜಿ‌ಎಸ್‌ಟಿ ಕೌನ್ಸಿಲ್ ಜಿ‌ಎಸ್‌ಡಿ ದರ ಎಷ್ಟಿರಬೇಕು ಎಂಬುದನ್ನು ಸರಕಾರಕ್ಕೆ ಶಿಫಾರಸು ನೀಡಲಿದೆ. ಈ ಮಂಡಳಿಯಲ್ಲಿ ಕಂದಾಯ ಇಲಾಖೆ ರಾಜ್ಯ ಸಚಿವರು, ರಾಜ್ಯಗಳ ಹಣಕಾಸು ಸಚಿವರುಗಳು ಸೇರಿ ತೆರಿಗೆ, ತೆರಿಗೆ ವಿನಾಯಿತಿ, ಮಿತಿಗಳನ್ನು ತೀರ್ಮಾನಿಸುತ್ತಾರೆ. ಕೇಂದ್ರ ಮತ್ತು ರಾಜ್ಯ ಸರಕಾರಗಳು ಏಕಕಾಲಕ್ಕೆ ಜಿ‌ಎಸ್‌ಟಿಯನ್ನು ವಿಸಲಿವೆ. ಜಿ‌ಎಸ್‌ಟಿ ದರಗಳು ರಾಷ್ಟ್ರ ವ್ಯಾಪಿ ಏಕರೂಪದಲ್ಲಿದ್ದರೂ, ರಾಜ್ಯಗಳಿಗೆ ಮತ್ತು ಕೇಂದ್ರಕ್ಕೆ ಕೆಲವು ವಿತ್ತೀಯ ಸ್ವಾಯತ್ತತೆಯನ್ನು ನೀಡಲಾಗುತ್ತಿದೆ. ಆದ್ದರಿಂದ ಜಿ‌ಎಸ್‌ಟಿಯ ಮೂಲ ತೆರಿಗೆ ಜೊತೆಗೆ ಅಗತ್ಯ ಬಿದ್ದಲ್ಲಿ ಹೆಚ್ಚುವರಿ ಸುಂಕ ಪಡೆಯಲು ಕೇಂದ್ರ ಮತ್ತು ರಾಜ್ಯ ಸರಕಾರಗಳಿಗೆ ಸಾಧ್ಯವಾಗಲಿದೆ.

ರಾಜ್ಯಗಳಿಗೆ ಹಂತಗಳಲ್ಲಿ ಪರಿಹಾರ
ಸರಕು ಮತ್ತು ಸೇವಾ ತೆರಿಗೆ ಅನುಷ್ಠಾನದ ಸಂದರ್ಭ ರಾಜ್ಯಗಳಿಗೆ ಉಂಟಾಗಬಹುದಾದ ಕಂದಾಯ ನಷ್ಟವನ್ನು ಕೇಂದ್ರ ಸರಕಾರವು ಐದು ವರ್ಷಗಳ ತನಕ ಭರಿಸಲಿದೆ. ಜಿ‌ಎಸ್‌ಟಿ ಕುರಿತ ಸಾಂವಿಧಾನಿಕ ತಿದ್ದುಪಡಿ ವಿಧೇಯಕದ ಮೂಲಕ ಕೇಂದ್ರ ಮತ್ತು ರಾಜ್ಯ ಸರಕಾರಗಳಿಗೆ ನೂತನ ತೆರಿಗೆ ಸುಧಾರಣೆಯನ್ನು ಜಾರಿಗೊಳಿಸಲು ಸಂವಿಧಾನಬದ್ಧ ಅಕಾರ ಸಿಗಲಿದೆ. ಪರಿಹಾರದ ಬಗ್ಗೆಯೂ ವಿಧೇಯಕದಲ್ಲಿ ಪ್ರಸ್ತಾಪವಾಗಲಿದೆ. ರಾಜ್ಯಗಳಿಗೆ ಏನಾದರೂ ತಾರತಮ್ಯ ಕಂಡು ಬಂದಲ್ಲಿ ಪ್ರಶ್ನಿಸುವ ಹಕ್ಕು ದೊರೆಯಲಿದೆ. ರಾಜ್ಯಗಳಿಗೆ ಒಂದು ರೂಪಾಯಿ ಕೂಡ ನಷ್ಟವಾಗದಂತೆ ನೋಡಿಕೊಳ್ಳಲಾಗುವುದು ಎಂದಿರುವ ಹಣಕಾಸು ಸಚಿವ ಅರುಣ್ ಜೇಟ್ಲಿ, ಪರಿಹಾರದ ಜತೆಗೆ ಎರಡು ವರ್ಷಗಳ ತನಕ ಅಂತರ ರಾಜ್ಯ ವ್ಯಾಪಾರದಲ್ಲಿ ಸರಕುಗಳ ಮೇಲೆ ಶೇ.1 ನ್ನು ಮೀರದಂತೆ ಹೆಚ್ಚುವರಿ ತೆರಿಗೆ ಪಡೆಯಲು ಅವಕಾಶ ಕಲ್ಪಿಸಲು ಕೇಂದ್ರ ಸರಕಾರ ಪರಿಶೀಲಿಸಲಿದೆ ಎಂದು ಹೇಳಿದ್ದಾರೆ. ಜಿ‌ಎಸ್‌ಟಿ ಜಾರಿಯಾದಂದಿನಿಂದ ಮೊದಲ ಮೂರು ವರ್ಷಗಳ ತನಕ ಪೂರ್ಣ ಪರಿಹಾರ, ನಾಲ್ಕನೇ ವರ್ಷ ಶೇ.75  ಮತ್ತು 5 ನೇ ವರ್ಷ ಶೇ.50  ಪರಿಹಾರ ನೀಡಲಾಗುವುದು. ಕೇಂದ್ರ ಮಾರಾಟ ತೆರಿಗೆಯ ಕಡಿತದಿಂದ ರಾಜ್ಯಗಳಿಗೆ ಉಂಟಾಗುವ ನಷ್ಟ ಪರಿಹಾರಾರ್ಥ ಪ್ರಸಕ್ತ ಸಾಲಿನಲ್ಲಿ 11,000  ಕೋಟಿ ರೂ. ವಿತರಿಸಲಾಗುವುದು ಎಂದಿದ್ದಾರೆ.

Taxes

ಜಿ‌ಎಸ್‌ಟಿ ವ್ಯಾಪ್ತಿಗೆ ಪೆಟ್ರೋಲ್
ಮಾನವ ಬಳಕೆಯ ಮದ್ಯ ಹೊರತುಪಡಿಸಿ ಉಳಿದೆಲ್ಲ ಉತ್ಪನ್ನಗಳು ಉದ್ದೇಶಿತ ವಿಧೇಯಕದ ಪ್ರಕಾರ ಜಿ‌ಎಸ್‌ಟಿ ವ್ಯಾಪ್ತಿಗೆ ಬರುತ್ತವೆ. ಹಾಗೆಯೇ ಜಿ‌ಎಸ್‌ಟಿ ಮಂಡಳಿಗೆ ಶಾಸನಬದ್ಧ ಆಕಾರವನ್ನೂ ಕೊಟ್ಟಿರುವುದರಿಂದ ಇತರ ಮುಖ್ಯವಾದ ವಿಷಯಗಳ ಬಗ್ಗೆ ಮತ್ತು ಭವಿಷ್ಯದಲ್ಲಿ ವಿನಾಯಿತಿಗಳ ಬಗ್ಗೆ ಮಂಡಳಿ ತೀರ್ಮಾನಿಸಲಿದೆ. ಪೆಟ್ರೋಲಿಯಂ ಮತ್ತು ಪೆಟ್ರೋಲಿಯಂ ಉತ್ಪನ್ನಗಳನ್ನು ಕೂಡ ರಾಜ್ಯಗಳ ಮನವೊಲಿಸಿ ಜಿ‌ಎಸ್‌ಟಿ ವ್ಯಾಪ್ತಿಗೆ ತರಲಾಗುವುದು, ಆದರೆ ಮಂಡಳಿ ನಿರ್ಧರಿಸುವ ನಿಗದಿತ ಅವಯ ತನಕ ಜಿ‌ಎಸ್‌ಟಿಯಿಂದ ಹೊರಗಿಡಲಾಗಿದೆ. ಪ್ರಸ್ತುತ ರಾಜ್ಯಗಳು ಮತ್ತು ಕೇಂದ್ರ ಸರಕಾರ ಪೆಟ್ರೋಲಿಯಂ ಮತ್ತು ಅದರ ಉತ್ಪನ್ನಗಳಿಗೆ ಮಾರಾಟ ತೆರಿಗೆ/ವ್ಯಾಟ್, ಸಿ‌ಎಸ್‌ಟಿ ಮತ್ತು ಅಬಕಾರಿ ಸುಂಕವನ್ನು ವಿಸುತ್ತವೆ. ಮಧ್ಯಂತರ ಅವಧಿಯವರೆಗೆ ಇದು ಮುಂದುವರಿಯಲಿದೆ.

ಜಿ‌ಎಸ್‌ಟಿ ತೆರಿಗೆ ಶೇ. 12- 15 ಸೂಕ್ತ
“ ಜಿ‌ಎಸ್‌ಟಿ ಅನುಷ್ಠಾನಕ್ಕೆ ಬಂದರೆ ಒಳ್ಳೆಯದು. ಆದರೆ ಸಮರ್ಪಕವಾಗಿ ಜಾರಿಯಾಗಬೇಕು. ಕ್ರಮೇಣ ಒಂದೊಂದೇ ತೆರಿಗೆಗಳು ಅದಕ್ಕೆ ಸೇರ್ಪಡೆಯಾಗಬಾರದು. ಉತ್ಪನ್ನಗಳ ಅಂತಾರಾಜ್ಯ ಮಾರಾಟದ ಸಂದರ್ಭ ರಿಯಾಯಿತಿ ತೆರಿಗೆಯನ್ನು ಪಡೆಯಲು ಪ್ರಸ್ತುತ ಇರುವ ನಮೂನೆ ` ಸಿ’ ಯನ್ನು ಖರೀದಿದಾರರಿಂದ ಪಡೆಯಲು ಬಹಳ ಶ್ರಮ ಹಾಗೂ ಹೆಚ್ಚಿನ ತೆರಿಗೆ ಪಾವತಿಸಬೇಕಾಗಿರುವುದರಿಂದ ಅದರ ಪರಿಹಾರವಾಗಿ ಬೇರೆ ವಿವರ ಪಟ್ಟಿಯನ್ನು ಪಡೆದು ಕರನಿರ್ಧಾರ ಆಗಬೇಕು. ಕೇಂದ್ರ ಮತ್ತು ರಾಜ್ಯಗಳ ಜಿ‌ಎಸ್‌ಟಿಗೆ ಆಡಳಿತಾಕಾರಿ ಒಬ್ಬರೇ ಇರಬೇಕು. ಲೆಕ್ಕ ಪರಿಶೋಧನೆ ಒಬ್ಬರಿಂದಲೇ ನಡೆಯಬೇಕು. ಇಲ್ಲದಿದ್ದರೆ ಮತ್ತೆ ತೊಂದರೆಗಳಾಗಬಹುದು. ಜಿ‌ಎಸ್‌ಟಿ ತೆರಿಗೆ ಶೇ.12- 15 ರ ನಡುವೆ ಇದ್ದರೆ ಗ್ರಾಹಕರಿಗೆ ಮತ್ತು ಉದ್ಯಮ ವಲಯಕ್ಕೆ ಸ್ಪಂಸಲು ಸಹಕಾರಿಯಾಗುತ್ತದೆ. ಉತ್ಪನ್ನ ಮತ್ತು ಸೇವೆಗಳ ಬೆಲೆಗಳು ಕಡಿತಗೊಳಿದರೆ ಹೆಚ್ಚಿನ ಆರ್ಥಿಕ ಚಟುವಟಿಕೆಗಳಿಗೆ ಅವಕಾಶವಾಗುತ್ತದೆ “. –  ಎಸ್. ಸಂಪತ್‌ರಾಮನ್. ಅಧ್ಯಕ್ಷರು, ಎಫ್‌ಕೆಸಿಸಿ‌ಐ, ಬೆಂಗಳೂರು

ತೆರಿಗೆ ಸುಧಾರಣೆಯ ವಿಶ್ವಾಸ
“ವ್ಯಾಟ್‌ನ ಮುಂದುವರಿದ ಭಾಗವಾಗಿರುವ ಜಿ‌ಎಸ್‌ಟಿ, ತೆರಿಗೆ ಸುಧಾರಣೆಯ ನಿಟ್ಟಿನಲ್ಲಿ ನಿರ್ಣಾಯಕ ಪಾತ್ರ ವಹಿಸಲಿದೆ. ಆರ್ಥಿಕ ಪ್ರಗತಿಗೆ ಇದು ಸಹಕಾರಿಯಾಗುವ ಎಲ್ಲ ಸಾಧ್ಯತೆಗಳಿವೆ. ಪ್ರಧಾನಿಯವರ ಮೇಕ್ ಇನ್ ಇಂಡಿಯಾ ಯೋಜನೆಯ ಯಶಸ್ಸಿಗೂ ಇದು ಪೂರಕ. ಜಿ‌ಎಸ್‌ಟಿ ದರ ಎಷ್ಟಿರಬೇಕೆಂಬುದನ್ನು ಜಿ‌ಎಸ್‌ಟಿ ಮಂಡಳಿ ಶಿಫಾರಸು ಮಾಡಲಿದ್ದು, ವಿಧೇಯಕ ಅಂಗೀಕಾರವಾದ ನಂತರ ಸ್ಪಷ್ಟ ಚಿತ್ರಣ ಸಿಗಲಿದೆ. ಸದ್ಯಕ್ಕೆ ಈ ಬಗ್ಗೆ ಊಹಾಪೋಹಗಳಿವೆ. ಆದರೆ ವ್ಯಾಟ್‌ಗಿಂತಲೂ ಹೆಚ್ಚು ಸುಧಾರಣೆಯ ಆಯಾಮವನ್ನು ಒಳಗೊಂಡಿದೆ. 2016  ರ ಏಪ್ರಿಲ್‌ನಲ್ಲಿ ಜಾರಿಯಾದರೂ, ಪೂರ್ಣ ಪ್ರಮಾಣದ ಲಾಭ ದೊರೆಯಲು ಒಂದೆರಡು ವರ್ಷ ಕಾಯಬೇಕು” –
ಬಿ.ಟಿ.ಮನೋಹರ್. ರಾಜ್ಯ ತೆರಿಗೆ ಸಮಿತಿ ಅಧ್ಯಕ್ಷ, ಎಫ್‌ಕೆಸಿಸಿ‌ಐ

.

– ಕೇಶವಪ್ರಸಾದ್.ಬಿ.ಕಿದೂರು

(ವಿಜಯ ಕರ್ನಾಟಕದಲ್ಲಿ ಪ್ರಕಟಿತ)

1 Response

  1. Avatar Niharika says:

    ಉತ್ತಮ ಮಾಹಿತಿ, ಥ್ಯಾಂಕ್ಸ್.

Leave a Reply

 Click this button or press Ctrl+G to toggle between Kannada and English

Your email address will not be published.

Follow

Get every new post on this blog delivered to your Inbox.

Join other followers: