ಗುಂಪಿಗೆ ಸೇರದ ಪದಗಳು

Share Button

ಗುಂಪಿಗೆ ಸೇರದ ಪದಗಳೇ ಹಾಗೆ
ಹುಟ್ಟು ಹಠಮಾರಿಗಳು
ಗುಂಪಲ್ಲಿದ್ದು ಇಲ್ಲದಂತಿರುತ್ತವೆ
ಅಥವಾ ಎದ್ದು ಕಾಣುತ್ತಿರುತ್ತವೆ,
ಅಂದ ಮಾತ್ರಕ್ಕೆ ಗುಂಪಿನಿಂದಲೇ
ಹೊರಹಾಕುವುದು ನಿಕೃಷ್ಟ.

ಗುಂಪಿಗೆ ಸೇರದ ಪದವನ್ನು ಗುರುತಿಸಿ
ಹೀಯಾಳಿಸಿ ಕೆರಳಿಸುವುದು ಹೊಸತೇನಲ್ಲ.
ಗುಂಪಿನಲ್ಲಿ ಗೋವಿಂದವಾಗುವುದಕ್ಕಿಂತ
ಗುಂಪಿಗೆ ಸೇರದಿರುವುದೇ ಒಳಿತು.

ಹೊಗರು ಕಾಯಿಗಳ ಗುಂಪಿನಲ್ಲಿರುವ
ಹಣ್ಣು, ಮಾಗಿದ ಮೇಲೆ ಸಿಹಿಯಾದದ್ದು,
ಮಿಕ್ಕವಕ್ಕಿಂತ ತುಸು
ಮೊದಲೇ ಮಾಗಿರುತ್ತದಷ್ಟೇ.
ಮಿಕ್ಕವುಗಳ ಹಣೆಬರಹವು ನಾಳೆ
ಅದೇ ಆಗಬಹುದು.
ಆಗ ಗುಂಪಿಗೆ ಸೇರದೆಂದು ಹೊರಹಾಕಿದ
ಹಣ್ಣು ನೆನಪು ಮಾತ್ರ,
ಕಾಲನಿಗೆ ಜೇಷ್ಠತೆಯ ಹಂಗೆಲ್ಲಿದೆ.

ಕೆಲವು ಪದಗಳು ಗುಂಪನ್ನೇ ಹೊರದಬ್ಬಿ
ಭುಗಿಲೆದ್ದ ಸೂರ್ಯನಂತಾದರೆ..
ಮತ್ತಲವು ದಬ್ಬಿಸಿಕೊಂಡು ತಾಳ್ಮೆಯ
ಚಂದ್ರನಂತಾಗುತ್ತವೆ.

ಈ ಗುಂಪಿಗೆ ಸೇರದ ಪದಗಳೇ ಹೀಗೆ..
ತಾವು ಇತರ ಪದಗಳಿಗಿಂತ ಭಿನ್ನವೆಂದು
ಹೆಮ್ಮೆ ಪಡಬೇಕೋ..
ದೌರ್ಬಲ್ಯವೆಂದು ದುಃಖಿಸಬೇಕೋ ತಿಳಿಯದೇ,
ಸಮಯೋಚಿತ ಪ್ರಸಾಧನದ
ಹುಡುಕಾಟದಲ್ಲಿ ಕಂಗೆಟ್ಟಿರುತ್ತವೆ.
ಸದಾ ಅಭದ್ರತೆಯ ಆತಂಕದಲ್ಲಿ
ಅದೆಷ್ಟೋ ಕನಸುಗಳು ಭಗ್ನಗೊಂಡಿರುತ್ತವೆ.

ಅಷ್ಟಕ್ಕೂ ಗುರುತಿಸಲ್ಟಟ್ಟ ಪದದ
ಅಂತ:ಕರಣವನ್ನರಿತು, ಇರುವಂತೆ ಸ್ವೀಕರಿಸೋ
ದೊಡ್ಡ ಹೃದಯದ ಪದಗಳು ಮಿತಿಯಲ್ಲಿವೆ.
ಗುರುತಿಸಿ ಅಂಕ ಗಳಿಕೆಯೇ
ಪರಮ ಧ್ಯೇಯವಾಗಿರುವಾಗ
ನಿರೀಕ್ಷಿಸುವುದು ಹಾಸ್ಯಾಸ್ಪದವೇ.

ಗುಂಪಿಗೆ ಸೇರದ ಪದದ
ನಿಶ್ಯಬ್ಧದ ಕೂಗು ಆಲಿಸಿದವರಿಗಷ್ಟೇ
ಕೇಳಿಸುವುದು.
ಮೌನದ ಆಲಾಪನೆ ಹಾಗೆಲ್ಲ ಎಲ್ಲರಿಗೂ
ಸಿದ್ಧಿಸುವುದಿಲ್ಲ.

-ಶರತ್ ಪಿ.ಕೆ. ಹಾಸನ.,

4 Responses

  1. Hema Hema says:

    ಕವನ ಸೊಗಸಾಗಿದೆ..

  2. ಕೆ.ಬಿ. ವೀರಲಿಂಗನಗೌಡ್ರ says:

    ಅರ್ಥಪೂರ್ಣ, ಅಭಿನಂದನೆಗಳು.

  3. Nayana Bajakudlu says:

    ಚೆನ್ನಾಗಿದೆ, ಹಣ್ಣುಗಳು , ಸೂರ್ಯ, ಚಂದ್ರ , ಜೊತೆಗೆ ಬದುಕು ಕವನದಲ್ಲಿ ಅಡಗಿರೋ ಈ ಎಲ್ಲಾ ಉದಾಹರಣೆಗಳು ಸೊಗಸಾಗಿವೆ .

  4. Shylajahassan says:

    ಚೆನ್ನಾಗಿದೆ ಶರತ್

Leave a Reply

 Click this button or press Ctrl+G to toggle between Kannada and English

Your email address will not be published. Required fields are marked *

Follow

Get every new post on this blog delivered to your Inbox.

Join other followers: