ಮಳೆಗೆ ಮುನ್ನ…

Share Button

ಭೂಮಿ ಮೋಡಗಳ ನಡುವೆ
ಮಳೆ ಇಳಿವ ಮಾತುಕತೆ
ಗಿಡ ಮರ ಸಸಿ ಕಾಂಡಗಳಲ್ಲಿ
ಕ್ಷಣಕ್ಷಣದ ಕಾತರತೆ
ಧಾನ್ಯ ಜೋಪಾನಿಸುವ
ಧ್ಯಾನದ ಇರುವೆಗಳ ಸಾಲು
ಜಿನುಗಲಿಹ ಜಲ ನಿರೀಕ್ಷೆಯ
ನೆಲದೊಳಗಿನ ಆಳ ಬೇರು

ನವಿಲ ನರ್ತನಕ್ಕೆ ಹೆಡೆ
ಬಿರಿದ ಸರ್ಪ ಜಾಗರ ಗಮನ
ಕಪ್ಪೆ ಕುಪ್ಪಳಿಸಿ ತಪ್ಪಿ
ಸಿಕೊಳ್ಳುವ ಜಾರು ಜಾಣತನ
ಗೂಡು ಸೇರುವ ತವಕಗಳ
ಅಸೀಮ ಜೀವ ಜಾತ್ರೆ
ಸಂಭ್ರಮದ ನೆಲ ಗಗನದಲ್ಲಿ
ಸಾಗಿರುವ ಅಭಯ ಯಾತ್ರೆ

ಉರಿವ ಸೂರ್ಯನ ದೂಡಿ
ಮೇಘ ಸರಪಳಿ ದಾಳಿ
ಭುವಿಯ ಬೆಳಕ ಆವರಿಸಿದ
ಕತ್ತಲೆಯ ಕಪ್ಪು ಮೋಡಿ
ಗಾಳಿ ಬೀಸಿಗೆ ನಭದಲ್ಲಿ
ಮುಗಿಲ ಮುತ್ತಾಲಿಂಗನ
ನಗೆ ಚಪ್ಪಾಳೆ ಗುಡುಗು
ಮಿಂಚು ಕ್ಷಣ ವಿಲಕ್ಷಣ

ಏನ ನೆನೆಯಿತು ಪ್ರಕೃತಿ
ಏನ ಬಯಸಿ ಕನಸಿತು
ಏನ ಕೇಳಿತು ಭೂಮಿ
ಏನ ಕಂಡಿತು ಹಾಡಿತು
ಸಿಂಚನದಾಲಾಪದೊಡನೆ
ಧುಮ್ಮಿಕ್ಕುವ ಮೇಘಮಲ್ಹಾರ
ದ ಮುನ್ನ ಮೈ ಮೀಟಿ
ಶೃತಿಯಾಗಲಿರುವಳೀ ಇಳೆ

ತಂಪು ಕಾಡಿನ ತುಂಬು
ಹಸಿ ಹಸಿರು ಚಾಚುವತ್ತ
ಹಕ್ಕಿ ಪಿಕ್ಕಿ ಹುಳು ಹುಪ್ಪಟಗಳ
ಜೀವ ಅರಳುವತ್ತ
ಜ್ವಲಿಸಿದ ರವಿ ಮರೆಯಾಗಿ
ಘನ ಕಪ್ಪು ಹನಿಸುವ ಬೆರಗು
ಬೆವರು ಮಳೆ ಚಕ್ರದಲಿ ಜೀವ
ಜತನವಾಗುವ ಹುರುಪು

– ಅನಂತ ರಮೇಶ್

4 Responses

  1. kumara says:

    ಮಳೆಗೆ ಇಳೆಯ ಕಾತುರದ ಕ್ಷಣದ ವರ್ಣನೆ ರಮ್ಯ .. ಪದ್ಯ ಸುಂದರ..

  2. Bellala Gopinatha Rao says:

    ವಾವ್…. ಅನಂತ ಉದ್ದೀಪನ….

Leave a Reply to Anantha Ramesh Cancel reply

 Click this button or press Ctrl+G to toggle between Kannada and English

Your email address will not be published. Required fields are marked *

Follow

Get every new post on this blog delivered to your Inbox.

Join other followers: