ನೇಪಾಳದ ‘ಮನಕಾಮನಾ’ ಮಂದಿರ

ದೇವಾಲಯ ತಲುಪಲು ಗೊಂಡೋಲಾ ಇಳಿದು ಸ್ವಲ್ಪ ದೂರ ನಡೆಯಬೇಕು. ಈ ಕಾಲುದಾರಿಯಲ್ಲಿ ಕಾಣಸಿಕ್ಕಿದ ಕಿತ್ತಳೆ ಮರಗಳು ಹಣ್ಣುಗಳಿಂದ ಶೋಭಿಸುತ್ತಿದ್ದುವು. ತಾಜಾ ಕಿತ್ತಳೆಹಣ್ಣುಗಳನ್ನು ಅಲ್ಲಿಯೇ ಮಾರುತ್ತಿದ್ದರು.

17 ನೆಯ ಶತಮಾನದಲ್ಲಿ, ಅರಸರಾಮ್ ಶಾ ರಾಜನ ಮರಣಾನಂತರ ಆತನ ಮಂತ್ರಿಯಾದ ಲಖನ್ ಥಾಪಾ ಎಂಬವನು ಮನಕಾಮನಾ ದೇವಾಲಯವನ್ನು ಕಟ್ಟಿಸಿದನಂತೆ. ಇದು ನಾಲ್ಕು ಅಂತಸ್ತುಗಳ ಪಗೋಡದ ಆಕಾರದಲ್ಲಿ ಇತ್ತಂತೆ. 2015 ರ ಎಪ್ರಿಲ್ ನಲ್ಲಿ ನೇಪಾಳದಲ್ಲಿ ಸಂಭವಿಸಿದ ಭೂಕಂಪದಿಂದಾಗಿ ಮಂದಿರವು ಘಾಸಿಗೊಂಡಿದೆ, ಈಗ ಪುನರ್ನಿಮಾಣ ಕೆಲಸಗಳು ನಡೆಯುತ್ತಿವೆ. ಅಲ್ಲಿದ್ದ ಅಂಗಡಿಯೊಂದರಲ್ಲಿ, ಮೊದಲು ಇದ್ದ ದೇವಾಲಯದ ಚಿತ್ರ ಸಿಕ್ಕಿತು.

ಶಕ್ತಿದೇವತೆಯ ಆರಾಧನೆಯ ಪದ್ಧತಿಯಂತೆ ಅಲ್ಲಿ ಪ್ರಾಣಿಬಲಿ ಈಗಲೂ ನಡೆಯುತ್ತದೆ. ನಮ್ಮ ಸರದಿ ಸಾಲಿನಲ್ಲಿ ಆಡು ಮತ್ತು ಕೋಳಿಗಳನ್ನು ಹಿಡಿದುಕೊಂಡು ಬಂದವರಿದ್ದರು. ಅವರವರ ಆಚರಣೆ, ನಂಬಿಕೆಯನ್ನು ಪ್ರಶ್ನಿಸುವಂತಿಲ್ಲ. ಆದರೂ, ಕತ್ತಿಗೆ ಟ್ಯಾಗ್ ಸಿಕ್ಕಿಸಿಕೊಂಡು ತನ್ನ ‘ಪ್ರಾಣಹರಣ’ದ ಕಾಲವನ್ನು ಎದುರುನೋಡುತ್ತಿದ್ದ ಮೂಕಪ್ರಾಣಿಗಳನ್ನು ಕಂಡಾಗ ಬೇಸರವಾಯಿತು.

ನಾವು ಅಲ್ಲಿಗೆ ಭೇಟಿ ಕೊಟ್ಟಿದ್ದ ದಿನವಾದ , 25 ಫೆಬ್ರವರಿ 2017 ಶನಿವಾರದಂದು, ನೇಪಾಳದಲ್ಲಿ ಸಾರ್ವಜನಿಕ ರಜೆಯಿತ್ತು. ಹಾಗಾಗಿ ಮಂದಿರದಲ್ಲಿ ಬಹಳಷ್ಟು ಜನರಿದ್ದರು. ಸರದಿ ಸಾಲಿನಲ್ಲಿ ನಿಂತು ದರ್ಶನ ಮಾಡಲು ಇನ್ನಷ್ಟು ಸಮಯ ಬೇಕಾಗುತ್ತಿತ್ತು. ಹಾಗಾಗಿ, ಪ್ರದಕ್ಷಿಣೆ ಮಾಡಿ, ಸ್ವಲ್ಪ ದೂರದಿಂದಲೇ ಶಕ್ತಿಪೀಠವನ್ನು ನೋಡಿ ಬಂದೆವು..

 -ಹೇಮಮಾಲಾ.ಬಿ