ಉದ್ದಿನ ಸಂಡಿಗೆ

ಬೇಸಗೆಯಲ್ಲಿ ಬಿಸಿಲಿನ ಸದುಪಯೋಗ ಪಡೆದು ಮಾಡಬಹುದಾದ ಕೆಲಸ ವಿವಿಧ ಹಪ್ಪಳ-ಸಂಡಿಗೆಗಳ ತಯಾರಿ.

ಉದ್ದಿನಬೇಳೆ ಮತ್ತು ಹಸಿರು ಮೆಣಸಿನಕಾಯಿಗಳನ್ನು ಬಳಸಿ ಸಂಡಿಗೆಯನ್ನು ತಯಾರಿಸುವ ವಿಧಾನ ಹೀಗಿದೆ:

1. ಒಂದು ಲೋಟದಷ್ಟು  (ಸುಮಾರು 100 ಗ್ರಾಮ್) ಉದ್ದಿನಬೇಳೆಯನ್ನು 2-3 ಗಂಟೆಗಳ ಕಾಲ ನೀರಿನಲ್ಲಿ ನೆನೆಸಿ. ನೆನೆದ ಉದ್ದಿನಬೇಳೆಯನ್ನು ಸೋಸಿ ಮಿಕ್ಸಿಯಲ್ಲಿ ಗಟ್ಟಿಯಾಗಿ ರುಬ್ಬಿಟ್ಟುಕೊಳ್ಳಿ.
2. ಕಾಲು ಕಿಲೊ ಹಸಿರುಮೆಣಸಿನಕಾಯಿಗಳನ್ನು ತೊಟ್ಟು ಬೇರ್ಪಡಿಸಿ, ಶುಚಿಗೊಳಿಸಿ, ಮಿಕ್ಸಿಯಲ್ಲಿ ತರಿತರಿಯಾಗಿ ರುಬ್ಬಿಕೊಳ್ಳಿ. ರುಬ್ಬುವಾಗಲೇ ಒಂದು ಟೇಬಲ್ ಸ್ಪೂನ್ ನಷ್ಟು ಉಪ್ಪು ಸೇರಿಸಿ. ಆಗ ಉಪ್ಪು-ಖಾರ ಚೆನ್ನಾಗಿ ಹೊಂದಿಕೊಳ್ಳುತ್ತದೆ.
3. ರುಬ್ಬಿದ ಉದ್ದಿನಹಿಟ್ಟು ಮತ್ತು ಹಸಿರುಮೆಣಸಿನಕಾಯಿ ತರಿಯನ್ನು ಬೆರೆಸಿ  ಚೆನ್ನಾಗಿ ಕೆದಕಿ. ಈ ಹಿಟ್ಟು ಇಡ್ಲಿ ಹಿಟ್ಟಿಗಿಂತ ಸ್ವಲ್ಪ ಹೆಚ್ಚು ಗಟ್ಟಿಯಿರಬೇಕು .
4. ಹೀಗೆ ಸಿದ್ಧಪಡಿಸಿದ ಹಿಟ್ಟಿನಿಂದ ಬಾಳೆ ಎಲೆ ಮೇಲೆ ಪುಟ್ಟದಾಗಿ ಸಂಡಿಗೆಗಳನ್ನು ಹಾಕಿ, ಬಿಸಿಲಿನಲ್ಲಿ ಚೆನ್ನಾಗಿ ಒಣಗಿಸಿ.
5. ಒಣಗಿದ ಸಂಡಿಗೆಗಳನ್ನು ಗಾಳಿಯಾಡದ ಶೇಖರಿಸಿಟ್ಟರೆ ಒಂದು ವರ್ಷಕ್ಕೂ ಕೆಡುವುದಿಲ್ಲ.

ಊಟಕ್ಕೆ ನೆಂಚಿಕೊಳ್ಳಲು ಬೇಕೆನಿಸಿದಾಗ, ಕಾದ ಎಣ್ಣೆಯಲ್ಲಿ ಉದ್ದಿನ ಸಂಡಿಗೆಗಳನ್ನು ಕಂದು ಬಣ್ಣಕ್ಕೆ ಬರುವಂತೆ ಕರಿಯಬೇಕು. ಈ ಸಂಡಿಗೆಯು ತುಪ್ಪನ್ನ ಅಥವಾ ಮೊಸರನ್ನದೊಂದಿಗೆ ಉಣ್ಣಲು ಬಹಳ ರುಚಿಯಾಗಿರುತ್ತದೆ.

ವಿ.ಸೂ :  ಹಸಿರುಮೆಣಸಿನಕಾಯಿಯ ಘಾಟು ತಗ್ಗಿಸಲು ಬೇಕೆನಿಸಿದರೆ, ಹಿಟ್ಟು ತಯಾರಿಸುವಾಗ ಸ್ವಲ್ಪ ಕಾಪ್ಸಿಕಮ್ , ಸೋರೆಕಾಯಿ, ಸೌತೆಕಾಯಿ ಅಥವಾ ಬೂದುಗಂಬಳಕಾಯಿ ಇವುಗಳಲ್ಲಿ ಯಾವುದಾದರೂ ಒಂದನ್ನು ತುರಿದು ಹಿಂಡಿ ಸೇರಿಸಬಹುದು.  ಆದರೆ ಹಿಟ್ಟು ತೆಳುವಾಗದಂತೆ ಜಾಗರೂಕತೆ ವಹಿಸಬೇಕು.ತರಕಾರಿಯ ನೀರನ್ನು ಸೇರಿಸಬಾರದು. ಹೆಚ್ಚಿದ ಕರಿಬೇವಿನ ಸೊಪ್ಪನ್ನೂ ಸೇರಿಸಬಹುದು.

– ಚಂದ್ರಾವತಿ.ಬಿ

+28